Yu Inap Stap Amamas Maski Famili i No Wanbel Long Lotu

“Yu no save, ating yu inap helpim [poroman marit] bilong yu i kamap Kristen.” —1 KOR. 7:16.

YU INAP PAINIM BEKIM?

Ol Kristen i ken mekim wanem na bai bel isi i ken i stap insait long famili i no wanbel long lotu?

Olsem wanem wanpela Kristen i ken helpim famili bilong em long kisim tok i tru?

Yumi ken mekim wanem bilong helpim wanbilip husat i stap insait long famili i no wanbel long lotu?

1. Taim wanpela i kisim tok i tru, dispela inap mekim wanem long famili bilong en?

 JISAS i salim ol aposel bilong em i go na em i tokim ol: “Yupela go na autim tok olsem, ‘Kingdom bilong heven i kam klostu pinis.’” (Mat. 10:1, 7) Dispela gutnius bai givim bel isi na amamas long ol man husat i wanbel long en. Tasol Jisas i tok lukaut long ol aposel olsem planti man bai birua long wok autim tok bilong ol. (Mat. 10:16-23) Na i hatwok moa yet taim famili i birua.—Ritim Matyu 10:34-36.

2. Olsem wanem yumi inap i stap amamas maski famili bilong yumi i no insait long tok i tru?

² Yu ting dispela i makim olsem sapos famili i no insait long tok i tru yu no inap stap amamas? Nogat. Famili bilong sampela Kristen i birua tru long ol, tasol i no olgeta famili i mekim olsem. Na tu, ating famili i no inap mekim pasin birua inap oltaim oltaim. Tasol maski wanem samting i painim yumi, yumi inap i stap amamas sapos yumi bihainim stretpela pasin taim ol wanblut i biruaim yumi o taim ol i no laik harim tok i tru. Na tu, Jehova i save helpim ol man i stap gut long em long i stap amamas maski ol i karim hevi. Ol Kristen inap amamas moa sapos ol i (1) wok strong long kamapim bel isi insait long famili, na (2) wok strong long helpim ol wanfamili long kisim tok i tru.

KAMAPIM BEL ISI INSAIT LONG FAMILI

3. Bilong wanem wanpela Kristen i mas wok strong long kamapim bel isi insait long famili?

³ Em bai isi moa long famili i kisim tok i tru sapos bel isi i stap. (Ritim Jems 3:18.) Maski famili i no lotuim Jehova, Kristen i mas wok strong long kamapim bel isi insait long famili. Olsem wanem em inap mekim?

4. Olsem wanem yumi inap i stap bel isi?

⁴ Yumi yet mas stap bel isi. Bilong mekim olsem,  yumi mas beten long kisim “dispela bel isi bilong God i winim tru tingting bilong man.” (Fili. 4:6, 7) Yumi kisim amamas na bel isi taim yumi lain long Jehova na yumi bihainim ol stiatok i kam long Baibel. (Ais. 54:13) Na tu, yumi mas insait long ol miting bilong kongrigesen na givim bel long autim tok. Ol lain husat i stap insait long famili i no wanbel long lotu inap painim rot we ol i ken mekim ol dispela bikpela samting. Olsem, Enza, a wanpela sista em man bilong en i birua nogut tru long tok i tru. Em i save mekim wok autim tok bihain long em i pinisim ol wok bilong em long haus. Enza i tok, “Taim mi yusim strong bilong mi long autim tok, Jehova i save blesim mi na gutpela samting i kamap.” Ol dispela blesing i mekim em i stap bel isi, belgut, na amamas.

5. Wanem samting inap givim hatwok long ol Kristen em famili bilong ol i no stap insait long tok i tru? Ol inap kisim helpim we?

⁵ Yumi mas wok strong bilong i stap wanbel wantaim ol wanfamili husat i no stap long tok i tru. Sampela taim dispela bai hatwok bikos ol bai i gat laik long yumi mekim sampela samting i pait wantaim ol stiatok bilong Baibel. Ating sampela long famili husat i no insait long tok i tru bai kros taim yumi strong long bihainim ol tok bilong Baibel. Tasol dispela i no ken pasim yumi long bihainim stretpela pasin. Sapos yumi wok strong, orait ating bihain bel isi bai stap insait long famili. Na yumi traim bes bilong yumi long wanbel wantaim famili long ol samting ol i laik mekim i no pait wantaim ol stiatok bilong Baibel. Long dispela rot yumi no tok kros long ol samting nating. (Ritim Sindaun 16:7.) Taim hevi i kamap, em bikpela samting long painim gutpela tok bilong Baibel bilong helpim yumi. Yumi kisim dispela tok long ol buk na nius em gutpela wokboi i gat savetingting i kamapim na ol tok i kam long ol elda.—Snd. 11:14.

6, 7. (a) Bilong wanem sampela i save birua taim wanfamili i kirap stadi wantaim ol Witnes Bilong Jehova? (b) Baibel sumatin o Witnes i ken mekim wanem sapos wanfamili i birua long em?

⁶ Bel isi inap stap insait long famili sapos yumi trastim Jehova na wok strong long pilim tingting bilong ol wanfamili. (Snd. 16:20) Ol nupela Baibel sumatin tu inap wok strong olsem. Ating sampela man marit o meri marit i no inap birua long poroman marit sapos ol i stadi long Baibel. Ol inap tok olsem dispela samting bai helpim gut famili. Tasol sampela arapela inap birua tru. Esther, husat nau em i wanpela Witnes, i tok olsem em i belhat nogut tru taim man bilong en i kirap stadi wantaim ol Witnes Bilong Jehova. Em i tok, “Mi save tromoi o kukim ol buk na nius bilong man bilong mi.” Howard i birua long meri bilong en taim meri i kirap stadi long Baibel. Howard i tok planti man i pret olsem meri bilong ol i joinim wanpela lotu i giamanim ol. Em i tok moa olsem ol man i save wari olsem hevi bai painim meri bilong ol, na dispela i kirapim ol long tok strong na mekim hatpela pasin.

⁷ Sapos poroman marit bilong Baibel sumatin i birua long em, yumi mas helpim sumatin long kliagut olsem em i no gat wok long lusim stadi. Sumatin inap daunim pasin birua sapos em i mekim pasin isi na soim rispek long poroman. (1 Pita 3:15) Howard i tok: “Mi amamas tru meri bilong mi i stap isi na i no kirap kwik long bekim kros bilong mi!” Meri bilong Howard i tok, Howard i strong long mi mas lusim stadi, long wanem, em i ting ol Witnes i wok long giamanim mi. Meri i tok: “Mi no tok pait wantaim em, nogat, mi tokim em olsem ating tok bilong yu i tru, tasol mi tokim em gen olsem mi gat narapela tingting. So mi askim em long ritim dispela  buk mi stadi long en. Em i ritim buk na em i no inap painim rong long tok i stap insait. Dispela i sutim tru bel bilong em.” Tingim, ol poroman marit inap pilim olsem ol i stap wanpis o marit bilong ol i laik bagarap taim poroman i lusim ol na i go long ol miting o long autim tok. Tasol Baibel sumatin o Witnes i mas toktok long poroman long pasin i soim olsem em i tingim na laikim em. Dispela inap mekim na poroman i no tingting planti.

HELPIM OL LONG KISIM TOK I TRU

8. Aposel Pol i givim wanem tok long ol Kristen em poroman marit bilong ol i no wanbilip?

⁸ Aposel Pol i tokim ol Kristen olsem ol i no ken lusim poroman marit husat i no wanbilip. b (Ritim 1 Korin 7:12-16.) Kristen bai stap amamas sapos em i tingim olsem poroman marit bilong em inap kisim tok i tru long bihain. Tasol em i mas was gut long pasin em i mekim bilong helpim poroman long kisimgut tok i tru, olsem ol ekspiriens nau yumi laik stori long en i kamapim.

9. Taim Kristen i laik stori wantaim famili bilong en long tok i tru, em i no ken mekim wanem?

⁹ Jason i amamas tru taim em i kirap lainim tok i tru. Em i tok, “Mi laik autim tok long olgeta man!” Taim Baibel sumatin i luksave olsem ol samting em i lainim long Baibel em i tru, ating em i amamas tru na em i save toktok long dispela samting long olgeta taim. Em bai ting olsem wantu famili bilong em bai kisim tok i tru, tasol ating ol i no wanbel wantaim em. Meri bilong Jason i ting wanem long pasin bilong Jason long amamas tru long tok i tru? Meri i pilim olsem Jason i stori long tok i tru long olgeta taim. Na narapela meri husat i kam insait long tok i tru 18 yia bihain long man bilong en, i tok olsem em i mas lain isi isi long tok i tru. Ating yu stadi wantaim wanpela sumatin na poroman marit bilong en i no laik kisim tok i tru. Em gutpela sapos yu skulim sumatin long pasin bilong stori long tok i tru long pasin we i no sikirapim bel bilong poroman bilong en. Profet Moses i bin tok: “Tok bilong mi bai i mekim gut long yupela olsem ren i kam daun na mekim gras i kamap gutpela.” (Lo 32:2) Sapos long taim stret man i stori liklik long tok i tru, olsem liklik ren i kam daun, dispela bai mekim gutpela wok, winim pasin bilong kamapim planti tok long olgeta taim, olsem tait wara.

10-12. (a) Aposel Pita i givim wanem gutpela tok long ol marit em poroman bilong ol i no Kristen? (b) Olsem wanem wanpela Baibel sumatin i lain long bihainim gutpela tok i stap long 1 Pita 3:1, 2?

¹⁰ God i kirapim aposel Pita long givim sampela gutpela tok long ol meri Kristen em man bilong ol i no Kristen. Em i tok:  “Yupela i mas daun long ol man bilong yupela. Na sapos sampela bilong ol i no save bihainim tok bilong God, orait ol i ken lukim pasin bilong yupela. Na maski yupela i no mekim wanpela tok, ol inap kamap bilipman, long wanem, ol i lukim gutpela pasin bilong yupela na pasin bilong yupela long rispek tru long ol.” (1 Pita 3:1, 2) Sapos meri i gat pasin daun na i soim rispek long man bilong en, maski man i mekim hatpela pasin long em, meri inap helpim em long kisim tok i tru. Na man Kristen i mas bihainim ol pasin God i laikim na mekim wok bos insait long famili wantaim pasin laikim, maski meri bilong en i birua long bilip bilong em.—1 Pita 3:7-9.

¹¹ Planti Kristen long nau i bihainim gutpela tok bilong Pita na dispela i bin helpim ol. Selma em wanpela bilong ol. Taim em i kirap stadi Baibel wantaim ol Witnes Bilong Jehova, man bilong en, Steve, i no amamas. Steve i tok olsem em i belhat, jeles, na pret. Selma i tok paslain long mi kirap stadi, pasin bilong Steve i mekim na i hatwok long stap wantaim em. Selma i mas was gut long olgeta pasin na toktok bilong en. Em i tok Steve i save belhat kwik, na dispela pasin i go nogut moa taim Selma i kirap stadi long Baibel. Wanem samting i helpim tupela?

¹² Selma i tingim skul em i bin kisim long wanpela Witnes husat i bin stadi wantaim em. Em i tok: “Wanpela de, mi no laik mekim Baibel stadi bilong mi. Nait paslain long dispela, mi strong long kamapim klia as bilong wanpela tok na Steve i paitim mi. Olsem na mi bel hevi na sori long mi yet. Mi tokim sista long samting i bin kamap na tingting bilong mi, na em i askim mi long ritim 1 Korin 13:4-7. Taim mi ritim, mi tingting olsem, ‘Steve i no save mekim ol dispela gutpela pasin laikim long mi.’ Tasol sista i kirapim mi long kisim narapela tingting taim em i askim mi, ‘Yu save mekim ol dispela kain pasin laikim long man bilong yu?’ Bekim bilong mi i olsem, ‘Mi no mekim liklik, long wanem, em hatpela man.’ Long pasin isi sista i tok, ‘Selma, husat bilong yutupela i laik kamap Kristen, yu o Steve?’” Selma i luksave olsem em i mas senisim tingting bilong em. Em i tok: “Mi beten askim Jehova long helpim mi long mekim moa yet pasin laikim long Steve. Isi isi ol samting i wok long senis.” Na 17 yia bihain, Steve i kisim tok i tru.

OL SAMTING OL ARAPELA INAP MEKIM

13, 14. Yumi ken mekim wanem bilong helpim ol lain i stap insait long famili i no wanbel long lotu?

¹³ Olsem ol wan wan ren drop i save pundaun isi isi na mekim graun i wet na i helpim ol plaua long gro, yumi wan wan insait long kongrigesen inap helpim ol manmeri husat i stap insait long famili i no wanbel long lotu long i stap amamas. Elvina long Brasil i tok, “Pasin laikim bilong ol  brata na sista Kristen i bin helpim mi long stap strong long tok i tru.”

¹⁴ Taim ol bratasista long kongrigesen i kamapim pasin helpim na pasin bilong tingim man, dispela inap senisim tingting bilong man i no bilip. Wanpela brata long Naijiria husat i kisim tok i tru 13 yia bihain long meri bilong en, em i tok: “Mi raun wantaim wanpela Witnes long kar bilong en na kar i bagarap. Em i go painim ol Witnes long wanpela viles i stap klostu, na ol i singautim mipela long kam slip long haus bilong ol long nait. Ol i mekim gut long mipela olsem ol i bin save long mipela long bipo yet. Wantu, mi pilim pasin laikim Kristen em meri bilong mi i bin stori long en planti taim.” Long Inglan, wanpela sista husat i kisim tok i tru 18 yia bihain long man bilong en, i tok: “Ol Witnes i singautim mitupela long kam kaikai wantaim ol. Na oltaim mi pilim olsem ol i amamas long lukim mi.” c Wanpela man bilong Inglan, bihain em i kamap Witnes, em i tok: “Ol bratasista i bin visitim mipela, o ol i singautim mipela i kam long haus bilong ol, na mi lukim olsem ol i gat pasin bilong tingim narapela. Dispela i stap ples klia taim mi bin slip long haus sik na ol i kam lukim mi.” Olsem wanem? Yu inap mekim wankain pasin long ol famili we wanpela tasol bilong famili i insait long tok i tru?

15, 16. Bilong i stap amamas, ol lain em ol yet tasol i insait long tok i tru i ken mekim wanem?

¹⁵ Maski yumi wokabaut stret na long gutpela pasin yumi autim tok long ol wanfamili inap planti yia, olgeta long famili bai i no kisim tok i tru. Sampela bai les yet long harim na sampela bai i birua yet. (Mat. 10:35-37) Tasol taim yumi kamapim ol gutpela pasin Kristen, gutpela samting inap kamap. Wanpela man, em bin kamap Witnes bihain long meri bilong en, em i tok yumi no inap save ol dispela gutpela pasin Kristen bai mekim wanem long bel na tingting bilong poroman marit i no bilip. Em i tok moa olsem, “No ken givap long poroman i no wanbilip.”

¹⁶ Ol lain em ol wanfamili bilong ol i no kisim tok i tru, ol i ken amamas yet. Wanpela sista i bin autim tok long man bilong en inap 21 yia, tasol em i no kisim tok i tru. Sista i tok pasin bilong mekim ol samting Jehova i laikim, stap gut long em, na wok strong moa long pas gut wantaim em, ol dispela samting i helpim em long stap amamas. Na tu, em i save strong long stadi, go long ol miting, autim tok, na helpim ol arapela long kongrigesen. Dispela i helpim em long go klostu moa long Jehova na stap gut long em.—Snd. 4:23.

NO KEN GIVAP!

17, 18. Wanem samting inap helpim wanpela Kristen husat i stap insait long famili i no wanbel long lotu long no ken givap?

¹⁷ Sapos yu wanpela Kristen husat i stap long famili i no wanbel long lotu, no ken givap. Tingim, Jehova i no save lusim lain bilong em. (1 Sml. 12:22) Sapos yu stap klostu long em, em bai stap wantaim yu. (Ritim 2 Stori 15:2.) Olsem na kisim amamas long pasin bilong lain long Jehova, na “bilip strong long em.” (Sng. 37:4, 5) “Oltaim holim strong pasin bilong beten,” na bilip olsem Papa bilong yumi long heven inap helpim yumi long karim olgeta kain hevi.—Rom 12:12.

¹⁸ Beten long Jehova, na askim em long givim holi spirit long yu na bai bel isi i ken i stap insait long famili. (Hib. 12:14) Sapos yu mekim olsem, ating yu inap stiaim ol wanfamili husat i no insait long tok i tru long bihainim gutpela rot. Bai yu stap amamas na bel isi taim yu “mekim olgeta samting bilong givim glori long God.” (1 Kor. 10:31) Na tu, yu ken save gut olsem ol brata na sista bai laikim yu na givim helpim long yu.

[Ol Futnot]

[Askim Bilong Stadi]

[Piksa long pes 28]

Kamapim bilip bilong yu long taim i stret long mekim

[Piksa long pes 29]

Soim olsem yu tingim poroman marit i no bilip