Moris kontente ho ita-nia kaben neʼebé fiar la hanesan
Moris kontente ho ita-nia kaben neʼebé fiar la hanesan
“Oinsá ó hatene, katak ó sei soi ó-nia [kaben]?”—1 KOR 7:16.
ITA BELE HETAN RESPOSTA?
Ita bele halo saida deʼit atu haburas dame iha uma-laran maski ita-nia kaben fiar la hanesan?
Oinsá mak ita bele ajuda ita-nia família atu simu lia-loos?
Ita bele halo saida deʼit atu ajuda ita-nia maluk neʼebé sira-nia kaben fiar la hanesan?
1. Ema neʼebé simu lia-loos, dala ruma hasoru saida husi ninia família?
LORON ida, Jesus hatete ba ninia apóstolu sira: “Haklaken bá katak reinu lalehan besik ona.” (Mt 10:1, 7) Lia-foun diʼak neʼe sei lori dame no haksolok ba ema neʼebé simu no hafolin. Maibé, Jesus mós fó avizu ba ninia apóstolu sira katak ema barak sei kontra hasoru sira-nia serbisu haklaken. (Mt 10:16-23) Dala ruma, karik ita-nia família rasik mós la simu lia-loos no fó susar ba ita.—Lee Mateus 10:34-36.
2. Tanbasá mak ita bele moris kontente maski ita-nia família fiar la hanesan?
2 Maibé, se ita-nia família neʼebé fiar la hanesan, ida-neʼe la dehan katak ita la bele moris kontente. Maski ita balu hetan susar makaʼas husi família, neʼe laʼós katak ita hotu hetan susar hanesan neʼe. No karik aban bainrua ita-nia família sei la fó susar tan ba ita. Maski ita ida-idak nia situasaun la hanesan, maibé ita bele moris kontente se ita hatudu hahalok diʼak ba família neʼebé kontra hasoru ita ka seidauk iha lia-loos. Jeová mós sei ajuda ema neʼebé laran-metin ba nia atu haksolok iha susar laran. Ema kristaun bele sai kontente liután se sira (1) hakaʼas an atu haburas dame iha uma-laran, no (2) hakaʼas an atu ajuda sira-nia família atu simu lia-loos.
HABURAS DAME IHA UMA-LARAN
3. Tanbasá mak ita tenke haburas dame iha uma-laran?
3 Kuandu dame iha uma-laran, ida-neʼe fasil liu ba família atu simu lia-loos. (Lee Tiago 3:18.) Tan neʼe, ita tenke hakaʼas an atu haburas dame iha uma-laran maski ita-nia família seidauk adora Jeová. Oinsá mak ita bele halo ida-neʼe?
4. Oinsá mak ema kristaun bele sente dame iha laran?
4 Nuʼudar ema kristaun, ita presiza sente dame no hakmatek nafatin iha ita-nia laran. Atu sente hanesan neʼe, ita presiza halo orasaun hodi husu dame husi Maromak. (Flp 4:6, 7) Ita mós presiza aprende liután kona-ba Jeová no moris tuir matadalan husi Bíblia atu sente haksolok no dame. (Isa 54:13) Ita mós presiza hola parte iha reuniaun kristaun no serbisu haklaken ho badinas. Maski ema kristaun balu iha kaben neʼebé fiar la hanesan, maibé sira bele buka dalan oioin atu halo buat hirak-neʼe. Porezemplu, irmán Enza, * neʼebé ninia laʼen kontra lia-loos hodi halo violénsia ba nia, antes atu bá haklaken, nia sempre halo hotu serbisu uma-laran. Irmán Enza hatete: “Jeová sempre fó bensaun barak ba haʼu-nia hakaʼas-an atu haklaken no ajuda haʼu atu hetan rezultadu neʼebé diʼak.” Bensaun hanesan neʼe halo nia sente dame no haksolok iha laran.
5. Dala ruma susar atu halo saida? Saida mak bele ajuda ita?
5 Ita presiza hakaʼas an atu haburas dame ho ita-nia família neʼebé fiar la hanesan. Maibé, dala ruma susar atu halo ida-neʼe, liuliu kuandu sira hakarak ita atu halo buat neʼebé la tuir matadalan husi Bíblia. Maski sira balu sai hirus kuandu ita kaer metin ba lia-loos, maibé ita labele husik ida-neʼe atu hapara ita halo buat neʼebé loos. Se ita hakaʼas an nafatin, ikusmai ita bele iha dame iha família laran. Klaru katak ita bele hamenus problema hodi halo tuir família nia hakarak neʼebé la kontra Bíblia nia matadalan. (Lee Provérbios 16:7. *) Se problema ruma mosu, ita presiza buka konsellu husi Bíblia hodi buka informasaun iha ita-nia livru sira husi atan laran-metin no matenek no mós hodi husu katuas sira.—Prov 11:14.
6, 7. (a) Tanbasá mak ema balu lakohi sira-nia kaben atu estuda Bíblia ho Testemuña ba Jeová? (b) Sira neʼebé estuda Bíblia ka sai ona Testemuña bele halo saida?
6 Atu haburas dame iha uma-laran, ita presiza tau fiar ba Jeová no buka atu komprende oinsá ita-nia família sente. (Prov 16:20) Ema neʼebé foin komesa estuda Bíblia mós bele halo nuneʼe. Ema balu la kontra sira-nia kaben atu estuda Bíblia, no iha mós ema neʼebé hatete katak estuda Bíblia lori buat diʼak ba família. Maibé, iha mós ema balu neʼebé fó susar ba sira-nia kaben. Irmán Ester, neʼebé ikusmai sai Testemuña, nia hatete katak kuandu ninia laʼen foin komesa estuda Bíblia ho Testemuña ba Jeová, nia hirus tebes. Irmán neʼe hatete: “Haʼu soe no sunu ninia livru sira.” Irmaun Howard mós uluk kontra ninia feen neʼebé komesa estuda Bíblia. Nia dehan katak laʼen barak taʼuk tanba sira hanoin katak grupu fanátiku husi relijiaun ruma mak dada sira-nia feen hodi lohi sira. Nia mós dehan katak laʼen balu sai hirus no fó susar ba sira-nia feen tanba sira hanoin katak sira tenke salva sira-nia feen husi perigu.
7 Se estudante Bíblia ida nia kaben kontra lia-loos, ita presiza ajuda estudante neʼe atu hatene katak nia la presiza atu para estuda Bíblia. Dala barak, nia bele hadiʼa situasaun neʼe hodi hatudu laran-maus no respeitu ba ninia kaben. (1 Ped 3:15) Howard hatete: “Haʼu kontente tanba haʼu-nia feen kalma nafatin no la kontra hasoru fali haʼu!” Ninia feen hatete: “Howard haruka haʼu atu para estuda Bíblia. Nia dehan katak Testemuña sira lohi haʼu. Duké diskute malu, haʼu dehan ba nia katak karik nia mak loos, maibé haʼu mós hatete katak haʼu la hetan buat ida neʼebé hatudu katak sira lohi haʼu. Depois, haʼu husu nia atu lee livru neʼebé haʼu estuda. Nia lee no nia la bele hetan buat ida neʼebé nia la simu. Ida-neʼe book duni ninia laran.” Dala ruma, kuandu estudante Bíblia ka Testemuña ida bá reuniaun ka haklaken, ninia kaben neʼebé seidauk iha lia-loos sente mesak ka taʼuk katak ninia moris kaben nian sei naksobu. Tan neʼe, sira neʼebé estuda Bíblia ka sai ona Testemuña presiza koʼalia ho laran-diʼak ba sira-nia kaben atu sira labele sente hanesan neʼe.
AJUDA SIRA ATU SIMU LIA-LOOS
8. Konsellu saida mak apóstolu Paulo fó ba ema kristaun neʼebé sira-nia kaben fiar la hanesan?
8 Apóstolu Paulo fó konsellu ba ema kristaun atu labele husik sira-nia kaben tanba deʼit sira-nia kaben fiar la hanesan. * (Lee 1 Korinto 7:12-16.) Se ema kristaun ida hanoin katak loron ida ninia kaben mós bele simu lia-loos, ida-neʼe ajuda nia atu kontente nafatin. Maibé, nia presiza kuidadu kona-ba dalan neʼebé nia ajuda ninia kaben atu hatene lia-loos. Mai ita haree esperiénsia balu kona-ba ida-neʼe.
9. Iha dalan saida mak ita presiza koʼalia kona-ba Bíblia ba ita-nia família?
9 Kuandu irmaun Jason foin aprende lia-loos, nia sente kontente tebes. Nia hatete: “Haʼu hakarak koʼalia kona-ba lia-loos ba ema hotu!” Kuandu estudante Bíblia ida haree katak buat neʼebé nia aprende mak lia-loos, karik nia sente kontente no hakarak koʼalia kona-ba Bíblia iha tempu hotu, no karik nia hanoin katak ninia família mós sei simu kedas lia-loos neʼe, maibé dala ruma família la simu. Porezemplu, Jason nia feen sente oinsá? Nia sente katak Jason nunka para atu koʼalia kona-ba Bíblia. Irmán ida seluk, neʼebé ikusmai simu lia-loos tinan 18 depois ninia laʼen simu uluk, nia hatete: “Haʼu presiza tempu atu aprende lia-loos neineik-neineik.” Se ita halaʼo estudu ho ema neʼebé sira-nia kaben seidauk simu lia-loos, diʼak atu hatudu oinsá mak sira bele esplika lia-loos iha dalan neʼebé hatudu laran-diʼak. Moisés hatete: “Haʼu-nia hanorin sei tun hanesan udan, haʼu-nia liafuan sei turuk hanesan mahon-been, hanesan udan piska tun ba duʼut leten.” (Deut 32:2) Sin, kuandu ita koʼalia kona-ba lia-loos, diʼak liu atu koʼalia liafuan balu deʼit iha tempu neʼebé loos duké koʼalia barak hanesan udan boot.
10-12. (a) Pedro fó konsellu saida ba ema kristaun neʼebé sira-nia kaben fiar la hanesan? (b) Oinsá mak feto ida neʼebé estuda Bíblia aprende atu halo tuir konsellu iha 1 Pedro 3:1, 2?
10 Maromak leno apóstolu Pedro atu fó konsellu diʼak ba feto kristaun neʼebé sira-nia laʼen fiar la hanesan, hodi dehan: “Imi rona imi-nia kaben bá; atu imi bele lori sira balun mai neʼebé la halo tuir liafuan, laʼós tanba liafuan ruma, maibé ho sira feen nia hahalok, wainhira sira haree imi-nia hahalok santu no momoos.” (1 Ped 3:1, 2) Hodi haraik an no hatudu respeitu ba sira-nia laʼen, feen sira bele ajuda sira-nia laʼen atu simu lia-loos maski laʼen balu fó susar ba sira. Nuneʼe mós, laʼen kristaun presiza hatudu hahalok diʼak neʼebé tuir Maromak nia hakarak no halaʼo sira-nia knaar nuʼudar família nia ulun iha dalan neʼebé hatudu domin maski sira-nia feen kontra lia-loos.—1 Ped 3:7-9.
11 Ohin loron, ema kristaun barak halo tuir Pedro nia konsellu neʼe no hetan rezultadu diʼak. Porezemplu, irmán Selma, kuandu nia komesa estuda Bíblia ho Testemuña ba Jeová, ninia laʼen, naran Steve, la kontente. Steve hatete katak iha tempu neʼebá nia sai hirus, laran-moras, no taʼuk. Selma hatete katak horiuluk kedas, nia tenke kuidadu tebes atu Steve labele hirus tanba nia mak ema siʼak-teen. Selma dehan: “Kuandu haʼu komesa estuda Bíblia, Steve nia hahalok sai aat liután.” Saida mak ajuda atu situasaun neʼe sai diʼak liután?
12 Selma hanoin-hetan oinsá nia hetan ajuda husi irmán neʼebé estuda ho nia. Nia dehan: “Iha loron ida neʼebé haʼu atu estuda Bíblia, haʼu sente katak haʼu la bele. Tanba kalan antes neʼe, Steve baku haʼu kuandu haʼu koko atu hatete katak haʼu mak loos, no haʼu sente triste. Kuandu haʼu konta ba irmán kona-ba saida mak akontese ba haʼu no oinsá haʼu sente, nia husu haʼu atu lee 1 Korinto 13:4-7. Haʼu lee no hatete: ‘Steve nunka hatudu hahalok diʼak hanesan neʼe mai haʼu.’ Maibé irmán neʼe ajuda haʼu atu troka haʼu-nia hanoin hodi husu: ‘Husi hahalok sira neʼebé temi iha eskritura neʼe, Ita hatudu hahalok saida ba Ita-nia laʼen?’ Haʼu hatán: ‘Haʼu la hatudu hahalok hanesan neʼe tanba Steve ema neʼebé halo susar mai haʼu atu moris hamutuk.’ Irmán neʼe hatete ho kalma: ‘Selma, sé mak hakaʼas an atu sai ema kristaun? Ita ka Steve?’” Selma komprende katak nia presiza troka ninia hanoin. Nia hatete: “Haʼu halo orasaun ba Jeová atu ajuda haʼu atu hatudu domin liután ba Steve. Neineik-neineik, situasaun iha uma-laran troka.” Liutiha tinan 17, ikusmai Steve mós simu lia-loos.
OINSÁ EMA SELUK BELE AJUDA
13, 14. Oinsá mak ita bele ajuda irmaun-irmán neʼebé sira-nia kaben fiar la hanesan?
13 Hanesan udan-been neʼebé turuk ba rai halo moris ai-horis, ita ida-idak iha kongregasaun bele ajuda no fó ksolok ba ita-nia maluk neʼebé sira-nia kaben fiar la hanesan. Irmán Elvina iha rai-Brazíl hatete: “Domin husi irmaun-irmán sira mak ajuda haʼu atu hamriik metin iha lia-loos.”
14 Kuandu ita hatudu laran-diʼak ba ita-nia maluk nia kaben neʼebé fiar la hanesan, ida-neʼe bele book sira-nia laran. Irmaun ida iha rai-Nijéria, neʼebé ninia feen simu uluk lia-loos no liutiha tinan 13 nia mós simu, nia dehan: “Kuandu haʼu halo viajen ho Testemuña ida, ninia karreta sai aat. Nia buka ajuda husi ninia maluk Testemuña sira neʼebé hela besik iha fatin neʼe, no sira haruka ami toba iha sira-nia uma. Sira tau matan didiʼak mai ami hanesan sira koñese ami husi kiʼik kedas. Haʼu sente kedas domin kristaun neʼebé haʼu-nia feen koʼalia beibeik mai haʼu.” Irmán ida iha rai-Inglaterra, neʼebé ninia laʼen simu uluk lia-loos no liutiha tinan 18 mak nia rasik mós simu, nia dehan: “Testemuña sira konvida ami naʼin-rua atu han. Haʼu sempre sente sira simu haʼu diʼak.” * Irmaun ida, neʼebé mós husi rai-Inglaterra no ikusmai simu lia-loos, nia hatete: “Irmaun-irmán sira vizita ami no konvida ami bá sira-nia uma. Haʼu haree katak sira hatudu domin mai ami. Haʼu haree ida-neʼe liuliu kuandu haʼu baixa iha ospitál no sira barak mai vizita haʼu.” Ita mós bele hatudu laran-diʼak hanesan neʼe ba ita-nia maluk nia kaben neʼebé fiar la hanesan ka lae?
15, 16. Saida deʼit mak ita presiza halo hodi haksolok nafatin maski ita-nia família fiar la hanesan?
15 Klaru katak maski ita halo buat neʼebé loos no fó sasin iha dalan neʼebé diʼak ba tinan barak, ida-neʼe la dehan katak ema hotu iha família laran sei simu lia-loos. Balu la hatudu interese, no balu kontra nafatin. (Mt 10:35-37) Maibé, se ita hatudu hahalok diʼak nuʼudar ema kristaun, ida-neʼe bele lori rezultadu diʼak. Irmaun ida neʼebé ninia feen mak sai Testemuña uluk, nia hatete katak ita la hatene oinsá mak ema neʼebé iha lia-loos nia hahalok diʼak bele book sira-nia kaben nia neon no laran. Nia mós dehan: “Keta lakon esperansa ba ita-nia kaben neʼebé seidauk simu lia-loos.”
16 Maski ita-nia família balu iha uma-laran seidauk iha lia-loos, ita bele haksolok nafatin. Porezemplu, irmán ida hakaʼas an atu fó sasin ba ninia laʼen durante tinan 21, maibé nia seidauk simu lia-loos, irmán neʼe hatete: “Haʼu bele haksolok nafatin hodi hakaʼas an atu halo kontente Jeová, hodi hatudu laran-metin nafatin no hodi hakbesik liután ba nia. Haʼu hakaʼas an atu uza haʼu-nia tempu hodi estuda mesak, tuir reuniaun sira, bá haklaken no ajuda ema seluk iha kongregasaun. Ida-neʼe halo haʼu sente besik liután ho Jeová no laran-metin nafatin ba nia.”—Prov 4:23.
HAKAʼAS AN NAFATIN BÁ!
17, 18. Oinsá mak ita bele haksolok nafatin maski ita-nia família fiar la hanesan?
17 Se ita serbí Jeová maibé ita-nia família lae, ita labele rende an. Hanoin-hetan katak Jeová sei la husik ninia povu. (1 Sam 12:22) Jeová hamutuk ho ita se ita hakbesik nafatin ba nia. (Lee 2 Crônicas 15:2. *) Tan neʼe, haksolok bá hodi aprende liután kona-ba Jeová no “tau fiar ba nia”. (Sal 37:4, 5) Mai ita “la kole atu harohan” hodi fiar katak ita-nia Aman iha lalehan bele ajuda ita atu tahan susar hotu neʼebé ita hasoru.—Rom 12:12.
18 Atu ajuda ita haburas dame iha uma-laran, diʼak atu ita halo orasaun ba Jeová no husu ninia espíritu santu. (Ebr 12:14) Se ita halo nuneʼe, ita-nia hahalok bele book ita-nia família neʼebé fiar la hanesan. Hodi hakaʼas an nafatin atu halo “buat hotu-hotu ba Maromak nia glória”, ita sei sente dame no haksolok iha laran. (1 Kor 10:31) Liután neʼe, ita bele fiar duni katak ita-nia irmaun no irmán sira iha kongregasaun sei hadomi no apoia ita.
[Nota–rodapé]
^ par. 4 Naran sira laʼós naran neʼebé loos.
^ par. 5 Provérbios 16:7: “Kuandu Jeová kontente ho ema ida nia dalan, nia bele halo ninia inimigu sira rasik atu iha dame ho nia.”
^ par. 8 Paulo nia konsellu neʼe la bandu ema kristaun atu haketak malu kuandu sira hasoru situasaun neʼebé susar tebes. Maibé, ida-neʼe desizaun sériu tebes neʼebé ema ida-idak rasik mak tenke halo. Haree livru “Hela Nafatin iha Maromak nia Domin”, pájina 220-221.
^ par. 14 Bíblia la bandu ita atu labele han hamutuk ho ema neʼebé fiar la hanesan.—1 Kor 10:27.
^ par. 17 2 Crônicas 15:2: “Nuneʼe, nia bá hasoru Asa no hatete ba nia: ‘Rona haʼu, oh, Asa, no Judá no Benjamim hotu! Jeová hamutuk ho imi se imi hatudu katak imi hamutuk ho nia; no se imi buka nia, nia sei halo imi hetan nia, maibé se imi husik nia, nia sei husik imi.’”
[Pergunta estudu nian]
[Dezeñu iha pájina 28]
Buka tempu neʼebé diʼak atu esplika kona-ba ita-nia fiar
[Dezeñu iha pájina 29]
Hatudu laran-diʼak ba ita-nia maluk sira-nia kaben neʼebé fiar la hanesan
