Si Natan—Maimbod na Parasuportar kan Dalisay na Pagsamba

Bakong pasil na kombensiron an sarong makapangyarihan na tawo na an saiyang mga gibo maraot asin kaipuhan niang magbago. Kokomprontaron mo daw an siring na indibiduwal kun aram mong may ipinagadan siang tawo tangani sanang tahoban an kasusupgan?

Si Hadeng David kan suanoy na Israel nagsambay ki Bat-seba, asin ini nagbados. Tanganing itago an saindang kasalan, ipinagadan ni David an agom ni Bat-seba dangan kinua nia si Bat-seba bilang saiyang agom. Luminihis an mga bulan na duwang klase an nagin pamumuhay ni David, na mayong duda na ipinadagos nia an saiyang opisyal na mga katongdan. Alagad dai pinalampas ni Jehova an mga kasalan kan hade. Sinugo nia an saiyang propetang si Natan tanganing komprontaron si David.

Depisil an sugo na ini. Ipamugtak na ika si Natan. An kaimbodan ki Jehova asin marigon na pangangapot sa mga pamantayan nia daing duda na nakamotibar ki Natan na ipagirumdom ki David an mga kasalan kaini. Paano ini gigibohon kan propeta asin kokombensiron si Hadeng David na kaipuhan kaining magsolsol?

MATAKTIKANG PARATOKDO

Taano ta dai magtao nin pirang minuto tanganing basahon an 2 Samuel 12:​1-25? Imahinaron na yaon ka sa situwasyon ni Natan mantang iineestorya nia ki David ini: ‘Igwa nin duwang lalaki sa sarong banwa, an saro mayaman, asin an saro dukha. Idtong mayaman igwa nin dakol na oveja [karnero] asin mga baka; idtong dukha mayo kundi sarong korderong babae, na saiyang binakal asin inataman. Asin duminakula idto duman saiya asin duman sa saiyang mga aking lalaki. Kasaro ninda idto sa pagkakan, asin duman sa baso ninda idto nag-iinom, asin nagtotorog sa saiyang  daghan, asin ibinilang nia idto nin siring sa sarong aking babae. Asin puminaduman sa mayaman an sarong naglalakaw, asin sia dai namoot na kumua duman sa saiyang mga oveja asin duman sa saiyang mga baka, sa pagluto kan manongod duman sa naglalakaw na uminabot sa saiya. Kinua nia an oveja kan dukhang lalaking idto asin inandam nia idto duman sa lalaking uminabot sa saiya.’​—⁠2 Sam. 12:​1-4.

Si David, na nagin pastor, minalataw na nagtubod na totoong situwasyon ini. Isinusuherir nin sarong komentarista na “tibaad tuod na si Natan na dumolok sa saiya tanganing surogon an mga inaapi na mayo na kutanang magigibo dapit sa kamugtakan ninda, asin inisip ni David na ini an tuyo nia ngonyan.” Dawa kun iyan an kamugtakan, kinaipuhan ni Natan an kaimbodan sa Dios saka kosog nin boot tanganing makipag-olay sa hade arog kan ginibo nia. Naanggot na gayo si David huli sa estorya ni Natan. ‘Nabubuhay si Jehova, an guminibo nin siring gagadanon nanggad!’ an sabi nia. Dangan, sinabi ni Natan an magabaton na mga tataramon na ini: “Ika iyo an lalaking idto”!​—⁠2 Sam. 12:​5-7.

Estudyaran kun taano ta tinawan ni Natan nin atension an problema sa arog kaiyan na paagi. Para sa saro na naparani an boot sa sarong tawo, bakong pasil na mansayon an saiyang situwasyon sa makatanosan na paagi. Gabos kita may tendensiang magtao nin mga dahelan tanganing ipangatanosan an satong sadiri kun kuestionable an gawe-gawe niato. Alagad huli sa ilustrasyon ni Natan, dai narealisar ni David na kinondenar na palan nia an saiya mismong gawe-gawe. Malinaw na nasabotan kan hade na an isinaysay ni Natan na gawe-gawe maraot. Minsan siring, kan kondenaron mismo ni David iyan, saka sana ihinayag ni Natan na an ilustrasyon aplikado sa hade. Kaidto sana nasabotan ni David kun gurano kagabat kan kasalan nia. Nakatabang ini sa saiya na magkaigwa nin tamang saboot asin akoon an pagsagwe. Inadmitir nia na “pinagbasangbasang” nanggad nia si Jehova paagi sa saiyang gawe-gawe may koneksion ki Bat-seba, asin inako nia an pagsagwe na maninigo sa saiya.​—⁠2 Sam. 12:​9-14; Sal. 51, superskripsion kan NW.

Ano an satong manonodan digdi? An obheto nin paratokdo sa Biblia iyo na tabangan an mga nagdadangog sa saiya na makagibo nin tamang kongklusyon. Iginalang ni Natan si David kaya mataktika nia ining kinaolay. Aram ni Natan na si David mamomoton sa katanosan asin hustisya. Paagi sa ilustrasyon nia, pinukaw kan propeta an diosnon na mga kualidad na ini. Matatabangan ta man an sinserong mga indibiduwal na masabotan an pagmansay ni Jehova. Paano? Paagi sa pagpukaw sa aram nindang tama, na dai ipinapamate sa sainda na kita nakakalabi kun dapit sa moral o espirituwal. An Biblia, bako an satong personal na opinyon, an autoridad niato mapadapit sa kun ano an tama asin kun ano an sala.

Orog kisa sa ano pa man, an kaimbodan sa Dios nagpangyari ki Natan na sagweon an sarong makapangyarihan na hade. (2 Sam. 12:⁠1) Iyan man an matao sa sato nin kosog nin boot tanganing marigon na makapanindogan sa matanos na mga prinsipyo ni Jehova.

NAGTATABANG PARA SA DALISAY NA PAGSAMBA

Minalataw na si David asin Natan dayupot na mag-amigo, huling Natan an inginaran ni David sa saro sa mga aki nia. (1 Cron. 3:​1, 5) Kan enot na masambitan si Natan sa Biblia, kaiba sia ni David. Pareho nindang namomotan si Jehova. Minalataw na nagtiwala an hade sa paghusgar ni Natan, huling sinabi nia sa propeta an saiyang kamawotan na magtogdok nin templo para ki Jehova. ‘Helingon mo ngonyan,’ an sabi ni David, ‘“nag-eerok ako sa harong na sedro asin an kaban nin Dios namumugtak sa tahaw nin mga dingding [“mga tahob nin tolda,” NW].” Asin si Natan nagsabi sa hade: “Lakaw, asin gibohon mo an yaon sa saimong puso​—⁠ta si Jehova yaon saimo.”’​—⁠2 Sam. 7:​2, 3.

Bilang maimbod na parasamba ki Jehova, entusiastikong sinuportaran ni Natan an plano ni David na itogdok an primerong permanenteng sentro nin dalisay na pagsamba sa daga. Minsan siring, sa pangyayaring iyan, minalataw na ipinahayag ni Natan an saboot nia imbes na magtaram sa ngaran ni Jehova. Kan bangging iyan, ininstruksionan nin Dios an saiyang propeta na ipaabot sa hade an sarong laen na mensahe: Bako si David an magibo kan templo ni Jehova. An tawong magibo kaiyan saro sa mga aki ni David. Alagad sinabi ni Natan na nakikipagtipan an Dios ki David na an trono kaini ‘dai mahihiro sagkod noarin pa man.’​—⁠2 Sam. 7:​4-16.

An kabotan nin Dios bakong kaoyon kan paghusgar ni Natan kun dapit sa pagtogdok kan templo. Minsan siring, daing pagreklamo na uminoyon an mapakumbabang propetang ini sa katuyohan ni Jehova asin nakikooperar dian. Abaa karahay na halimbawang aarogon  kun itatanos kita nin Dios sa ano man na paagi! An suminunod na mga gibo ni Natan bilang propeta nagpapaheling na dai nawara an pag-oyon nin Dios sa saiya. Sa katunayan, minalataw na pinasabngan ni Jehova si Natan, asin si Gad na bisyonaryo, na direhiran si David sa pag-organisar nin 4,000 na musikero sa paglilingkod sa templo.​—⁠1 Cron. 23:​1-5; 2 Cron. 29:⁠25.

PARASUROG KAN PAGKAHADE

Aram ni Natan na si Salomon an dapat na magsalida sa may edad nang si David bilang hade. Kaya desididong huminiro si Natan kan probaran ni Adonias na agawon an trono durante kan mga taon na maluya na si David. Ipinaheling giraray ni Natan an pagkamataktika asin kaimbodan. Enot, sinadol nia si Bat-seba na pagirumdomon si David dapit sa ipinanuga kaini na gigibohon na hade an saindang aki na si Salomon. Dangan si Natan mismo uminatubang sa hade tanganing maghapot kun baga tinogotan ni David na magsalihid sa saiya si Adonias. Huling narealisar kan gurang nang hade na seryoso an situwasyon, ininstruksionan nia si Natan asin an iba pang maimbod na lingkod na lahidan asin iproklamar na hade si Salomon. Naolang an pakana ni Adonias.​—⁠1 Ha. 1:​5-53.

MAPAKUMBABANG HISTORYADOR

An kadaklan minaoyon na si Natan asin Gad an kagsurat kan 1 Samuel kapitulo 25 sagkod 31 saka kan bilog na 2 Samuel 1-24. Mapadapit sa ipinasabong na mga kasaysayan na nakarekord sa mga librong iyan, sinasabi: “Kun manongod sa mga agi-agi ni David na hade, an mga enot asin an huri, duman an mga iyan nasusurat sa mga tataramon ni Samuel na parahula asin sa mga tataramon ni Natan na propeta patin sa mga tataramon ni Gad na bisyonaryo.” (1 Cron. 29:​29, NW) Sinasabi man na si Natan nagsurat nin salaysay mapadapit sa ‘mga gibo ni Salomon.’ (2 Cron. 9:29) Posibleng marhay na nangangahulogan ini na padagos na nagin aktibo si Natan sa mga gibohon sa palasyo dawa pagkagadan ni David.

An kadaklan kan aram niato manongod ki Natan tibaad isinurat mismo kan propeta. Pero, dakol kitang manonodan manongod sa saiya huli sa pagigin silensio nia mapadapit sa nagkapirang bagay. Malinaw nanggad na si Natan mapakumbabang historyador. Bako siang ambisyoso, na nagmamawot na magin bantog. An sarong diksionaryo dapit sa Biblia nagsabi na sia sinambit sa Biblia na mayo nin introduksion asin impormasyon manongod sa saiyang pamilya. Mayo kitang aram manongod sa personal na buhay ni Natan.

MOTIBADO NIN KAIMBODAN KI JEHOVA

Base sa nagkapirang pagsambit dapit ki Natan kan Kasuratan, malinaw na sia mapakumbaba asin maigot na parasuportar kan mga areglo nin Dios. Inasignaran sia ni Jehova Dios nin magagabat na responsabilidad. Horophoropon an mga kualidad ni Natan, siring kan kaimbodan sa Dios asin hararom na pag-apresyar sa mga kahagadan Nia. Pagmaigotan na arogon an siring na mga kualidad.

Posibleng marhay na dai man nindo kaipuhan na magsagwe nin parasambay na mga hade o mag-olang nin mga pakana. Minsan siring, sa tabang nin Dios, ikakapaheling nindo an kaimbodan sa Dios asin pagsuportar sa matanos na mga pamantayan nia. Puede man kamong magin makosog an boot pero mataktikang paratokdo kan katotoohan asin parasuportar kan dalisay na pagsamba.

[Ritrato sa pahina 25]

Bilang parasurog kan pagkahade, mataktikang kinaolay ni Natan si Bat-seba