Natani Muntu Washinshika Nawa Mukwakutwala Hambidi Kudifukula Kwalala

Chakala kufwisha muntu wasweja ñovu namuloña nenu nakwila yuma yatama nawa watela kuhimpa. Komana munateli kuhosha namuntu wamuchidiwu neyi muneluki nenu wajahili muntu kulonda yadamwini?

Mwanta Davidi wamuIsarela wakushankulu welili wuvumbi naBatisheba nawa mumbanda wemitili. Hakwila nawu yasweki nshidi, Davidi wajahili nfumwa Batisheba nawa wamusendeli kulonda yekali iñodindi. Davidi watwalekeluhu kukoña yuma yatama hadi tukweji twatuvulu nawa chakadi nikujina watwalekeluhu kukalakala nyidimu yindi. Hela chochu, Yehova halekeli nshidi yindi yihiti chakadi kuyisololaku. Watemesheli kaprofwetu kindi Natani kuya nakuhosha naDavidi.

Iwu wadiña mudimu wakala. Difwikijenu nenu yenu Natani. Hakwikala washinshika kudi Yehova nikulondela nshimbi jaloña, chakadi nikujina chamuleñeleli Natani yamwanukishi Davidi hanshidi yakoñeliyi. Indi kaprofwetu wadi kwila ñahi mwenimu hakwila yamushiki Mwanta Davidi hamuchima nakumuleja nindi watela kubalumuka mumuchima?

NTAÑISHI WABABALA

Komana kwila mutaña mukanda wa 2 Samweli 12:1-25 hadi maminiti antesha nehi? Difwikijenu nenu yenu Natani nawa munakumuleja Davidi iyi nsañu nenu: “Hamukala wumu hadiñi amayala ayedi, wumu mukwakuheta, mukwawu kazweñi. Mukwakuheta wadiñi namayinda nimataña amavulu; kazweñi hadiñi nachumaku, wadiñi nakana kamukoku kamukaji kamu hohu kakulanda chakulanda, hakukalela. Hikakukulila kudi yena hamu nawanyanindi; kadiili nindi hamu hikakunwinaña  mulupasa lwindi yomweni, hikakukamaña hantulu yindi, hikakwikala neyi mwanindi wamumbanda. Kweyala waheta kwenjili mukwakwenda. Hakuleka kukwata chimuna chamwiyinda dindi, hela chamwitaña dindi, adiishi mukwakwenda nenzi kudi yena, hakukwata kana kamukoku keyala wakazweñi, hakumudiisha owu iyala wenjili kudi yena.”—2 Sam. 12:1-4.

Davidi—wadiña kabiña, chakadi nikujina wakuhweleleli nindi iyi nsañu yalala. Ntañishi wansakililu wumu wahosheli nindi, “Hadaha Natani wayileña kudi Davidi nakumulembelelaku ona muntu wakatishiluwu nawa wadi kubula kufwetawu, nawa Davidi welukili nindi amwendeleli yoyena.” Hela chochu, Natani wateleleli kumwovwahila Nzambi nikuhamuka hakwila nawu yahoshi namwanta neyi cheliliyi. Nsañu yamulejeluwu Davidi kudi Natani yamuhilishili. Wahosheli nañovu nindi, “Chahandayi Yehova kwaamu, owu iyala nakoñi chumichi nateli kufwa.” Kuhiñahu, Natani wahosheli mazu amutapili kumuchima nindi: “Iyalowu yeyi.”—2 Sam. 12:5-7.

Talenu chuma chaletesheli Natani yahoshi haniku kukala. Chakala nankashi kudi muntu wunaluwañeshuwu muyitoñojoka kudi mukwawu kumona kukala kwindi munjila yayiwahi. Wejima wetu twaleyaleyaña kulonda tudiyiñishi etu aweni neyi tunakwila yuma yatama. Ilaña chakutalilahu chaNatani chamuleñeleli Davidi kudifwisha namuloña hayililu yindi chakadi kwiluka. Mwanta welukili chikupu nindi yililu yashimwiniyi Natani yatama chikupu. Hela chochu, chelili Davidi nadifwishi dehi namuloña, dihafumini Natani yahoshi nindi ichi chishimu chakundamini kudi mwanta. Davidi dihelukiliyi nindi wakoñeli nshidi yahamesu bwi-i. Chumichi chamuleñeleli yeteji kufumba. Welukili nindi ‘wamudiwili’ Yehova kuhitila muyuma yakoñeliyi naBatisheba nawa wetejeli kumufumba.—2 Sam. 12:9-14; Mas. 51.

Chumanyi chitunateli kudizilaku? Ntañishi waBayibolu watela kufwila kukwasha antiyilili jindi kulonda atiyishishi chikuma. Natani wamulemesheli Davidi nawa wahosheli nindi mukubabala. Natani welukili nindi Davidi wakeñeli kuloña niwuñanji. Kuhitila muchishimu, kaprofwetu washindameneni haniyi yililu yayiwahi. Anetu nawa tunateli kukwasha antu akweti nyichima yayiwahi eluki Yehova chamonañayi yuma. Munjilanyi? Kuhitila mukuhosha hayuma yayiwahi yelukawu nawa bayi tumwekesha netu twayibadika muyililu hela kuspirituku. Bayibolu diyi yatulombolaña kutalisha hayuma yayiwahi hela yatama bayi yitoñojoka yetuku.

Kumwovwahila Yehova kwamukwashili Natani kumufumba mwanta wañovu. (2 Sam. 12:1) Chililu chakwovwahila chinateli kutukwasha ninetu kwikala ahamuka hakwimenaku nshimbi jaYehova jaloña.

MUKWAKUTWALA HAMBIDI KUDIFUKULA KWALALA

Chakadi nikujina, Davidi niNatani adiñi nakutiyañana chiwahi, Davidi watumbili mwanindi wumu nindi Natani. (1 Kushi. 3:1, 5) Mpinji yatachi yamutenawu Natani muBayibolu, wadiña naDavidi. Ejima wawu amukeñeli Yehova. Chakadi nikujina mwanta wakuhweleleli wunsompeshi waNatani muloña wamulejeli kaprofwetu nindi nakukeña kutuñulula tembeli yaYehova. Davidi wahosheli nindi, “Tiya dinu, ami nashakama mwitala danyisida, kwinza chimbañu chaNzambi chashakama mumahina. Natani hakumwila mwanta, nindi, Yaku wakeli chejima chidi mumuchima weyi, muloña Yehova wudi naneyi.”—2 Sam. 7:2, 3.

Hakwikala mukwakudifukula waYehova washinshika, Natani wetejeli namuzañalu yitoñojoka yaDavidi yakutuña tembeli yatachi yakudifukula kwalala hanu hamaseki yahaya nyaka. Hela chochu, hayina mpinji Natani wamwekesheli hatooka yitoñojoka yindi chatela yahosheleña mwijina daYehova. Hawufuku weniwu, Nzambi walejeli kaprofwetu kindi kuya nakushimuna nsañu yacheñi kudi mwanta nindi: Davidi hakatuña tembeli yaYehovaku. Muntu wakatuña tembeli wukekala mwana wumu hakachi kanyana kaDavidi. Ilaña Natani washimwini nindi Nzambi watiyañeni chitiyañenu naDavidi nindi itanda dindi “dakakola ngu haya nyaka.”—2 Sam. 7:4-16.

Nkeñelu yaNzambi yaambukili nawunsompeshi waNatani kutalisha hakutuña tembeli. Hela chochu, iwu kaprofwetu wadizoza wetejeli nkeñelu yaYehova nikuzata kwesekeja nankeñelu yeniyi chakubula kutoba. Ichi hichakutalilahu chachiwahi chitwatela kwimbujola neyi Nzambi nakutufumba. Yililu  yamwekesheliyi Natani neyi kaprofwetu yamwekeshaña nawu hajimbesheli wuselewa waNzambuku. Kafwampi, chinakumwekana nawu Yehova wamoneneni Natani, hamu niGadi mukwakumona, kumuleja Davidi yaloñeshi añimbi 4,000 mumudimu watembeli.—1 Kushi. 23:1-5; 2 Kushi. 29:25.

MUKWAKUKIÑA WANTA

Natani welukili nindi Solomoni wakaswana hetanda daDavidi washinakajili. Dihafumini Natani yanyakali kufuukulahu mwakwilila hampinji yakeñeleñayi Adoniya kuhukula itanda daDavidi muyaaka yindi yawushinakaji. Welili mwenimu mukubabala nawa nikashinshi. Chatachi wamulejeli Batisheba nindi yamwanukishi Davidi hachikaninu chindi chakaniniyi mwanindi Solomoni kwikala mwanta. Kuhiñahu, Natani yomweni weñilili mwadiñi mwanta kulonda yamwihuli Davidi neyi chakwila wamwitejeli Adoniya kumuswana. Chelukiliyi hakulema kwaniyi nsañu, mwanta washinakajili walejeli Natani niambuña amakwawu ashinshika kumuwahisha Solomoni nakumuswanyika hawanta. Adoniya wakeñeleña kuswana hawanta kuhitila muñovu jindi amukañesheli.—1 Anya. 1:5-53.

MUKWAKUSONEKA NSAÑU WADIZOZA

Natani niGadi ayinkeli mudimu wakusoneka mukanda wa 1 Samweli kapetulu 25 nakushika ku 31 kubombelahu nimukanda wejima wa 2 Samweli. Kuhosha hansañu yonenewa yasonekawu munyikanda, yahosha nawu: “Nsañu jamwanta Davidi, nijakusambila nijakukuminina, talenu, anajisoneki kumazu aSamweli mukwakumona, nikumazu akaprofwetu Natani, nikumazu aGadi mukwakumona.” (1 Kushi. 29:29) Natani amulumbulula cheñi munsañu “jaSolomoni.” (2 Kushi. 9:29) Chakadi nikujina, chumichi chinatalishi mukwila nawu Natani watwalekeluhu kudikita munsañu jamuchota chawanta nihanyima yakufwa kwaDavidi.

Yuma yayivulu yitweluka hadi Natani atela ayisonekeli kudi kaprofwetu yomweni. Hela chochu, kubula kutiyakana munsañu jikwawu kwatuleñelaña kwilukilahu yuma yayivulu hadi yena. Chakadi nikujina, Natani wadiña mukwakusoneka nsañu wadizoza. Hakeñeleña kuya mpuhuku. Dikishonali yimu yahosha haBayibolu yahosha nawu amushimuna muBayibolu chakadi kulumbulula nikushimuna chisaka chindi. Kwosi chuma chitweluka hachihandilu chaNatanuku.

KUMWOVWAHILA YEHOVA KWAMUSAÑUMWINI KUZATA NYIDIMU YINDI

Kwesekeja nansañu yantesha yitunadizi hadi Natani kufuma muNsona, chinamwekani hatooka nawu wadiña wadizoza ilaña wadikita hakukiña ntanjikilu yaNzambi. Yehova Nzambi wamwinkeli nyidimu yalema chikupu. Toñojokenuña hayililu yaNatani, yidi neyi kumwovwahila Nzambi nikuhameka chikupu yuma yakeñañayi Nzambi. Fwilenu kwimbujola yililu yamuchidiwu.

Hadaha hiyanateli kuyinka mudimu wakufumba anyanta ayivumbi hela kukañesha antu anakukeña kuswana wanta kuhitila mukuzatisha ñovu jawuku. Hela chochu, kuhitila mukuyikwasha kudi Nzambi, munateli kumwovwahila Nzambi nikulemesha nshimbi jindi jaloña. Munateli kwikala cheñi ahamuka nawa ababala, ntañishi wansañu yalala nawa mukwakuhakwilaku kudifukula kwalala.

[Mwevulu wudi hefu 25]

Natani hakwikala mukwakukiña wanta, wahosheli naBatisheba mukubabala