Jeʼel u yantal kiʼimak óolal kex maʼ tu kaʼatúulal meyajtik Dioseʼ
Jeʼel u yantal kiʼimak óolal kex maʼ tu kaʼatúulal meyajtik Dioseʼ
«¿Bix jeʼel a wojéeltik [...] wa jeʼel u páajtal a salvartik a [núupeʼ]?» (1 COR. 7:16.)
KAXT U NÚUKILOʼOB:
¿Baʼax unaj a beetik utiaʼal u yantal jeetsʼelil ichil a wotoch kex maʼatech u meyajtaʼal Jéeoba tumen a láakʼtsiloʼob?
¿Baʼax jeʼel u páajtal a beetik utiaʼal ka kʼaʼamak le maʼalob péektsil tumen a láakʼtsiloʼoboʼ?
¿Bix jeʼel u páajtal k-áantik le sukuʼunoʼob maʼatech u meyajtaʼal Jéeoba tumen u láakʼtsiloʼoboʼ?
1. ¿Baʼax jeʼel u beetik u láakʼtsiloʼob máak ken u kʼam le maʼalob péektsiloʼ?
JESUSEʼ tu yaʼalaj tiʼ u disipuloʼob ka u kʼaʼaytoʼob: «Tsʼoʼok u náatsʼal u [reinoil] kaʼan» (Mat. 10:1, 7). Le maʼalob péektsilaʼ yaan u taasik jeetsʼelil yéetel kiʼimak óolal tiʼ le máaxoʼob kun kʼamik tu jaajil u yóoloʼoboʼ. Baʼaleʼ Jesuseʼ tu yaʼalaj xan tiʼ u apostoloʼobeʼ yaan máaxoʼob maʼ kun kʼamik (Mat. 10:16-23). Yaan kʼiineʼ u láakʼtsiloʼob máak maʼ kun kʼamik, lelaʼ jach jeʼel u beetik u yaatal tu yóol máakeʼ (xokaʼak Mateo 10:34-36).
2. ¿Baʼaxten jeʼel u yantaltoʼon kiʼimak óolal kex maʼatech u meyajtaʼal Jéeoba tumen k-láakʼtsiloʼobeʼ?
2 ¿U kʼáat wa túun u yaʼaleʼ u j-jaajkunajoʼob Jéeobaeʼ minaʼan kiʼimak óolal tiʼob tumen maʼatech u meyajtaʼal Dios tumen u láakʼtsiloʼob? Maʼatech. Kex yaan tiʼ letiʼob jach ku pʼektaʼaloʼobeʼ, yanoʼob xaneʼ maʼatech. Tsʼoʼoleʼ yaan kʼiineʼ maʼatech u jach xáantal pʼektaʼanoʼob. Le oʼolaleʼ, ¿baʼax jeʼel u yáantaj utiaʼal u kiʼimaktal k-óol kex pʼektaʼakoʼon wa kex maʼ u kʼaʼamal le maʼalob péektsil tumen k-láakʼtsiloʼoboʼ? Letiʼe bix k-tuukul yoʼolal le baʼax ku beetkoʼoboʼ. Tsʼoʼoleʼ kex jeʼel baʼaxak ka k-muʼyajteʼ, wa ku chúukpajal k-óol k-meyajt Jéeobaeʼ, letiʼeʼ yaan u yáantkoʼon yéetel yaan u tsʼáaiktoʼon kiʼimak óolal. Teʼ xookaʼ yaan k-ilik kaʼapʼéel baʼax jeʼel u yáantkoʼon utiaʼal ka yanaktoʼon kiʼimak óolaleʼ: 1) k-ilik u yantal jeetsʼelil ichil k-otoch yéetel 2) k-áantik k-láakʼtsiloʼob u meyajtoʼob xan Jéeoba.
KAXT JEETSʼELIL ICHIL A WOTOCH
3. ¿Baʼaxten unaj k-ilik u yantal jeetsʼelil ichil k-otoch?
3 Utiaʼal ka kʼaʼamak le maʼalob péektsil tumen k-láakʼtsiloʼoboʼ unaj u yantal jeetsʼelil ichil k-otoch (xokaʼak Santiago 3:18). Tak wa maʼ tuláakal ichil k-otoch meyajtik Dioseʼ, unaj k-ilik u yantal jeetsʼeliliʼ. ¿Bix jeʼel u páajtal k-beetkeʼ?
4. ¿Baʼax jeʼel u yáantkoʼon utiaʼal maʼ u xuʼulul u yantaltoʼon jeetsʼelileʼ?
4 Toʼon táan k-meyajtik Dioseʼ maʼ unaj u xuʼulul u yantaltoʼon jeetsʼeliliʼ. Utiaʼal lelaʼ unaj k-payalchiʼ tu jaajil k-óol, «Jajal Dios túuneʼ bíin u tsʼáa[toʼon] u jeetsʼel óolal» (Fili. 4:6, 7). Tsʼoʼoleʼ ku yantaltoʼon jeetsʼelil yéetel kiʼimak óolal ikil k-kʼaj óoltik tubeel Jéeoba yéetel ikil k-tsʼáaik ichil k-kuxtal baʼax ku yaʼalik (Isa. 54:13). Le utsiloʼobaʼ k-kʼamik xan ken xiʼikoʼon teʼ muchʼtáambaloʼob yéetel ken jóokʼkoʼon teʼ kʼaʼaytajoʼ. U suukileʼ le máaxoʼob yaan u láakʼtsiloʼob maʼatech u meyajtikoʼob Diosoʼ ku yilik u jóoʼskoʼob u tiempoil u beetkoʼob beyoʼ. U yíicham Enzaeʼ * jach ku tsʼíikil ikil u meyajtik Dios, le oʼolal letiʼeʼ ku jóokʼol kʼaʼaytaj le ken tsʼoʼokok u beetik baʼaxoʼob kʼaʼabéet ichil u yotoch. Letiʼeʼ ku yaʼalik: «Jéeobaeʼ jach ku yáantken cada ken jóokʼken teʼ kʼaʼaytajoʼ». Le oʼolal yaan jeetsʼelil yéetel kiʼimak óolal tiʼ.
5. ¿Baʼax talamiloʼob ku aktáantik le máaxoʼob yaan u láakʼtsiloʼob maʼatech u meyajtikoʼob Diosoʼ, yéetel tuʼux jeʼel u páajtal u kaxtikoʼob áantajeʼ?
5 Toʼoneʼ jach unaj k-ilik u yantaltoʼon jeetsʼelil yéetel k-láakʼtsiloʼob maʼatech u meyajtikoʼob Diosoʼ. Lelaʼ maʼ chéen chʼaʼabiliʼ, tumen yaan kʼiineʼ jeʼel u yaʼalikoʼob ka k-beet baʼax ku bin tu contra le baʼax ku yaʼalik le Bibliaoʼ. Maʼ xaaneʼ yanoʼobeʼ jeʼel u kʼuuxiloʼob ken u yiloʼob maʼatan k-beetik le baʼax ku yaʼalikoʼoboʼ, baʼaleʼ wa maʼ k-xulik k-beetik baʼax maʼalobeʼ ken máanak kʼiineʼ jeʼel u xuʼulul u kʼuuxiloʼob t-éeteleʼ. Baʼaleʼ wa le baʼax ku yaʼalikoʼob ka k-beet maʼatech u bin tu contra le baʼax ku yaʼalik le Bibliaoʼ, maʼ kʼaas ka k-beet utiaʼal maʼ u kʼuuxiloʼob t-éeteliʼ (xokaʼak Proverbios 16:7). Cada ken yanaktoʼon junpʼéel nojoch talamileʼ, unaj k-kaxtik u yáantaj le ancianoʼoboʼ bey xan le jóoʼsaʼaniloʼob ku tsʼáaik le palitsil chúukpajaʼan u yóol yéetel yaan u naʼatoʼ (Pro. 11:14).
6, 7. 1) ¿Baʼaxten yaan máakeʼ maʼ u kʼáatoʼob ka xooknak u láakʼtsiloʼob yéetel u j-jaajkunajoʼob Jéeobaiʼ? 2) ¿Baʼax unaj u beetik juntúul j-xoknáal wa juntúul u j-jaajkunaj Jéeoba ku pʼektaʼal tumen u láakʼtsil?
6 Utiaʼal u yantaltoʼon jeetsʼelil t-otocheʼ unaj k-kʼubik k-óol tiʼ Jéeoba yéetel k-chʼaʼik en cuentail bix u yuʼubikuba k-láakʼtsiloʼob maʼatech u meyajtikoʼob Diosoʼ (Pro. 16:20). Lelaʼ bey xan unaj u beetik le máaxoʼob maʼ úuch joʼopʼok u xookoʼob yéetel u j-jaajkunajoʼob Jéeobaoʼ. Yaan íichamtsil wa atantsileʼ maʼ u pʼeek ka xooknak u núupiʼ, maʼ xaaneʼ ku tuklikoʼobeʼ jeʼel u taasik utsil tiʼ u familiaʼobeʼ. Baʼaleʼ yanoʼobeʼ jach u pʼeekoʼob. Esther, juntúul koʼolel ku meyajtik Dios bejlaʼeʼ, ku yaʼalikeʼ jach pʼuʼuj le ka joʼopʼ u xook u yíicham yéetel u j-jaajkunajoʼob Jéeobaoʼ. Letiʼeʼ ku yaʼalik: «Yaan tiʼ le jóoʼsaʼaniloʼob ku tsʼaʼabaltiʼoʼ tin pulaj, yéetel yanoʼobeʼ tin tóokaj». Howard, u pʼeek kaʼach u xoʼokol le Biblia tumen u yatanoʼ, ku yaʼalik: «Yaʼab íichamtsiloʼobeʼ saajkoʼob u tuʼusul u yatanoʼob. Tumen maʼ u yojloʼob bix jeʼel u kanáantkoʼobeʼ ku pʼuʼujuloʼob».
7 ¿Bix jeʼel k-áantik juntúul máax ku pʼektaʼal tumen u núup ikil u xookeʼ? Unaj k-tsoliktiʼ baʼaxten maʼ unaj u xuʼulul u xookiʼ. Maʼ xaaneʼ, wa ku yeʼesik jatsʼuts modos yéetel tsiikil tiʼ u núupeʼ jeʼel u kʼexik bix u tuukuleʼ (1 Ped. 3:15). Howardeʼ ku yaʼalik: «Jach kin tsʼáaik u diosboʼotikil tiʼ in watan úuchik u chúukpajal u yóol yéetel maʼ u baʼateltʼaan tin wéetel». U yataneʼ ku yaʼalik: «Letiʼeʼ tu sen aʼalajten ka in xul in xokik le Bibliaoʼ. Tumen ku yaʼalikeʼ chéen táan u pʼoʼobol in pool. Teneʼ tin kanáantaj maʼ in baʼateltʼaan tu yéetel, ka tin waʼalajtiʼ, maʼ xaaneʼ, jaaj baʼax ku yaʼalik, baʼaleʼ maʼ bey in wilkiʼ. Tin waʼalajtiʼ ka u xook le libro kin xokikoʼ. Ka tsʼoʼok u xokikeʼ maʼ tu kaxtaj uláakʼ baʼax u yaʼaliʼ, baʼaxeʼ utschaj tu yich». Unaj xan u kʼaʼajaltoʼoneʼ le íichamtsil wa atantsil maʼatech u meyajtik Jéeobaoʼ, maʼ xaaneʼ jeʼel u yuʼubik bey táan u pʼaʼatal tumen u núup ken joʼopʼok u bin teʼ muchʼtáambaloʼob yéetel ken káajak u jóokʼol kʼaʼaytajoʼ. Le oʼolal wa ku tʼaan yéetel yaabilaj yéetel ku kanáantik baʼaxoʼob ku yaʼalikeʼ jeʼel u yáantaj utiaʼal u kʼexik u tuukul u núupeʼ.
ÁANTOʼOB UTIAʼAL U MEYAJTOʼOB DIOS
8. ¿Baʼax tu yaʼalaj Pablo tiʼ le máax maʼatech u meyajtaʼal Dios tumen u núupoʼ?
8 Apóstol Pabloeʼ ku yaʼalik tiʼ le máax meyajtik Diosoʼ maʼ unaj u pʼatik u núup chéen tumen maʼatech u meyajtik Diosiʼ (xokaʼak 1 Corintoiloʼob 7:12-16). * Tsʼoʼoleʼ ku kʼaʼajsiktiʼeʼ, maʼ xaaneʼ jeʼel u kʼaʼamal le maʼalob péektsil tumen u núupoʼ, lelaʼ jeʼel u yáantik utiaʼal u seguer u yantal kiʼimak óolal tiʼeʼ. Baʼaleʼ kex maʼalob ka u tsikbalt máak le maʼalob péektsil tiʼ u núupoʼ, unaj u kanáantik bix u beetik. Koʼoneʼex ilik jujunpʼéel baʼax eʼesik.
9. ¿Baʼax unaj u kanáantik máak ken u tsikbalt tiʼ u láakʼtsiloʼob le baʼax ku kanik teʼ Bibliaoʼ?
9 Ken u naʼat le j-xoknáal jaaj le baʼax ku xokik teʼ Bibliaoʼ, ku joʼopʼol u sen tsikbaltik baʼax ku kanik yéetel ku tsʼíiboltik ka kʼaʼamak xan tumen u láakʼtsiloʼob. Lelaʼ bey úuchik u beetik Fred. Letiʼeʼ ku yaʼalik: «Jach in kʼáat in tsikbalt tiʼ tuláakal máak». Baʼaleʼ yaan kʼiineʼ maʼatech u kʼaʼamal jeʼex u tuklikoʼobeʼ. U yatan Fredeʼ, ku yaʼalik: «Jach tu náaksaj in wóol». Juntúul koʼolel tu kʼamaj le maʼalob péektsil dieciocho jaʼaboʼob káajak u meyajtaʼal Dios tumen u yíichamoʼ bey xan úuchik u yuʼubikubaoʼ. Letiʼeʼ ku yaʼalik: «Teneʼ in kʼáat kaʼach ka u tsolten jujunpʼíitil utiaʼal in naʼatik». Wa táan k-tsʼáaik xook tiʼ juntúul máax maʼatech u kʼaʼamal le maʼalob péektsil tumen u núupoʼ, maʼalob ka k-ensayart tu yéetel bix jeʼel u páajtal u tsolik baʼaxoʼob ku creertikeʼ. Moiseseʼ ku yaʼalik: «In kaʼansajeʼ bíin báanak bey u kʼáaxal jaʼeʼ, in tseʼekeʼ bíin báanak bey u kʼáaxal pʼuul jaʼeʼ, bey tóosjaʼ yóokʼol xíiweʼ, bey u chʼachʼajankil jaʼ tu yóokʼol maʼalob xíiweʼ» (Deu. 32:2). Jeʼex u chʼáachʼajal jaʼeʼ, u tsikbaltik máak cada wa baʼax kʼiin le maʼalob péektsil teʼ súutuk maas maʼaloboʼ maas ku yáantaj ke u sen tsikbaltaʼal, tumen lelaʼ bey ka beetaʼak u búululeʼ.
10-12. 1) ¿Baʼax tu yaʼalaj apóstol Pedro maʼalob ka u beet le máaxoʼob maʼatech u meyajtaʼal Dios tumen u núupoʼoboʼ? 2) ¿Bix úuchik u kanik juntúul koʼolel u beet le baʼax ku yaʼalik 1 Pedro 3:1 yéetel 2?
10 Apóstol Pedroeʼ tu yaʼalaj tiʼ le kiikoʼob maʼatech u meyajtaʼal Dios tumen u yíichamoʼoboʼ: «Tsʼáabaʼex yáanal u kʼab a wíichameʼex, utiaʼal beyoʼ wa yaan tiʼ letiʼob maʼ táan u yoksaj óoltikoʼob le maʼalob péektsiloʼ, ka kʼuchuk u yoksaj óoltoʼob tu yoʼolal bix a kuxtaleʼex teʼex, kex maʼ a waʼalikeʼex mix baʼal, le ken u yiloʼob a toj yéetel tsiikil kuxtaleʼex» (1 Ped. 3:1, 2). Jeʼex túun k-ilkoʼ, wa le atantsil ku yeʼesik tsiikil tiʼ u yíicham kex maʼatech u yeʼesaʼal yaabilaj tiʼoʼ, jeʼel u yáantik utiaʼal ka káajak u meyajtik Dioseʼ. Le íichamtsil xanoʼ unaj u tratartik yéetel yaabilaj u yatan kex maʼatech u meyajtik Dios yéetel kex maʼatech u kʼamik le baʼaxoʼob ku creertikoʼ (1 Ped. 3:7-9).
11 Yaʼab máaxoʼob meyajtik Dios teʼ kʼiinoʼobaʼ tsʼoʼok u yilkoʼob jach jaaj le baʼax tu yaʼalaj Pedrooʼ. Lelaʼ bey uchaʼanil tiʼ Selma. Steve, u yíichameʼ, jach kʼuuxilnaj ka káaj u xokik le Biblia yéetel u j-jaajkunajoʼob Jéeobaoʼ. Letiʼeʼ ku yaʼalikeʼ ku yuʼubik «kʼuuxilnaji, celoso yéetel maʼ u yojel baʼax unaj u beetkiʼ». Selmaeʼ ku yaʼalik: «Tak táanil tiʼ u káajal in xookeʼ, talam in máansik in kuxtal tu yéetel. Jach kʼaʼabéet in kanáantik baʼax kin beetik, tumen séeb u tsʼíikil. Ka káaj in xookeʼ, pʼáat maas séeb u tsʼíikil». ¿Baʼax túun tu beetaj Selma?
12 Letiʼeʼ maʼ tuʼubtiʼ junpʼéel baʼax kaʼansaʼabtiʼ tumen le kiik tsʼáaik xook tiʼoʼ, letiʼeʼ ku yaʼalik: «Juntéenjeakeʼ maʼ jach taak in xookiʼ. Tumen tu joʼolojeʼ baʼateltʼaanajen yéetel Steve, ka pʼuʼuj tin wéetel, le oʼolal jach maʼ maʼalob in wuʼuyikinbaiʼ. Tin tsikbaltaj tiʼ le kiikoʼ, ka tu yaʼalajten ka in xok Yáax tiʼ Corintoiloʼob 13:4 tak 7. Jach kʼajaʼanten in waʼaliktiʼ: “Steveeʼ maʼatech u yeʼesikten le yaabilaj beyoʼ”. Letiʼeʼ tu kʼáatajten: “Kux túun teech, ¿ka weʼesik wa yaabilaj tiʼ jeʼex u yaʼalik le tekstoaʼ?”. Tin waʼalajtiʼeʼ maʼatech, yoʼolal bix u modos. Letiʼeʼ tu yaʼalajten: “Selma, ¿máax táan u kanik baʼax uts tu tʼaan Dios? ¿Steve, wa teech?”. Yoʼolal le baʼax tu yaʼaloʼ tin naʼateʼ unaj in kʼexik bix in tuukul. Ka tin kʼáataj tiʼ Jéeoba ka u yáanten in maas eʼes yaabilaj tiʼ in wíicham. Jujunpʼíitileʼ tu kʼexaj bix u modos». Ka máan diecisiete jaʼaboʼobeʼ, Steveeʼ káaj u meyajtik xan Dios.
BAʼAX JEʼEL U PÁAJTAL K-BEETKEʼ
13, 14. ¿Bix jeʼel u páajtal k-áantik u láakʼtsil le sukuʼunoʼoboʼ?
13 Jeʼex le tóosjaʼ ku jóoyaʼtik tubeel le paakʼaloʼoboʼ, le yaabilaj ku yeʼesik tuláakal le sukuʼunoʼob teʼ múuchʼuliloʼ, jeʼel u yáantaj utiaʼal ka yanak kiʼimak óolal tiʼ le máaxoʼob yaan u láakʼtsiloʼob maʼatech u meyajtikoʼob Diosoʼ. Elvina, kajaʼan Brasileʼ, ku yaʼalik: «Le yaabilaj ku yeʼesikten le sukuʼunoʼob yéetel le kiikoʼoboʼ ku yáantken utiaʼal maʼ u xuʼulul in meyajtik Dios».
14 Baʼaleʼ le yaabilaj yéetel le utsil k-eʼesik xanoʼ jeʼel u yáantik u láakʼtsil le sukuʼunoʼoboʼ. Lelaʼ bey úuchik tiʼ juntúul sukuʼun kajaʼan Nigeria, letiʼeʼ tu kʼamaj u jaajil trece jaʼaboʼob joʼopʼok u meyajtaʼal Dios tumen u yatan. Letiʼeʼ ku yaʼalik: «Juntéenjeakileʼ jóokʼen viaje yéetel juntúul u j-jaajkunaj Jéeoba. Baʼaleʼ kʼaschaj u coche, ka bin u kʼáat áantaj tiʼ u j-jaajkunajoʼob Jéeoba kajaʼanoʼob maʼ jach náachiʼ. Letiʼobeʼ tu kʼamoʼon tu yotochoʼob yéetel tu tsʼáajoʼob baʼaxoʼob kʼaʼabéettoʼon, bey jach úuch u kʼaj óoltoʼonoʼobeʼ. Leloʼ letiʼe yaabilaj ku yeʼesik le máaxoʼob meyajtik Dios úuch joʼopʼok u yaʼalik in watanoʼ». Juntúul koʼolel kajaʼan tu luʼumil Inglaterraeʼ, tu kʼamaj le maʼalob péektsil dieciocho jaʼaboʼob káajak u meyajtaʼal Dios tumen u yíichamoʼ, letiʼeʼ ku yaʼalik: «U j-jaajkunajoʼob Jéeobaeʼ mantatsʼ ku invitartikoʼon janal tu yotochoʼob. Letiʼobeʼ ku kʼamkenoʼob yéetel kiʼimak óolal». Lelaʼ bey úuchik xan tiʼ juntúul máak teʼ luʼumil jeʼeloʼ, káaj u meyajtik Jéeoba jeʼex u beetik u yataneʼ, letiʼeʼ ku yaʼalik: «Le sukuʼunoʼoboʼ ku binoʼob t-otoch wa ku yaʼalikoʼobtoʼon ka xiʼikoʼon tu yotochoʼob. Tu yeʼesoʼobtoʼon yaabilaj, maases ka bisaʼaben hospital, yaʼab tiʼ letiʼobeʼ bin u yilenoʼobiʼ». Jeʼex túun k-ilkoʼ, tuláakloʼon jeʼel u páajtal k-áantaj utiaʼal k-eʼesik yaabilaj tiʼ u láakʼtsil le sukuʼunoʼoboʼ.
15, 16. ¿Baʼax jeʼel u yáantik le sukuʼunoʼob utiaʼal ka seguernak u yantal kiʼimak óolal tiʼob kex maʼatech u meyajtaʼal Dios tumen u láakʼtsiloʼoboʼ?
15 Baʼaleʼ yaan kʼiineʼ, kex juntúul sukuʼun táan u yilik u beetik baʼax maʼalob yéetel ku kanáantik bix u kʼaʼaytik le maʼalob péektsil tiʼ u núup, tiʼ u paalal, tiʼ u taataʼob wa tiʼ u maasil u láakʼtsiloʼobeʼ, maʼ xaaneʼ maʼ tuláakloʼob ken u yóot u meyajtoʼob Diosiʼ. Maʼ xaan xaneʼ jach junpuliʼ maʼ kun taaktal u maas kʼaj óoltikoʼob wa yaan u seguer u pʼektikoʼonoʼob tu yoʼolal (Mat. 10:35-37). Kex beyoʼ unaj u seguer k-eʼesiktiʼob jatsʼuts modos. Juntúul sukuʼun yáax u yatan káaj u meyajtik Jéeobaeʼ, ku yaʼalik: «Ken k-eʼes jatsʼuts modoseʼ, maʼ k-ojel baʼax ku tuklik yéetel ku yuʼubik tu puksiʼikʼal le máax maʼatech u meyajtik Diosoʼ. Maʼ unaj u xuʼulul u yeʼesik máak jatsʼuts modosiʼ».
16 Baʼaleʼ kex maʼ u kʼaʼamal le maʼalob péektsil tumen k-láakʼtsiloʼoboʼ, jeʼel u yantaltoʼon kiʼimak óolaleʼ. Jeʼex juntúul kiikeʼ tsʼoʼok veintiún jaʼaboʼob maʼ kʼaʼamak le maʼalob péektsil tumen u yíichamoʼ. ¿Bix túun u yuʼubikuba? Letiʼeʼ ku yaʼalik: «Maʼ xuʼuluk u yantalten kiʼimak óolaliʼ, tumen jach kin tsʼáaik in wóol in beet baʼax u kʼáat Jéeoba yéetel in maas kʼaj óolte. Kin tsʼáaik in wóol xook, in bin teʼ muchʼtáambaloʼoboʼ, in jóokʼol kʼaʼaytaj yéetel in wáantik le sukuʼunoʼoboʼ. Lelaʼ tsʼoʼok u yáantken utiaʼal ka chúukpajak in wóol in meyajt Jéeoba» (Pro. 4:23).
MAʼ U XUʼULUL A TSʼÁAIK A WÓOL
17, 18. ¿Baʼax áantik le sukuʼunoʼob utiaʼal u kiʼimaktal u yóoloʼob kex maʼatech u meyajtaʼal Jéeoba tumen u láakʼtsiloʼoboʼ?
17 Wa chéen ta juunal ka meyajtik Jéeoba ichil a wotocheʼ, maʼ u xuʼulul a tsʼáaik a wóol a beete. Maʼ u tuʼubultecheʼ «Yuumtsileʼ bíin u tsʼáa tsikbeʼenil tiʼ u kʼaabaʼ utiaʼal maʼ u pʼatik» u kaajal (1 Sam. 12:22). Letiʼeʼ maʼ ken u pʼatech wa ka wilik maʼ a pʼatik xan (xokaʼak 2 Crónicas 15:2). Beet le baʼax ku yaʼalik le tekstoaʼ: «Yaakunt Yuumtsil yéetel muumun óolal [...]. Tsʼáa a kuxtal tu kʼab Yuumtsil; kʼub óolnen tiʼ, letiʼ túuneʼ bíin u yáantech» (Sal. 37:4, 5). Maʼ u xuʼulul a payalchiʼ yéetel seguernak a creertik Jéeoba, a Taata yaan teʼ kaʼanoʼ, yaan u seguer u yáantkech kex jeʼel baʼaxak ka úuchkeʼ (Rom. 12:12).
18 Kʼáat u kiliʼich muukʼ Jéeoba utiaʼal u yantaltech jeetsʼelil ichil a wotoch (Heb. 12:14). Maʼ xaaneʼ junpʼéel kʼiineʼ ku káajal u meyajtaʼal Jéeoba tumen a láakʼtsiloʼob. Wa ka beetik «tuláakal utiaʼal u nojbeʼenil Jajal Dios[eʼ]», yaan u yantaltech kiʼimak óolal yéetel jeetsʼelil (1 Cor. 10:31). Kʼaʼajaktecheʼ yaabiltaʼanech tumen le sukuʼunoʼob yaan tiʼ tuláakal le yóokʼol kaabaʼ.
[Tsolajiloʼob]
^ xóot’ol 4 Kʼexaʼan le kʼaabaʼobaʼ.
^ xóot’ol 8 Le baʼax ku yaʼalik le tekstoaʼ maʼ táan u yaʼalik wa maʼ tu páajtal u pʼatik u núup máak wa jach ku beetaʼal u muʼyajiʼ. Lelaʼ ku maas tsoʼolol teʼ libro «Pʼáateneʼex tiʼ u yaakunaj Jajal Dios», táan juʼun 220 yéetel 221.
[U kʼáatchiʼiloʼob le xookoʼ]
[Foto yaan teʼ táan juʼun 28]
Kaxt u súutukil utiaʼal a tsolik baʼaxoʼob ka creertik
[Foto yaan teʼ táan juʼun 29]
Unaj k-eʼesik yaabilaj tiʼ le íichamtsil wa atantsil maʼatech u meyajtik Diosoʼ
