O Pondola Oku Kuata Esanju Ndaño Vangandiove Vatiamẽla Ketavo Likuavo

“Wa kũlĩha ndati nda o popela [ohueli yove]?”​—1 VA KOR. 7:16.

O TAMBULULA NDATI?

Nye Akristão va sukila oku linga, oco va kuate ombembua la vakuepata liavo vana vatiamẽla ketavo likuavo?

Ukristão o pondola ndati oku kuatisa vangandiaye okuti havakuetavoko oku tava kefendelo liocili?

Nye vamanji vosi va sukila oku linga oco va kuatise Ukristão umue okuti vakuepata liaye vatiamẽla ketavo likuavo?

1. Nda umue o tava oku u kundila esapulo Liusoma, o tatiwa ndati la vangandiaye?

 ETEKE limue, eci Yesu a tuma olondonge viaye kupange woku kunda, wa vi sapuila hati: “Eci vu kasi loku ñuala ñuala, kundi hoti: ‘Usoma wokilu u kasi ocipepi.’” (Mat. 10:1, 7) Olondaka viwa, via ponduile oku nenela ombembua lesanju komanu vana va tava oku va kundila. Pole, Yesu wa lungula ovapostolo vaye hati, omanu valua va laikele oku suvuka upange woku kunda esapulo Liusoma. (Mat. 10:16-23) Olonjanja vimue, elambalalo li tunda ku vangandietu vana okuti, ka va tava oku va kundila esapulo Liusoma.​—Tanga Mateo 10:34-36.

2. Momo lie Ukristão a ponduila oku kuata esanju ndaño vangandiaye vatiamẽla ketavo likuavo?

² Anga hẽ, omunu o kuete vangandiaye vatiamẽla ketavo likuavo, ka pondola oku kuata esanju? O pondola! Ndaño okuti pamue ka ci leluka oku liyaka lelambalalo li tunda ku vangandietu, pole, tu pondola oku yula elambalalo liaco. Momo, elambalalo ka li ka amamako otembo yosi. Ovituwa tu lekisa, ovio vi ecelela nda vangandietu va amamako oku tu lambalala, ale sio. Pole, Yehova o sumũlũisa vana va kakatela kesunga liaye, kuenje, va kuata esanju ndaño va talisiwa ohali. Akristão va pondola oku kuata esanju, nda (1) va likolisilako oku kuata ombembua la vangandiavo, kuenda, (2) nda va likolisilako oku kuatisa vangandiavo oco va tave kefendelo liocili.

TU KUATI OMBEMBUA VEPATA

3. Momo lie Ukristão a sukilila oku sandiliya ombembua nda vangandiaye vatiamẽla ketavo likuavo?

³ Oco vepata mu kale epako liesunga, tu sukila oku likolisilako oku sandiliya ombembua. (Tanga Tiago 3:18.) Nda manji umue o kuete vangandiaye ka va kasi vefendelo liocili, o sukila oku sandiliya ombembua vepata. O ci linga ndati?

4. Akristão va pondola oku kuata ndati ombembua yovutima?

⁴ Akristão va sukila oku kuata ombembua yovutima. Va ci linga poku likutilila lutima wosi, oco va kuate “ombembua ya Suku.” (Va Fil. 4:6, 7) Esanju lombembua, vi tunda koku kũlĩha  Yehova, kuenda oku kapako olonumbi Viovisonehua. (Isa. 54:13) Oku endaenda kolohongele, kuenda kupange woku kunda, ci nena ombembua lesanju. Oku litumbika kupange woku kunda ci kuatisa vamanji vana okuti, vangandiavo Hakristãoko. Tu konomuisi ulandu wa manji Enza a okuti, ulume waye wa temẽle calua. Manji Enza, noke yoku linga ovopange o vonjo, enda kupange woku kunda. Eye wa popia hati: “Yehova wa siata oku sumũlũisa alikolisilo ange oku kundila omanu olondaka viwa Viusoma.” Asumũlũho aco, a nena ombembua lesanju, kuenda onjolela.

5. Nda Ukristão o kuete vangandiaye vatiamẽla ketavo likuavo, o kuata ovitangi vipi, kuenda pi a pondola oku sanga ekuatiso?

⁵ Tu sukila oku likolisilako oku kuata ombembua, kuenda ukamba la vangandietu vana okuti, havakuetavoko. Pole, ka ca lelukile oku ci linga, momo olonjanja vimue, eci tu yongola oku kapako olonumbi Viembimbiliya, ovo va tu patãla. Oku kakatela kolonumbi viesunga pamue ci sumuisa vangandietu vana okuti, havakuetavoko, pole, oku ci linga ci nena ombembua ka yi pui. Kuli ovina vimue ka vi pisiwa Lovisonehua okuti, pamue vi nena olonamalãla. (Tanga Olosapo 16:7.) Omo liaco, poku liyaka lovitangi, tu sukila oku pokola kalungulo a sangiwa valivulu a sandekiwa locisoko cukuenje wa lunguka, loku pinga ekuatiso kakulu vekongelo.​—Olosap. 11:14.

6, 7. (a) Nye ca siata oku vetiya omanu vamue oku lambalala vangandiavo va longisiwa Embimbiliya Lolombangi Via Yehova? (b) Omunu o lilongisa Embimbiliya, o pondola oku yula ndati elambalalo li tunda kepata?

⁶ Oco tu kuate ombembua vepata, tu sukila oku kolela ku Yehova, kuenda oku kuata utate la vangandietu vana okuti, havakuetavoko. (Olosap. 16:20) Vana va fetika ndopo oku lilongisa Embimbiliya, va sukilavo oku lekisa utate ku vangandiavo. Alume lakãi vamue okuti havakuetavoko, ka va siatele oku tateka olohueli viavo oku lilongisa Embimbiliya. Momo va kũlĩha okuti, oku ci linga, ci kuatisa epata oku kuata ovituwa viwa. Pole, kuli omanu vamue va siata oku tateka olohueli viavo oku ci linga. Kũlĩhĩsa ulandu wukãi umue o tukuiwa hati, Ester okuti, cilo wa linga Ombangi ya Yehova. Eci Olombangi Via Yehova via fetika oku longisa Embimbiliya ulume waye, Ester wa “temẽle calua.” Noke, wa amisako hati, “nda enda oku inasi alivulu aye, ale oku a timĩha.” Ulume umue o tukuiwa hati, Howard, okuti kefetikilo wa enda oku lambalala ukãi waye omo lioku lilongisa Embimbiliya, wa popia hati: “Alume valua va kuete ohele yokuti, pamue akãi vavo va yapuisiwa letavo limue ka lia sungulukile. Omo okuti ulume ka kũlĩhĩle esilivilo lioku lilongisa Embimbiliya, pamue o fetika oku tata lãvi ukãi waye.”

⁷ Nda omunu umue wa siata oku lambalaliwa lohueli yaye, tu sukila oku u kuatisa oco a amameko oku lilongisa Embimbiliya. Nda wa lekisa umbombe lesumbilo kohueli yaye okuti hokuetavoko, o ka tẽla oku tetulula ovitangi viaco. (1 Pet. 3:15) Noke, manji Howard wa popia hati: “Ngeca olopandu omo okuti, ukãi wange wa lekisa umbombe, kuenda ka fetuluinyile!” Ukãi waye wa popia hati: “Ulume wange Howard, wa ndi sapuila oco ndi liwekepo oku lilongisa Embimbiliya. Eye wa popia hati, va kasi oku nyõla olondunge viange. Pole, Sia lekisile olonamalãla. Noke, ndo sapuila okuti, oku lilongisa Embimbiliya, ci kuete esilivilo, kuenda ndi yongola oku amamako. Omo liaco, nda sapela laye oco a tange elivulu nda kala oku lilongisa. Eci a tanga elivulu liaco, ka patalẽle ovina a sangamo. Kuenje, wa vetiyiwa calua lovina a tanga.” Tu sukila oku ivaluka okuti, eci manji umue a litumbika kupange wekongelo, ohueli yaye okuti hokuetavoko, pamue yi sima okuti, ya  yandulukiwa. Pole, oku lekisa ocisola kohueli yetu, cu kuatisa oku tula utima.

VA KUATISA OKU TAVA KEFENDELO LIOCILI

8. Elungulo lipi upostolo Paulu a eca Kakristão vana okuti olohueli viavo havakuetavoko?

⁸ Upostolo Paulu, wa lungula Akristão oco ka va ka siepo olohueli viavo vina ka vi fendela Yehova. b (Tanga 1 Va Korindo 7:12-16.) Oku ivaluka okuti, ohueli yina hokuetavoko yi pondola oku kala Ukristão, ci kuatisa ohueli yaye ukuetavo oku amamako lesanju vepata. Ovolandu a kuãimo, a lekisa okuti, tu sukila oku kuata utate poku kuatisa una ka fendela Yehova.

9. Utate upi tu sukila oku kuata poku vangula ovina viatiamẽla Kembimbiliya la vangandietu okuti havakuetavoko?

⁹ Manji Jason poku sokolola esanju a kuata eci a fetika oku lilongisa Embimbiliya, wa popia hati: “Nda yonguile oku sapuila omanu vosi ovina nda kala oku lilongisa!” Nda omunu o fetika oku sola ovina a kasi oku lilongisa Vovisonehua, o kuata esanju lialua, kuenje, otembo yosi o vangula lika ovina viaco. Momo, o yongola okuti, vangandiaye vana okuti havakuetavoko, va tava lonjanga kesapulo Liusoma. Pole, nda ka ci lingi lutate, o kuata ovitangi. Esanju manji Jason a kuata, lia kokela nye ukãi waye? Ukãi waye wa popia hati: “Nda sumuile calua.” Manji ukuavo ukãi okuti, wa tava lika oku lilongisa Embimbiliya noke yoku pita 18 kanyamo tunde eci ulume waye a linga Ukristão, wa popia hati: “Nda sukilile oku kuatisiwa levando poku lilongisa Embimbiliya.” Nda o kasi oku longisa omunu umue Embimbiliya okuti, ohueli yaye ka yi lekisa onjongole yoku kala vefendelo liocili, momo lie ku kuatela utate woku kuatisa omunu waco lovipama via leluka? Uprofeto Mose wa popia hati: “Ovilongua viange vi loke ndatosi ombela. Londaka yange yi loke ndowume.” (Esin. 32:2) Oku vangula olondaka vitito vepuluvi lia sunguluka, ci kuatisa omunu okuti, olondaka vialua viatiamẽla kovina viespiritu ci sule.

10-12. (a) Elungulo lipi upostolo Petulu a eca ku vamanji vana okuti, olohueli viavo havakuetavoko? (b) Ukãi umue wa kala oku lilongisa Embimbiliya wa kapako ndati onumbi yi sangiwa kelivulu lia 1 Petulu 3:1, 2?

¹⁰ Upostolo Petulu, wa vetiyiwa lespiritu, oku lungula akãi Akristão okuti, alume vavo vatiamẽla ketavo likuavo. Eye wa soneha ndoco: “Pokoli ku vaveyene okuti vamue, ndaño ka va tava kondaka, kuenda ndaño ondaka yimosi ka yi popiwa, haimo va kokiwa lovilinga viakãi vavo, eci va mola ovilinga viene viesunga lesumbilo.” (1 Pet. 3:1, 2) Ukãi o pondola oku vetiya veyaye oku tava kefendelo liocili, poku lekisa esumbilo loku pokola kokuaye, ndaño okuti, o talisiwa ohali. Cimuamue haico ulume Ukristão a sukila oku linga, poku  kuata ovituwa via sunguluka, loku lekisa ocisola kukãi waye una okuti, hokuetavoko. O ci lingavo poku kapako ovisimĩlo viukãi waye okuti hokuetavoko, ndaño ukãi waco wa siata oku u lambalala.​—1 Pet. 3:7-9.

¹¹ Koloneke vilo, kuli vamanji valua va limbuka esilivilo lioku kapako elungulo lia Petulu. Kũlĩhĩsa ulandu wa manji umue o tukuiwa hati, Selma. Eci Olombangi Via Yehova via fetika oku u longisa Embimbiliya, ulume waye Steve, ka ci solele. Ulume waco wa popia hati: “Nda kuata onyeño yalua, esepa, lohele yokuti, ukãi wange o ndi siapo.” Manji Selma wa popia hati: “Osimbu sia fetikile oku lilongisa Embimbiliya, ka ca lelukile oku kala kumue lulume wange Steve. Momo, wa temẽle calua. Eci nda fetika oku lilongisa Embimbiliya, onyeño yaye ya li vokiya.” Nye ca va kuatisa?

¹² Manji Selma, ivaluka ombangulo yimue a kuata la manji wa kala oku u longisa Embimbiliya. Eye wa popia hati: “Eteke limue, nda sapela la manji yaco okuti, si yongola vali oku lilongisa Embimbiliya. Momo koñolosi, poku sapela lulume wange, eci ndo lekisa etosi limue Liembimbiliya, wa ndi veta, kuenje, nda sumuile calua. Noke yoku sapuilako manji ocitangi caco, loku lekisa esumuo nda kuata, eye wa ndi tuma oku tanga elivulu lia 1 Va Korindo 13:4-7. Osimbu nda kala oku tanga ovinimbu viaco, nda fetika oku sokolola ndoco: ‘Ulume wange Steve, lalimue eteke a ka lekisa ocisola ndeci kokuange.’ Pole, manji, wa pongolola ovisimĩlo viange poku ndi pulisa ndoco: ‘Ocisola cipi o sukila oku lekisa kulume wove?’ Ndo tambulula ndoco: ‘Si pondola oku lekisa ocisola, momo ka ca lelukile oku kala laye.’ Kuenje, manji wa ndi sapuila lumbombe hati: ‘A Selma, helie o yongola oku kala Ukristão? Ove, ale ulume wove Steve?’ Eci nda limbuka okuti, nda sukilile oku pongolola ovisimĩlo viange, nda fetika oku likutilila ku Yehova, oco a ndi kuatise oku lekisa ocisola kulume wange Steve. Vokuenda kuotembo, ekalo lio vonjo yetu, lia fetika oku pongoloka.” Noke, yoku pita 17 kanyamo, Steve wa linga Ukristão.

NDOMO VAKUETU VA PONDOLA OKU KUATISA

13, 14. Vamanji va pondola ndati oku kuatisa vana va kuete vangandiavo okuti, havakuetavoko?

¹³ Ndeci atosi ombela a yulisa osi, kuenje, owangu u kula, omanu valua vekongelo va siata oku kuatisa vamanji vana okuti vangandiavo vatiamẽla ketavo likuavo, oco va amameko lesanju. Manji umue ukãi wo kofeka yo Brasil o tukuiwa hati, Elvina wa popia ndoco: “Ocisola vamanji va lekisa kokuange, ca ndi kuatisa oku amamako oku endela vefendelo liocili.”

¹⁴ Oku kuatela ohenda vamanji loku va kapako, ci vetiya vangandiavo vana okuti havakuetavoko, oku tava oku lilongisa  Embimbiliya. Manji umue wo kofeka yo Nigeria, tunde eci a linga Ombangi ya Yehova, pa pita ale 13 kanyamo. Ukãi waye wa popia hati: “Eteke limue eci nda kala oku linga ungende Lombangi yimue ya Yehova, ekãlu liaye lia nyõlehela vonjila. Noke, wa mola Olombangi Via Yehova, volupale lumue lu kasi ocipepi letapalo, kuenje, va tu yekisa oco tu lale konjo yavo. Ovo va tu tata ciwa ndu okuti, va tu kũlĩha tunde osimbu. Kuenje, nda limbuka okuti, Akristão va likuetele ocisola cocili, ndeci ukãi wange a enda oku ci ndi sapuila.” Manji umue ukãi wo kofeka yo Inglaterra okuti, tunde eci a linga Ukristão pa pita ale 18 kanyamo, ulume waye wa popia hati: “Eteke limue, Olombangi Via Yehova, via tu lalekele oku lia kumue lavo onanya. Nda sanjukilile calua elaleko liaco.” c Ulume umue ukuavo wo kofeka yaco okuti weya oku linga Ombangi ya Yehova, wa popia hati: “Vamanji vosi va enda oku tu nyula, loku tu laleka kolonjo viavo, kuenje, nda limbuka okuti, va tu tata ciwa. Eci nda kala kosipitali, nda limbuka ocisola cavo, ndomo vamanji valua va enda oku ndi nyula.” O pondola hẽ, oku lekisa onjongole yimuamue kapata vana okuti havakuetavoko?

15, 16. Nye ci kuatisa Ukristão oku amamako lesanju nda vangandiaye havakuetavoko?

¹⁵ Olohueli, lomãla, kuenda olonjali, la vakuepata vana okuti havakuetavoko, pamue ka va tava kefendelo liocili, ndaño ngandiavo, o likolisilako oku va kundila loku lekisa ovituwa viwa kokuavo. Vamue va amamako oku suvuka vangandiavo ale, oku va lambalala. (Mat. 10:35-37) Nda Akristão va lekisa ovituwa viwa, va pondola oku kuatisa vangandiavo. Ulume umue okuti hokuetavoko, kefetikilo ka tavele oku lilongisa Embimbiliya, wa popia hati: “Nda Ukristão o lekisa ovituwa viwa, ohueli yaye okuti hokuetavoko, yi vetiyiwa calua. Omo liaco, ku ka liwekepo oku lekisa ovituwa viwa kohueli yove okuti, hokuetavoko.”

¹⁶ Ndaño okuti umue ka tava oku lilongisa Embimbiliya, pole, vakuepata liaye okuti Akristão, va pondola oku kuata esanju. Manji umue ukãi okuti ulume waye ka tavele kesapulo Liusoma vokuenda kueci ci soka 21 kanyamo, wa popia hati: “Nda likolisilako oku sanjuisa Yehova, poku lekisa ocisola kokuaye, loku linga ovina vi pamisa ekalo liange kespiritu. Oku linga elilongiso lio pokolika, oku endaenda kolohongele,—​kupange woku kunda, loku kuatisa vamanji, ca pamisa ukamba wange la Yehova, kuenda ca teyuila utima wange.”​—Olosap. 4:23.

KU KA LIWEKEPO!

17, 18. Nye ci pondola oku kuatisa Ukristão oku kuata elavoko nda vangandiaye vatiamẽla ketavo likuavo?

¹⁷ Nda vamue pokati kepata liove vatiamẽla ketavo likuavo, ku ka liwekepo oku va kundila. Ivaluka okuti, ‘Yehova ka yanduluka omanu vaye, omo lionduko yaye yi kola.’ (1 Sam. 12:22) Nda wa likolisilako oku kuata ukamba laye, eye o linga ekamba liove. (Tanga 2 Asapulo 15:2.) Omo liaco, “Sanjukila Yehova” kuenda ‘kundika onjila yove kokuaye. U kolela, kuenje, o ku kuatisa.’ (Osa. 37:4, 5) Oku ‘amamako oku likutilila’ loku kolela ku Yehova Isietu wokilu, ci ku kuatisa oku pandikisa kovitangi.​—Va Rom. 12:12.

¹⁸ Oku pinga vohutililo espiritu sandu lia Yehova, ci kuatisa oku lekisa ombembua vepata. (Va Hev. 12:14) Ombembua yaco, yi pondolavo oku kuatisa vangandietu vana okuti, havakuetavoko. Nda wa ci linga, o kuata esanju lombembua yo vutima, osimbu amamako oku ‘linga ovina viosi vi eca ulamba ku Suku.’ (1 Va Kor. 10:31) Alikolisilo aco, a ku kuatisa oku kolela vamanji vosi!

[Atosi pombuelo yamẽla]

[Apulilo Elilongiso]

[Elitalatu kemẽla 28]

Nõla epuluvi lia sunguluka lioku lombolola ovina viatiamẽla ketavo liove

[Elitalatu kemẽla 29]

Lekisa ocisola kolohueli vina okuti, havakuetavoko