Netan—Ọzae nọ Ọ Wha Egagọ Uzẹme Haro

O lọhọ tere he re a ta kẹ ohwo nọ o wo ọkwa ologbo inọ o wo ekpehre uruemu gbe nnọ u fo re o nwene. Kọ whọ te sae ta ere kẹ ohwo otioye nọ whọ tẹ riẹ nọ o kpe ọzae jọ re ọ ruẹse ko oware uyoma jọ nọ o ru dhere?

Devidi, ovie Izrẹl o bruẹnwae kugbe Batshẹba, kẹsena aye na o te dihọ. Re Devidi ọ ruẹse ko uzioraha nana dhere, o te ru nọ a ro kpe ọzae Batshẹba, kẹsena ọ tẹ rehọ Batshẹba. Devidi o si uzioraha nana no te emerae buobu, yọ o gbe bi ru iruẹru nọ i te rie wọhọ ovie. Rekọ Jihova o gbolaro kẹ uzioraha na ha. O vi Netan ọruẹaro na nyae ta ẹme kẹ Devidi.

Onana o jọ okolo iruo ho. Dae rehọ iẹ nọ whẹ họ Netan. Fikinọ o dikihẹ abọ Jihova gaga yọ o rri izi ikiẹrẹe riẹ ghaghae, Netan ọ tẹ nyae ta kẹ Devidi eware nọ o ru. Kọ ẹvẹ ọruẹaro na ọ te sae rọ ta ẹme na kẹ Devidi je ru ei vuhumu inọ u gine fo re o kurẹriẹ?

OWUHRẸ NỌ O WO ONAA

Iviena se obe 2 Samuẹle 12:1-25. Dae rehọ iẹe nọ whẹ họ Netan nọ ọ be ta kẹ Devidi inọ: “Ezae ivẹ jọ e jọ okpẹwho jọ, ọjọ ọdafe, ọjọ oyogbere. Ọdafe na o wo owa-erao buobu: rekọ oyogbere na o wo oware ovo ho ajokpa omogodẹ ọvo, ọnọ ọ dẹ. Ọ tẹ yọrọ iẹe [ro], ọ tẹ [ro] eva obọ riẹ gbe ọrọ emọ riẹ; o je lele iei re emu, jẹ rehọ egho riẹ da ame, o ve kiẹzẹ igbama riẹ, ọ tẹ jọ wọhọ ọmọtẹ rọ kẹ e. Ẹdẹ jọ ọrara ọ tẹ kpahe ọdafe na, o ro riẹ re ọ jọ udevie uthuru riẹ na rehọ arao jọ rọ ghọ ọrara na ha, rekọ ọ tẹ  rehọ omogodẹ oyogbere na, o te kpe ei rọ ghọ ọrara riẹ na.”—2 Sam. 12:1-4.

Avro ọ riẹ hẹ, Devidi nọ ọ jọ othuru-igodẹ na o roro nọ oware nana o ginẹ via. Ọzae jọ nọ ọ rẹ ta kpahe eme nọ e rrọ Ebaibol ọ ta nọ: “Ẹsejọhọ Netan ọ jẹ hae nya bru Devidi re o fi obọ họ kẹ ahwo nọ a bi kienyẹ nọ a wo uvumọ ohwo nọ o re fi obọ họ kẹ ae he, yọ Devidi o roro nọ oware nọ o wọ Netan ze oye.” O tẹ make rrọ ere, re Netan ọ sae ta ẹme nọ ọ ta kẹ Devidi na, o gwọlọ nọ o re dikihẹ abọ Jihova gaga je wo udu. Iku nọ Netan o gbe kẹ Devidi na i ru eva dha Devidi thesiwa. O bo nọ: “Epanọ ỌNOWO na ọ rọ na, ohwo nọ o ru oware onana o re whu hrọ.” Kẹsena Netan ọ tẹ ta ẹme nọ ọ whọlọ e riẹ oma: “Whẹ họ ohwo na.”—2 Sam. 12:5-7.

Joma ta kpahe oware nọ o lẹliẹ Netan ta ẹme na kẹe oghẹrẹ utioye. O rrọ bẹbẹ re ohwo nọ o wo uyoyou kẹ omọfa nọ ọ rrọ orivẹ-orọo riẹ hẹ ọ rọwo inọ oware jọ o thọ evaọ usu utioye. Mai kpobi ma rẹ gwọlọ ta ewoma họ oware nọ ma ru thọ. Rekọ ọtadhesẹ Netan na o wọ Devidi brukpe omariẹ. Ovie na ọ ruẹ vevẹ inọ oghẹrẹ uruemu nọ Netan ọ ta kpahe evaọ iku riẹ na u gbo gaga. Devidi o brukpe ọzae nọ a fodẹ evaọ iku na no taure Netan o te ti rovie via kẹe nọ ọye họ ohwo na. Kẹsena Devidi ọ te ruẹ epanọ uzioraha riẹ na o gbẹdẹ te. Onana o tẹ lẹliẹe ruẹrẹ oma kpahe kẹ ọwhọkuo kpobi nọ o ti no obọ Ọghẹnẹ ze. Ọ rọwo nọ uruemu riẹ u dhesẹ nọ ọ “vro ẹme” Jihova ẹkwoma uzioraha riẹ kugbe Batshẹba, kẹsena ọ tẹ jẹ ọwhọkuo rehọ.—2 Sam. 12:9-14; Ol. 51.

Eme ma rẹ sai wuhrẹ no onana ze? Emamọ owuhrẹ Ebaibol o re fi obọ họ kẹ ohwo nọ o bi wuhrẹ ruẹ uzẹme na vuhumu kẹ omariẹ. Netan o wo adhẹẹ kẹ Devidi, oyejabọ nọ ọ rọ ta ẹme na kẹe avọ onaa. Netan ọ riẹ nọ Devidi yọ ohwo nọ o you ẹrẹreokie gbe uvioziẹ. Fikiere ọruẹaro na o te gbiku nọ i re duobọte ohwo nọ o wo iruemu aghae itiena. Mai omamai ma rẹ sai fi obọ họ kẹ amọfa re a rri eware wọhọ epanọ Jihova o rri rai. Ẹvẹ ma sai ro ru ere? Ahwo buobu a riẹ oware nọ u woma, fikiere ma rẹ sai fi obọ họ kẹ ae re a rọ iroro obọrai vuhu oware nọ u woma, rekọ ma re ru wọhọ ẹsenọ ma woma vi ai hi hayo kọ ma be vuẹ ae oware nọ a re ru. Ebaibol na o bi wuhrẹ omai oware nọ u woma gbe onọ u yoma, orọnikọ iroro obọmai hi.

Oware nọ o mai fi obọ họ kẹ Netan sae ta oware uyoma nọ ovie na o ru kẹe họ, o dikihẹ abọ Jihova gaga. (2 Sam. 12:1) Epọvo na re, otẹrọnọ ma se egagọ Ọghẹnẹ gboja, ma ti wo udu nọ ma te rọ wha ite ikpehru Jihova haro.

ỌNỌ Ọ WHA EGAGỌ UZẸME HARO

O wọhọ nọ Devidi avọ Netan a jọ egbẹnyusu ekpekpe, keme Devidi ọ rọ odẹ Netan se ọmọzae riẹ jọ. (1 Irv. 3:1, 5) Oke ọsosuọ nọ a rọ jọ Ebaibol na fodẹ Netan, ọ jọ kugbe Devidi. Aimava a you Jihova. Ma riẹ nọ ovie na ọ rẹ rọwo ẹme Netan gaga, oyejabọ nọ ọ rọ vuẹ Netan inọ ọ gwọlọ bọ etẹmpol kẹ Jihova. Devidi ọ ta nọ “’Whọ ruẹ enẹna mẹ be ria uwou nọ a rehọ Sida bọ, rekọ etehe-Ọvọ Ọghẹnẹ ọ rọ evaọ uwou-udhu.’ Netan ọ tẹ ta kẹ ovie na nọ, ‘Nya, who ru epanọ o rọ owhẹ eva kpobi, keme ỌNOWO na ọ rọ gbe owhẹ.’”—2 Sam. 7:2, 3.

Netan yọ ohwo nọ o jẹ rọ eva riẹ kpobi gọ Jihova, fikiere, avọ evawere ọ tẹ ta kẹ Devidi nọ jọ ọ bọ uwou egagọ kẹ Jihova, onọ o te jọ orọ ọsosuọ evaọ akpọ na soso. Rekọ, o wọhọ nọ orọ eva Netan ọ ta viukpenọ ọ rẹ nọ mi Jihova. Evaọ aso ọyena, Ọghẹnẹ ọ tẹ ta kẹ ọruẹaro na nọ jọ o zihe nyae vuẹ Devidi inọ ọye ọ te bọ etẹmpol na ha. Ọmọ Devidi họ ọnọ ọ tẹ bọ etẹmpol na. Netan ọ tẹ jẹ ta kẹ Devidi ovie na nọ Ọghẹnẹ ọ te reọvọ kugbei ọ vẹ ‘te rehọ uvie riẹ mu bẹdẹ.’—2 Sam. 7:4-16.

Ẹme nọ Netan ọ ta inọ Devidi họ ọnọ ọ te bọ etẹmpol na o rọwo kugbe oreva Ọghẹnẹ hẹ. Avọ omaurokpotọ, Netan ọruẹaro na ọ go ho, ọ rọwo ẹjiroro Jihova je ru lele iei. Onana yọ emamọ oriruo nọ ma rẹ rọ aro kele otẹrọnọ Jihova ọ rọ edhere jọ kẹ omai ọkpọvio. Eware efa nọ Netan o ru i dhesẹ nọ Jihova ọ gbẹ jẹ rehọ iẹe  ru iruo wọhọ ọruẹaro. Evaọ uzẹme, u muẹro nọ Jihova ọ rọ ẹzi riẹ kpọ Netan gbe Gad eruẹaro na re a ta kẹ Devidi inọ jọ ọ salọ egba-ile nọ i bu te idu ene (4,000) nọ e rẹ suile evaọ etẹmpol na.—1 Irv. 23:1-5; 2 Irv. 29:25

ỌNỌ Ọ JẸ THỌ OHWO NỌ UVIE NA U TE

Netan ọ riẹ nọ Solomọn họ ọnọ uvie na u ti te nọ Devidi o te whu no. Fikiere nọ Adonija ọ gwọlọ fru uvie na rehọ okenọ Devidi ọ kpako gaga no, Netan ọ tẹ nwane j’owọ kpata kpata re ọ whaha oyena. Netan o ru onana avọ onaa re, yọ ọruẹrẹfihotọ Ọghẹnẹ nọ o se gboja o wọ riẹ ru ei. Oware ọsosuọ nọ o ru họ, ọ tuduhọ Batshẹba awọ inọ jọ ọ kareghẹhọ Devidi kpahe eyaa nọ ọ ya inọ Solomọn ọmọzae rai họ ọnọ ọ te jọ ovie. Kẹsena Netan ọ tẹ nyae nọ Devidi sọ ọye ọ salọ Adonija re ọ rehọ ẹta riẹ. Nọ Devidi ọ ruẹ epanọ ẹme na ọ gbẹdẹ te, ọ tẹ ta kẹ Netan gbe idibo riẹ efa re a rọ Solomọn mu ovie je whowho iei via. Enẹ omaa Adonija o rọ raha ku ei.—1 Iv. 1:5-53.

OGBIKU NỌ O WO OMAUROKPOTỌ

Ahwo buobu a rọwo inọ Netan avọ Gad a kere obe 1 Samuẹle izou 25 rite 31 gbe obe 2 Samuẹle soso. Ebaibol na ọ ta kpahe ikuigbe nọ e rrọ oria ikere yena inọ: “Whaọ iruẹru Devidi ovie na, nọ emuhọ te ekuhọ, a kere irai fihọ obe iruẹru ivie o rọ Samuẹle ọruẹ-ude na, gbe obe iruẹru ivie o rọ Netan ọruẹaro na, gbe obe iruẹru ivie o rọ Gad ọruẹ-ude na.” (1 Irv. 29:29) Ebaibol ọ ta re inọ Netan o kere kpahe “iruẹru Solomọn.” (2 Irv. 9:29) Onana u dhesẹ nọ ẹsejọhọ Netan o gbe je ru iruo evaọ ighẹ ovie na makọ nọ Devidi o whu no.

O sae jọnọ eware buobu nọ ma riẹ kpahe Netan yọ eware nọ ọye ọvo o kere. Ghele na, eware jọ nọ o kere he i dhesẹ oghẹrẹ ohwo nọ ọ jọ k’omai. U muẹro inọ Netan yọ ohwo nọ o wo omaurokpotọ, ọ jẹ gwọlọ okpodẹ hẹ. Wọhọ epanọ obe jọ nọ o rẹ ta kpahe eme Ebaibol o ta, a jọ Ebaibol ta kpahe oghẹrẹ ohwo nọ Netan ọ jọ họ, yọ a fodẹ uviuwou nọ o no ze he.

Ọ ROMA KPOTỌ RU LELE ỌRUẸRẸFIHOTỌ JIHOVA

Umutho eware nọ a ta kpahe Netan evaọ Ebaibol na i dhesẹ nọ ọ jọ ohwo nọ o wo omaurokpotọ yọ ọ jẹ rọ ajọwha ru lele eruẹrẹfihotọ Jihova. Jihova Ọghẹnẹ ọ kẹ riẹ ewha-iruo ilogbo. Daoma roro didi kpahe emamọ iruemu Netan, wọhọ omaurokpotọ rọkẹ eruẹrẹfihotọ Jihova gbe uyoyou rọkẹ izi ikiẹrẹe riẹ. Daoma rọ aro kele iruemu nana.

Ẹsejọhọ a ti vi owhẹ nyae whọku ovie nọ o bruẹnwae he hayo whaha ohwo nọ ọ gwọlọ fru uvie rehọ họ. Rekọ, avọ obufihọ Ọghẹnẹ, whọ te roma kpotọ kẹ eruẹrẹfihotọ Ọghẹnẹ je ru lele izi ikiẹrẹe riẹ. Whọ vẹ te jọ ohwo nọ o bi wuhrẹ uzẹme na avọ udu gbe onaa, jẹ be wha egagọ uzẹme haro.

[Uwoho nọ o rrọ ẹwẹ-obe avọ 25]

Wọhọ ọnọ ọ jẹ thọ ohwo nọ uvie na u te, Netan ọ rehọ onaa ta ẹme kẹ Batshẹba