Natan​—Nasungdo a Nangsuporta iti Pudno a Panagdayaw

Narigat a kombinsiren ti maysa a nabileg nga agturay a dakes ti inaramidna ken kasapulanna ti agbalbaliw. Salangadem kadi ti kasta a tao no ammom a pimmatay tapno laeng maprotektaranna ti reputasionna?

Ti nagkauna nga ari ti Israel a ni David nakikamalala ken Bat-seba ket nasikoganna daytoy. Tapno mailemmeng ni David ti basolna, impapatayna ti asawa ni Bat-seba sana inasawa. Iti adu a bulan, intultuloy ni David ti annongenna kas ari bayat nga ilimlimedna ti basolna. Ngem saan a pinanuynoyan dayta ni Jehova isu nga imbaonna ni propeta Natan a mangkomprontar iti ari.

Narigat dayta nga annongen. Ipapanmo a sika ni Natan. Sigurado a ti kinasungdona ken ni Jehova ken ti natibker a determinasionna a mangsalimetmet kadagiti bilin ti Dios ti nangtignay kenkuana a mangibaga kadagiti basol ni David. Kasano a maaramid dayta ti propeta ket makombinsirna ni Ari David nga agbabawi?

NATAKTIKA A MANNURSURO

Apay a dimo iwayaan a basaen iti sumagmamano a minuto ti 2 Samuel 12:1-25? Ipapanmo a sika ni Natan a manges-estoria ken David: “Adda idi dua a lallaki iti maysa a siudad, ti maysa nabaknang ket ti sabali bassitan iti sanikua. Ti nabaknang a lalaki addaan idi iti adu unay a karnero ken baka; ngem ti lalaki a bassitan iti sanikua awanan iti aniaman no di maymaysa a kabaian a kordero, bassit, a ginatangna. Ket tagtaginayonenna idi dayta a sibibiag, ket dimmakkel a kaduana ken kadua ti annakna, sangsangkamaysada. Manipud iti sangkapisina mangan dayta, ket manipud iti  kopana uminum dayta, ket iti barukongna agidda dayta, ket nagbalin a kas anak a babai kenkuana. Idi agangay maysa a sangaili ti dimteng iti nabaknang a lalaki, ngem liniklikanna ti mangala manipud kadagiti bukodna a karnero ken bukodna a baka tapno isagana dayta a maipaay iti agdaldaliasat a dimteng kenkuana. Gapuna innalana ti kabaian a kordero ti lalaki a bassitan iti sanikua ket insaganana maipaay iti tao a dimteng kenkuana.”​—2 Sam. 12:1-4.

Impapan ni David, a maysa idi pastor, nga agpaypayso ti estoria. Kuna ti maysa a komentarista ti Biblia: “Nalabit masansan a makisarita ni Natan ken ni David tapno agpatulong para kadagidiay biktima iti kinaawan hustisia ken awan pagpatulonganna isu nga impapan ni David a dayta ti immayan ni Natan.” Pudno man dayta, kasapulan latta ni Natan ti kinasungdo iti Dios ken kinatured a makisarita iti ari. Ti estoria ni Natan pinagpungtotna ni David isu a kinunana: “Kas sibibiag ni Jehova, ti lalaki nga agar-aramid iti kastoy maikari a matay!” Kalpasanna, imbaga ni Natan daytoy a nadagsen a sasao: “Sika a mismo ti lalaki!”​—2 Sam. 12:5-7.

Kitaentayo no apay a kasta ti pamay-an a panangtaming ni Natan iti parikut. No ngamin nairaman ti emosiontayo, ditay makapagpanunot a naimbag. Adda pagannayasantayo a mangikalintegan kadagiti kuestionable nga aramidtayo. Ngem gapu iti ilustrasion ni Natan, saan a napupuotan ni David a kinondenarna ti bagina. Nalawag a nakita ti ari a nagdakes ti aramid nga inladawan ni Natan. Ngem idi laeng kinondenar ni David ti bagina nga imbaga ni Natan a ti ilustrasion ket tumukoy iti ari. Naawatan ni David ti kinadagsen ti basolna. Dayta ti timmulong kenkuana nga umawat iti disiplina. Inaminna nga ‘inumsina’ ni Jehova gapu iti pannakikamalalana ken Bat-seba, ken inawatna ti maiparbeng a disiplina.​—2 Sam. 12:9-14; Sal. 51, superskripsion.

Ania ti masursurotayo iti dayta? Panggep ti mangyad-adal iti Biblia a tulongan ti iyad-adalanna a dumteng iti umiso a konklusion. Adda panagraem ni Natan ken David isu a sitataktika a kinasaritana. Ammo ni Natan nga ipatpateg ni David ti kinalinteg ken kinahustisia isu a nangusar iti estoria nga adda epektona iti maysa nga addaan kadagita a galad. Matulongantayo met dagiti nasingpet a tattao a mangtarus iti panangmatmat ni Jehova. Kasano? Gagangay nga ammo dagiti tattao no ania ti umiso. Isu a tulongantay ida a mangusar iti dayta, ket ditay iparikna a nalalaingtayo wenno adda kalintegantayo a mangibaga no ania ti aramidenda. Bay-antayo a ti Biblia saan ket a datayo ti mangibaga no ania ti umiso ken di umiso.

Kangrunaanna, ti kinasungdo iti Dios ti timmulong ken Natan a nangtubngar iti nabileg nga ari. (2 Sam. 12:1) Ti kinasungdo met ti mangpatured kadatayo a mangidepensa kadagiti nalinteg a prinsipio ni Jehova.

INDEPENSANA TI PUDNO A PANAGDAYAW

Agparang a nasinged nga aggayyem da David ken Natan ta pinanagananna pay iti Natan ti maysa kadagiti annakna. (1 Cron. 3:1, 5) Ti damo a pannakadakamat ni Natan iti Biblia ket kaduana ni David. Agpada nga ay-ayatenda ni Jehova. Ammotayo nga agtalek ti ari iti opinion ni Natan gapu ta imbagana iti propeta ti tarigagayna a mangibangon iti templo ni Jehova. “‘Kitaem, ita,’” kinuna ni David, “‘agnanaedak iti balay a sedro idinto ta ti lakasa ti pudno a Dios agnanaed iti tengnga dagiti lupot ti tolda.’ Kalpasan dayta ni Natan kinunana iti ari: ‘Isuamin nga adda ita pusom​—inka, aramidem, agsipud ta adda kenka ni Jehova.’”​—2 Sam. 7:2, 3.

Kas matalek nga agdaydayaw ken Jehova, sisasagana ni Natan a sumuporta iti plano ni David a mangibangon iti umuna a templo ti pudno a panagdayaw ditoy daga. Ngem iti dayta a gundaway, agparang a saan a nagtaud ken Jehova ti imbagana no di ket ti bukodna nga opinion. Iti dayta a rabii, isu ket binilin ti Dios a mangibaga iti naiduma a mensahe iti ari: Saan a ni David ti mangibangon iti templo ni Jehova. Ibangon dayta ti maysa kadagiti annak ni David. Ngem imbaga ni Natan ken David a makitulag ti Dios kenkuana tapno ti tronona ket ‘maipasdek a sititibker agingga iti tiempo a di nakedngan.’​—2 Sam. 7:4-16.

Saan a maitunos iti pagayatan ti Dios ti opinion ni Natan maipapan iti panagibangon iti templo. Ngem saan a nagreklamo ti napakumbaba a propeta no di ket nagpaiwanwan ken ni Jehova ken  nakikooperar iti dayta. Anian a nagsayaat nga ulidan a tuladentayo no ilintegnatayo ni Jehova! Ipakita dagiti simmaruno nga inaramidna kas propeta a nataginayonna ti anamong ti Dios. Kinapudnona, agparang a pinaltiinganna ni Natan, agraman ti managsirmata a ni Gad, a mangiwanwan ken David a mangorganisar iti 4,000 a kumakanta ken tumutokar iti templo.​—1 Cron. 23:1-5; 2 Cron. 29:25.

INDEPENSANA TI KINAARI

Ammo ni Natan a ni Solomon ti sumukat ken Ari David. Isu a nagtignay a dagus idi ginandat ni Adonias nga agawen ti trono idi lakayen ni David. Impakita manen ni Natan ti kinataktika ken kinasungdona. Umuna, imbagana ken Bat-seba nga ipalagipna ken David ti karina a pagbalinen nga ari ti anakda a ni Solomon. Kalpasanna, napan ni Natan ken David ket dinamagna no ni Adonias ti pinilina a sumaruno nga ari. Gapu ta nakita ni David ti kinaserioso ti situasion, binilinna ni Natan ken ti dadduma a nasungdo nga adipenna a pulotanda ni Solomon kas ari ken ipakaammoda dayta kadagiti tattao. Napaay ti kudeta a plano ni Adonias.​—1 Ar. 1:5-53.

NAPAKUMBABA A HISTORIADOR

Umanamong ti kaaduan a da Natan ken Gad ti nagsurat iti 1 Samuel kapitulo 25 agingga iti 31 kasta met ti intero a 2 Samuel 1-24. Maipapan kadagiti naipaltiing a pakasaritaan a nairekord kadagita a libro, mabasatayo: “No maipapan kadagiti pasamak ni David nga ari, dagidiay immuna ken ti naudi, sadiay naisuratda kadagiti sao ni Samuel a pumaparmata ken kadagiti sao ni Natan a mammadto ken kadagiti sao ni Gad a managsirmata.” (1 Cron. 29:29) Dakamaten met ti Biblia a nagsurat ni Natan maipapan “kadagiti pasamak ni Solomon.” (2 Cron. 9:29) Kaipapananna a nalabit nagtultuloy a nagserbi ni Natan iti palasio kalpasan ti ipapatay ni David.

Mabalin nga insurat a mismo ni Natan ti kaaduan nga ammotayo maipapan kenkuana. Ngem adu met ti maammuantayo maipapan kenkuana kadagiti saanna nga insurat. Agparang a napakumbaba a historiador ni Natan. Saan nga ambisioso ta awan panggepna a mangitan-ok iti bagina. Kuna ti maysa a diksionario ti Biblia a nadakamat ni Natan iti Biblia nga awan ti introduksion ken impormasion maipapan iti pamilia ken personal a biagna.

NATIGNAY GAPU ITI KINASUNGDONA KEN JEHOVA

Manipud iti bassit a nabasatayo iti Biblia maipapan ken Natan, ammotayo a napakumbaba ken naregta a nangsuporta iti urnos ti Dios. Inikkan ni Jehova kadagiti nadagsen a responsabilidad. Maparegtatayo a mangutob kadagiti kualidad ni Natan kas iti kinasungdona iti Dios ken ti nauneg a panagraemna iti urnos ti Dios. Ikagumaantayo a tuladen dagita a kababalin.

Nalabit saanka a maibaon a mangtubngar iti nakikamalala nga ari wenno mangpasardeng iti kudeta. Ngem iti tulong ti Dios, makapagtalinaedka a nasungdo kenkuana ken maidepensam dagiti nalinteg a pagalagadanna. Kabaelam met ti agbalin a natured ken nataktika a mannursuro iti kinapudno ken mangidepensa iti pudno a panagdayaw.

[Ladawan iti panid 25]

Kas panangidepensa ni Natan iti kinaari, sitataktika a kinasaritana ni Bat-seba