Tlan napaxuwakan maski ni lakxtum takanajla kgalhikan
Tlan napaxuwakan maski ni lakxtum takanajla kgalhikan
«Xampi ¿lantla likatsiya wix [...] namalakgtaxtiya [tiku tamakgaxtokga]?» (1 COR. 7:16)
KAPUTSA XTAKGALHTIN:
¿La tlan natlawaya xlakata ni nakgalhiya taʼakglhuwit kminchik?
¿Tuku tlan natlawaya xlakata mi familia nakatsiputun xlakata tuku xaxlikana?
¿La tlan nakamakgtayayaw tiku xfamiliajkan ni xtatayananin Jehová?
1. Akxni chatum tsuku katsini xlakata xaxlikana takanajla, ¿la max nakaʼakxilhkgo xfamilia?
JESÚS kamalakgachalh kstalaninanin namastakgo uma tamakatsin: «Wa xtapakgsin akgapun, talakatsuwinita» (Mat. 10:1, 7). Uma xalakwan tamakatsin xtlawalh pi tlan xlatalalinkgolh chu lu xpaxuwakgolh tiku xkatsinikgolh tuku xaxlikana. Pero Jesús na wanilh kstalaninanin pi makgapitsi ni xlakaskinkgolh natalichuwinan xTamapakgsin Dios (Mat. 10:16-23). Chu xmilh kilhtamaku xfamiliajkan chuna xlikatsikgolh chu uma tlakg nitlan xlimakgkatsikgolh (kalikgalhtawakga Mateo 10:34-36).
2. ¿Tuku xlakata tlan napaxuwayaw maski kifamiliajkan ni watiya takanajla kgalhikgo?
2 ¿Wamputun uma pi xtatayananin Jehová nila napaxuwakgo komo katawilakgolh xfamiliajkan tiku ni watiya takanajla kgalhikgo? ¡Ni! Xlikana pi makgapitsi lu kasitsinikan pero ni putum chuna kalikatsinikan. Chu ni putum kilhtamaku kasitsinikan. Wa xlakata, ¿tuku nakinkamakgtayayan napaxuwayaw maski nakinkaputsastalanikanan chu ni nalakgatikgo tuku katsinimaw kifamiliajkan? Akinin tlan napaxuwayaw komo ni nasitsiyaw maski kifamiliajkan nakinkasitsinikgoyan o ni katsiputunkgo xlakata Dios. Chu maski lu tuwa tuku titaxtumaw, komo ni namakgxtakgaw Jehová, xla nakinkasikulunatlawayan chu napaxuwayaw. Chuna la naʼakxilhaw, pulaktiy tuku namakgtaya kstalanina Cristo tlakg napaxuwa: 1) tlan nakatalalin tiku wilakgolh kxchik chu 2) chuntiyaku nakawani xfamilia tiku ni kanajlakgo xlakata namakglhtinankgo xaxlikana takanajla.
NI KAKGALHI TAʼAKGLHUWIT KMINCHIK
3. ¿Tuku xlakata lu naputsayaw tlan nalatalalinaw kfamilia?
3 Xlakata kifamiliajkan natsukukgo katsinikgo tuku xaʼakgstitum, talakaskin tlan nakatalalinaw (kalikgalhtawakga Santiago 3:18). Komo kifamiliajkan nina wi kxaxlikana takanajla, talakaskin ni nakatakgalhiyaw taʼakglhuwit. ¿La tlan chuna natlawayaw?
4. ¿Tuku tlan natlawayaw xlakata chuntiya tlan namakgkatsiyaw?
4 Akinin kstalaninanin Cristo talakaskin ni nasitsiyaw. Wa xlakata lu natlawayaw oración, chuna namakglhtinanaw «xtatanksni [o tlan nakinkamamakgkatsiniyan] Dios» (Fili. 4:6, 7). Nachuna tlan namakgkatsiyaw chu napaxuwayaw katsinimaw xlakata Jehová chu namakgantaxtiyaw, xtastakyaw Biblia kkilatamatkan (Isa. 54:13). Chu nachuna makgkatsiyaw akxni mastayaw comentarios ktamakxtumit, chu akxni lichuwinanaw Dios. Lhuwa tiku tawilakgolh xfamiliajkan tiku ni xtatayananin Jehová putsakgo la natlawakgo xlakata naskujnanikgo Dios. Xchixku Enza, * ni lakgati nakgalhtawakga, pero xla an masiya tuku wan Biblia akxni tlawakgonita xtaskujut kxchik. Enza wan: «Xlakata Jehová kisikulunatlawa, putum kilhtamaku kan lichuwinan Dios chu tlan kinkitaxtuni». Wa xlakata lu tlan makgkatsi chu lu paxuwa.
5. ¿Tukuya taʼakglhuwit kgalhikgo tiku xfamilia ni kgalhtawakga chu tuku nakamakgtaya?
5 Lu xlakaskinka ni nakatakgalhiyaw taʼakglhuwit kifamiliajkan tiku ni kstalaninanin Cristo. Min kilhtamaku tuwa, xlakata nalakaskinkgo katlawaw tuku wan Biblia pi ni kilitlawatkan. Max makgapitsi lu nasitsikgo akxni naʼakxilhkgo pi ni lakatsalayaw tuku wan Biblia, pero komo tlan nakatalalinaw, alistalh nialh katisitsikgolh. Pero komo tuku kinkamatlawiputunkgoyan ni lakatsala tuku wan Biblia, tlan natlawayaw chu chuna ni nakatakgalhiyaw taʼakglhuwit (kalikgalhtawakga Proverbios 16:7). Akxni nakgalhiyaw tuwa taʼakglhuwit kaputsaw xtastakyaw lakgkgolotsin chu likgalhtawakga nema tlawakgo skujni xalipaw chu xaskgalala (Pro. 11:14).
6, 7. 1) ¿Tuku xlakata makgapitsi ni lakaskinkgo pi xfamilia nakatakgalhtawakgakgo xtatayananin Jehová? 2) ¿Tuku xlitlawat tiku kgalhtawakgama o chatum xtatayana Jehová akxni xfamilia ni lakaskin nakgalhtawakga?
6 Xlakata ni naʼanan taʼakglhuwit, nalipawanaw Jehová chu naʼakgatekgsaw la makgkatsikgo kifamiliajkan tiku ni kstalaninanin Cristo (Pro. 16:20). Nachuna xlitlawatkan tiku aku tsukukgolh kgalhtawakgakgo. Makgapitsi ni lisitsikgo pi xpuskat o xchixku nakgalhtawakga, chu asta akxilhkgo pi kamakgtaya familia. Pero wilakgolh tiku ni lakgatikgo. Esther tiku la uku xtatayana Jehová, wan pi «lu sitsilh» akxni xchixku tsukulh katakgalhtawakga xtatayananin Jehová. Xla wan: «Makgapitsi likgalhtawakga kkamakgalh, chu amakgapitsi kkalhkuyulh». Howard tiku pulana ni xlakaskin pi xpuskat nakgalhtawakga wan: «Lhuwa lakchixkuwin pekuankgo pi xpuskatkan kaʼakgchipama akgtum lipekua takanajla. Chu xlakata chuna lakpuwankgo, ni katsikgo tuku natlawakgo wata lu sitsikgo».
7 Komo tiku makgalhtawakgamaw sitsinikan, ¿la tlan namakgtayayaw? Kiliwanitkan pi ni talakaskin namakgxtakga takgalhtawakga. Max tiku tamakgaxtokga nalakgpali la likatsi komo tlan nalikatsinikan chu namaxkikan kakni (1 Ped. 3:15). Howard wan: «Kpaxtikatsini kin puskat pi ni lu sitsilh». Chu xpuskat wan: «Kiwanilh pi nialh xakkgalhtawakgalh. Howard xlakpuwan pi kaj xkiʼakgskgawimaka. Maski tuwa kmakgkatsilh ni ktalakgalhtilh, chu xwanilh pi max xlikana tuku xkiwanima, pero akit nichuna xakakxilha. Kwanilh pi xlikgalhtawakgalh libro nema xaklikgalhtawakgama. Chu akxni likgalhtawakgalh nialhtu wa chu kaks lilakawa». Na kilikatsitkat pi xachixku o xapuskat tiku ni kgalhtawakga namakgkatsi pi makgxtakgmaka o nalakgsitsi akxni tiku tamakgaxtokga an lichuwinan Dios. Akxni limasiyanikan pi paxkikan chu tlan tachuwinankan natlawa pi nialh lu napekuan.
KAKAMAKGTAYA NATANUKGO KXAXLIKANA TAKANAJLA
8. ¿Tuku wani Pablo kstalanina Cristo tiku tamakgaxtokga chatum tiku ni kanajla?
8 Apóstol Pablo wani kstalanina Cristo pi ni xlimakgxtakgat tiku tawi kaj xlakata ni lakxtum xtakanajlakan (kalikgalhtawakga 1 Corintios 7:12-16). * Nachuna kalakpuwanti pi max na natsuku kgalhtawakga alistalh chu uma natlawa pi wix napaxuwaya. Pero maski tlan nawaniya tiku tamakgaxtokga tuku wan Biblia, kuenta militlawat. Kalichuwinaw tuku chuna limasiya.
9. ¿Tuku kuenta kilitlawatkan akxni nakalitachuwinanaw Biblia kifamiliajkan nema ni kanajlakgo?
9 Akxni tiku kgalhtawakgamakgolh, katsikgo pi tekgskgonit tuku xaxlikana, lu lipaxuwakgo chu max tantaku lichuwinamputunkgo tuku katsinimakgolh chu lakaskinkgo pi xfamiliajkan na lakapala natsukukgo kgalhtawakgakgolh. Chuna titaxtulh Fred. Xla wan: «¡Xakkawaniputun putum latamanin!». Pero ni putum kilhtamaku chuna kitaxtu. Xpuskat Fred wan: «Nialh xakkatsi tuku naktlawa». Atanu liʼakxilhtit wa xla chatum puskat tiku xchixku tsukulh kgalhtawakga pero titaxtulh akgkutsayan kata chu aku tsukulh kgalhtawakga. Xla wan: «Tsinu tsinu ktsukulh kʼakgatekgsa». Komo takgalhtawakgamaw tiku tamakgaxtokga tiku ni katsiputun xlakata xaxlikana takanajla, ¿tlan xmasiyani la tlan nakgalhti tiku tamakgaxtokga? Moisés wa: «La sen slankg slankg natakta tuku nakkamasiyaniyan, kintachuwin la monkgana natakta, la akxni xwayaj min sen xʼakgspun tuwan chu la akxni kaj lakapala senan xaʼakgspun tuwan» (Deu. 32:2). Akxni kaj tsinu nalichuwinana xlakata tuku xaxlikana akxni namatlaniya tlakg namakgtayanan nixawa lhuwa nalichuwinana Dios.
10-12. 1) ¿Tuku tastakyaw kamaxkilh Pedro kstalaninanin Cristo tiku tamakgaxtokgko tiku ni xtatayana Jehová? 2) ¿La katsinilh chatum tiku aku xkgalhtawakgama namakgantaxti tuku wan 1 Pedro 3:1, 2?
10 Dios malakpuwanilh Pedro xkamaxkilh uma tastakyaw tiku xtamakgaxtokgkgo tiku ni xtatayana Jehová: «Kalakgachixkuwilitit minchixkukan lakimpi maski xlakan ni kanajlakgoy wantu wan xtachiwin Dios kaj kumu naʼukxilhkgoy lantla wixin kgalhakgaxpatnanatit xlakan na natsukukgoy lipawankgoy Dios maski ni kalitakgalhchiwinanatit, wampi wata xman naukxilhkgoy tlan mintatlawkan, chu lantla akgstitum wixin lapatit xlakatin Dios, chu nitu kgalhakgaxpatmakganampatit» (1 Ped. 3:1, 2). Tala puskat max natlawa pi xchixku na nakanajla tuku xaxlikana komo lu maxki kakani maski xchixku ni lu tlan likatsini chu ni lu paxki. Nachuna tala tiku xpuskat ni xtatayana Jehová lu tlan nalikatsini maski xpuskat ni katsiputun xlakata Dios (1 Ped. 3:7-9).
11 Lhuwa natalan xala uku akxilhkgonit pi lu tlan kitaxtu akxni makgantaxtikan xtastakyaw Pedro. Kalichuwinaw Selma. Xchixku Steve, lu litsilh akxni tsukulh katakgalhtawakga xtatayananin Jehová. Steve wan pi «xlisitsi, chu xmakgkatsi pi xmakglhtimaka xpuskat». Selma wan: «Asta akxni nina xakkgalhtawakga tuwa xakmakgkatsi pi xaktawi. Xtalakaskin pi ni tunkun xaksitsilh xlakata xla lu xasitsin xwanit. Chu akxni ktsukulh kgalhtawakga tlakg xasitsin wa». ¿Tuku tlawalh Selma?
12 Makgtayalh tuku masiyanilh tala tiku xmakgalhtawakgama, xla wan: «Akgtum kilhtamaku ni xakkgalhtawakgaputun. Xlakata tsisni nema aku xtitaxtunit xaktalakilhninit Steve, xla lu kisitsinilh wa xlakata xaklipuwan chu nitlan xakmakgkatsi. Kwanilh tala putum tuku kiʼakgspulalh, chu xla kiwanilh naklikgalhtawakga 1 Corintios 13:4-7. Klakapastakaku pi kwanilh: “Steve nikxni tlan kilikatsini chuna la wan unu”. Tala kintlawanilh uma takgalhskinin: “Chu wix, ¿tlan likatsiniya chuna la wan unu?”. Kwanilh pi ni, tuwa xakmakgkatsi xlakata xasitsin xwanit. Chu xla lu tlan la kiwanilh: “Selma, ¿tiku katsinimaja xtatayana Cristo nawan? ¿Steve, o wix?”. Chu kʼakgatekgsli pi xtalakaskin naklakgpali kintalakapastakni. Kskinilh Jehová kakimakgtayalh tlakg xakpaxkilh kinchixku. Tsinu tsinu tlakg talakgpalitilhalh». Chu titaxtulh akgkutujun kata, Steve na tsukulh kgalhtawakga.
LA TLAN NAMAKGTAYANANAW
13, 14. ¿La tlan nakamakgtayayaw natalan tiku katawilakgolh xfamilia tiku ni kgalhtawakgakgo?
13 La akxni swayaj min sen chu makastaja katiyatni chu stakkgo laktsu kiwi, akxni tlan kalikatsinikgo natalan xalak congregación tiku tamakgaxtokgkgo tiku ni kgalhtawakga tlakg tlan makgkatsikgo. Elvina, xalak Brasil wan: «Tliwakga kwi kxaxlikana takanajla xlakata kinatalan kilimasiyanikgo pi kimpaxkikgo».
14 Pero akxni tlan likatsiyaw chu limasiyayaw pi paxkinanaw, na kamakgtaya xfamiliajkan. Chuna limasiya tuku lalh xlakata chatum tala xalak Nigeria tiku tsukulh kgalhtawakga akxni xtitaxtunita akgkututu kata akxni tsukulh kgalhtawakga xpuskat. Uma tala wan: «Makgtum xaktaʼan chatum xtatayana Jehová. Kaj xalan talakgalhilh xputlaw, alh kaputsa xtatayananin Jehová kkachikin nema tlakg lakatsu xwi. Kinkawanikgon natamakgxtakgaw kxchikkan chu tlan kinkalikatsinikgon xtachuna makgasa xkinkalakgapaskgoyan. ¡Wa tapaxkit nema kimpuskat xkilitachuwinanit!». Anta kʼInglaterra chatum puskat kstalanina Cristo wa akxni xtitaxtunita akgkutsayan kata akxni xchixku kstalanina Cristo xwanita, xla wan: «Xtatayananin Jehová kinchatiykan makglhuwa xkinkatawayankgoyan xchikkan. Lu tlan xkinkamamakgkatsinikgoyan». Nachuna titaxtulh chatum chixku tiku xtatayana Jehová xpuskat, uma tuku wa: «Natalan xminkgo kkinchikkan chu na xkinkawanikgoyan nakanaw kxchikkan. Kinkalimasiyanikgon pi xlakaskinka xkinkaʼakxilhkgoyan, chuna limasiyakgolh akxni xakwi khospital, lhuwa kilakgapaxialhnankgolh». Xlikana putum akinin tlan namakgtayananaw maski kaj tsinu akxni kalimasiyaniyaw pi lu xlakaskinka kaʼakxilhaw xfamilia kinatalankan tiku ni kgalhtawakgakgo.
15, 16. ¿La tlan napaxuwakgo tiku xfamiliajkan ni kstalaninanin Cristo?
15 Pero na kilikatsitkan pi maski akglhuwa kata akgstitum nalinkgo xlatamatkan chu liwana nakawanikgo tuku kanajlakgo, ni putum xfamiliajkan, tiku tamakgaxtokgko, xkamanan, xnatlatnikan o atanu, natanukgo xaxlikana takanajla. Max nikxni nakatsiputunkgo chu chuntiyaku nalisitsikgo (Mat. 10:35-37). Maski chuna, talakaskin chuntiya tlan nakalikatsinikan. Chatum chixku tiku xpuskat pulana xtatayana Jehová litaxtulh, chuna wan: «Akxni limasiyayaw tayat xla kstalanina Cristo, ni katsiyaw tuku max nalakapastakkgo tiku tamakgaxtokgaw. Chuntiyaku kalitachuwinaw».
16 Pero, maski kifamiliajkan ni natanu kxaxlikana takanajla tlan napaxuwayaw. Chatum tala tiku puxamatum kata makgtayama xchixku nakgaxmata xlakata tamakatsin xla Tamapakgsin pero nitu lakaskin. ¿La makgkatsi? «Chuntiyaku kpaxuwa xlakata kmakgapaxuwana Jehová, ni kmakgxtakga chu kmatliwakglha kintakanajla. Klakpuwama la nakskujni Dios, nakan ktamakxtumit, naklichuwinan Dios chu nakkamakgtaya kinatalan. Chuna kkuentajtlawa kinaku chu kmakgkatsi pi tlakg ktalakatsuwininit Jehová.» (Pro. 4:23.)
¡NI KATAMAKGXTAKGTI!
17, 18. ¿Tuku namakgtaya kstalanina Cristo xlakata nalakpuwan pi kfamilia max alistalh naskujnikgo Jehová?
17 Komo wix akstu skujnipat Jehová chu mi familia ni, ni kaxlajwananti. Kalakapastakti «Jehová ni katimakgxtakgli xkachikin xlakata xtukuwani lanka» (1 Sam. 12:22). Anta kminpaxtun natawila komo wix ni namakgxtakga (kalikgalhtawakga 2 Crónicas 15:2). Kamakgantaxti uma tastakyaw «kapaxki [Jehová], [...] kalipawanti, kakanajla xlakata namakgtayayan, y naʼakxilha la natlawaj» (Sal. 37:4, 5). Putum kilhtamaku katlawa oración chu kakanajla pi mintlat xalak kʼakgapun namakgtayayan maski tuwa tuku natitaxtuya (Rom. 12:12).
18 Kaskini Jehová kamaxkin xʼespíritu xlakata ni nakgalhiya taʼakglhuwit kminchik (Heb. 12:14). Max namin kilhtamaku mi familia natsukukgo kgalhtawakgakgo. Akxni natlawaya «xlipaks lantla nalimaxkiya nkakni Dios», napaxuwaya chu tlan namakgkatsiya (1 Cor. 10:31). Kalakapastakti pi minatalan xlikalanka kakilhtamaku paxkikgoyan chu namakgtayakgoyan.
[Notas nema wilakgo kpágina]
^ párr. 4 Talakgpalikgonit tukuwani.
^ párr. 8 Uma tastakyaw ni kilhchanima pi chatum kstalanina Cristo nila nalakxtlawa xtamakgaxtokgat kxlakatin pumapakgsin akxni lu xlikana kalipekua wi xlatamat. Tlakg natekgsa xlakata uma kpáginas 220 chu 221 xla libro «Katamakgxtakgtit kxtapaxkit Dios».
[Takgalhskinin]
[Dibujo xla página 30]
Kaputsa akxni tlan nalichuwinan mintakanajla
[Dibujo xla página 31]
Xlakaskinka kakaʼakxilhwi xchixkukan o xpuskatkan kinatalankan
