Va Huwelele Rito Ra Xikwembu Hi Xivindzi!

Ku va ni xivindzi ni vurhena loko u kanetiwa. Timfanelo leti ti kombisiwa hi Vakreste va ntiyiso hilaha swi kombisiweke hakona etibukwini to fana ni leyi nge ‘Chumayela Mfumo Wa Xikwembu Hi Rixaladza’ ni leyi nge Timbhoni Ta Yehovha I Vahuweleri Va Mfumo Wa Xikwembu. Ku fana ni vapfumeri-kulorhi va lembe-xidzana ro sungula, hi khongela eka Yehovha leswaku a hi nyika moya wakwe nileswaku a hi pfuna hi vula rito rakwe hi vurhena.—Mint. 4:23-31.

Malunghana ni ntirho wa hina wo chumayela hi nkarhi wa nyimpi yo sungula ya misava, makwerhu un’wana u tsale a ku: “Malandza ya Xikwembu ma yi hangalase hi ku hiseka vholumo ya vunkombo ya Studies in the Scriptures, leyi a yi ri ni nhloko-mhaka leyi nge The Finished Mystery. Buku yoleyo yi hangalasiwe ngopfu. Hi 1918 ku humesiwe Kingdom News No. 1. Endzhaku ka sweswo, ku humesiwe Kingdom News No. 2, leyi hlamuseleke leswaku ha yini buku leyi nge The Finished Mystery yi yirisiwile hi valawuri. Ku tlhele ku humesiwa Kingdom News No. 3. Ti-Kingdom News teto ti hangalasiwe ngopfu hi vatotiwa naswona a swi lava ripfumelo ni xivindzi ku ti hangalasa.”

Namuntlha, vahuweleri va Mfumo lava ha riki vantshwa, hi ntolovelo va leteriwa ndlela yo chumayela kambe vahuweleri va le nkarhini lowu hundzeke a va nga leteriwi minkarhi yin’wana. Loko makwerhu un’wana wa le tikweni ra Poland la tshamaka eUnited States a vula leswi n’wi humeleleke ro sungula ensin’wini hi 1922, u tsale a ku: “Leswi a ndzi nga swi tivi ku vulavulela minkandziyiso naswona a ndzi nga xi tivi kahle Xinghezi, ndzi fike ndzi yima enyangweni ya hofisi ya dokodela ivi ndzi gongondza. Muongori un’wana u pfule nyangwa. A ndzi nge swi rivali leswi humeleleke hi siku rero hikuva a ndzi tsakile hi hala tlhelo ndzi chuhile. Loko ndzi ri karhi ndzi pfula xikhwama xa mina, tibuku hinkwato ti wele emilengeni ya muongori yoloye. A ndzi swi tivi leswi ndzi swi vuleke, kambe ndzi n’wi fambisele buku. Loko ndzi famba, se a ndzi ri ni xivindzi naswona ndzi xiye leswaku Yehovha u ndzi katekisile. Ndzi fambise swibukwana swo tala hi siku rero endhawini yoleyo ya mabindzu.”

Makwerhu un’wana wa xisati u te: “Hi 1933, vamakwerhu vo tala va xinuna a va tirhisa timovha leti nga ni swikurisa-marito leswaku va hangalasa rungula ra Mfumo.” Siku rin’wana, yena swin’we ni mpatswa wun’wana lowu nga Timbhoni a va ri eku chumayeleni endhawini ya tintshava ya le California, eU.S.A. U te: “Makwerhu wa xinuna u chayele movha a ya yi yimisa entshaveni naswona hi sale edorobeni leri nga ehansi ka ntshava yoleyo. Loko a sungule ku tlanga rungula leri rhekhodiweke, a ri twala onge ri huma etilweni. Vanhu va le dorobeni rero va ringete ku n’wi lava kambe a va n’wi kumanga. Endzhaku ka loko rungula rero ri hete ku tlanga, hi nghene emakaya ya vanhu kutani hi va chumayela. Ndzi tlhele ndzi ya chumayela hi ku tirhisa timovha tin’wana timbirhi leti nga ni swikurisa-marito naswona vanhu vo tala a va nga swi tsakeli nikatsongo ku twa rungula rero. Kambe a va nga ta swi kota ku ri papalata hikuva a ri twakala kahle emakaya ya vona. Minkarhi hinkwayo a hi kota ku vona leswaku Yehovha a a endla leswaku ku tirhisiwa endlelo lerinene hi nkarhi lowu faneleke. Endlelo leri ro chumayela a ri lava xivindzi, kambe a ri kota ku fikelela xikongomelo xa rona naswona vito ra Yehovha a ri kwetsimisiwa.”

Hi va-1930 ni le ku sunguleni ka va-1940, a ku tirhisiwa  tigramafoni ensin’wini leswaku ku tlangiwa marekoti ya tinkulumo ta Bibele leti rhekhodiweke. Makwerhu un’wana wa xisati u te: “Makwerhu un’wana wa xisati loyi a ha ri muntshwa a a chumayela hi yindlu ni yindlu a tlanga gramafoni. Endzhaku ko tlanga rekoti emutini wun’wana, n’wini wa muti u karihe ngopfu lerova u rahe gramafoni yoleyo yi wela ehansi ku suka erikupakupeni. Ku hava rekoti ni rin’we leri tshovekeke. Vavanuna vanharhu lava a va ri eku dyeni ka swakudya swa ninhlikanhi endzeni ka lori leyi a yi yimile va vone leswi humeleleke, kutani va vitane makwerhu yoloye leswaku a ta va tlangela rungula rero naswona va amukele minkandziyiso leyi a va nyikeke yona. Sweswo swi n’wi tsakise ngopfu hambileswi a a ha ku khomiwa hi ndlela yo biha.” A swi lava xivindzi leswaku munhu a kota ku langutana ni miringo yoleyo.

Makwerhu yoleyo wa xisati u tlhele a ku: “Ndzi tsundzuka loko hi sungula ku fambisa timagazini eswitarateni hi va-1940. Emahlweni ka kwalaho, a hi macha hi khome tibodo leti tsariweke marungula. Eka ntlawa wun’wana lowu macheke, vamakwerhu va xinuna ni va xisati a va famba etlhelo ka xitarata va khome tibodo leti nga ni marito lama nge ‘Vukhongeri I Ntlhamu Ni Bindzu’ ni lama nge ‘Tirhela Xikwembu Na Kreste Hosi.’ Hi nkarhi lowu fanaka, vanhu a va nyikiwa swiphephana mahala. A swi lava xivindzi ku chumayela hi tindlela teto, kambe ti hoxe xandla leswaku vito ra Yehovha ni ra malandza yakwe ri tiveka evanhwini.”

Makwerhu un’wana wa xisati u te: “Ku fambisa timagazini etikhonweni ta switarata swa le swidorobanini a swi tika swinene hikuva hi nkarhi wolowo Timbhoni a ti kanetiwa ngopfu. . . . A swi lava xivindzi ku yima ekhonweni u khome timagazini kutani u huwelela marito lawa a ku ringanyetiwe leswaku ma tirhisiwa. Hambiswiritano, a swi nga talanga leswaku hi xwa hi Mugqivela. Minkarhi yin’wana vanhu a va hi tsakela. Kambe minkarhi yin’wanyana mintlawa ya vanhu lava hlundzukeke a yi hi rhendzela naswona a hi boheka ku hatla hi baleka leswaku yi nga hi vavisi.”

Ku nga khathariseki nxaniso lowu Timbhoni ta Yehovha ti langutaneke na wona hi nkarhi wa Nyimpi ya Vumbirhi ya Misava, ti hambete ti chumayela hi xivindzi. Eka tsima leri tekeke masiku ya 43 leri sunguleke hi December 1, 1940, ku ya fika hi January 12, 1941, vahuweleri va kwalomu ka 50 000 eUnited States va fambise swibukwana leswi lavaka ku ringana nhungu wa timiliyoni hi nkarhi lowu a wu vuriwa Nkarhi wo Chumayela hi “Xivindzi.”

Vanhu vo tala lava nga ni malembe yo tala va ri enhlengeletanweni ya Xikwembu va ha swi tsundzuka kahle swiphiqo leswi va hlanganeke na swona, leswi a swi lava leswaku va va ni xivindzi. Van’wana va tsundzuka marito lawa a va ma phindha-phindha ku ringana malembe yo tala, lawa a ma kombisa xivindzi lexi a va ri na xona. Marito ya kona a ma ku, A hi hambeteni hi chumayela hi ku hiseka kukondza makumu ma fika. A hi swi tivi leswaku hi yihi ndlela yin’wana leyi hi nga ta yi tirhisa loko hi chumayela rungula leri humaka eka Xikwembu emahlweni ko va mafambiselo lawa ya swilo ma lovisiwa. Hambiswiritano, Yehovha u ta hi pfuna leswaku hi hambeta hi huwelela rito rakwe hi ripfumelo ni xivindzi.

[Marito lama tshahiweke exihlokweni lama nga eka tluka 9]

Minkarhi hinkwayo a ku laveka xivindzi leswaku vanhu va hlanganyela entirhweni wo chumayela hi Mfumo