Natan​—Matoor a Mananuporta na Tuan Panagdayew

Mairap a kombinsien so sakey a toon walaan na atagey a posisyon ya aliway gagawaen to tan kaukolan toy manguman. Makpel ka kasin mitongtong ed sikato anggano antam a wala lay impapatey to pian protektaay reputasyon to?

Akikalugoran tan alukonan nen Arin David si Bat-sheba. Pian niyamot itan a kasalanan, impapatey nen David so asawa nen Bat-sheba, insan to inala bilang asawa to. Pigay bulan ya inyamot nen David itan a kasalanan tan intultuloy ton ginawa so kimey to bilang ari. Balet ag-imbaliwala nen Jehova so kasalanan to. Imbaki toy propetan Natan pian katongtongey David.

Aliwan mainomay itan a gawaen. Sika pay onlad kipapasen nen Natan. Say katooran ed si Jehova tan katutulok ed saray estandarte to so amakiwas ed si Natan pian ipamoriad si David iray kasalanan to. Panon itan a ginawa na propeta, tan panon ton atulongay Arin David a magbabawi?

MARUNONG A MANAGBANGAT

Salim pan basaen so 2 Samuel 12:1-25. Imadyin mon sika si Natan, tan ibagam iyan ilustrasyon ed si David: “Wala so duaran lalaki ed sakey a syudad; say sakey mayaman, et say sakey duka. Say mayaman a laki walaan na mapalalo a karaklan na karnero tan baka. Balet say duka a laki andian a balot, nilikud so sakey a melag a karnero a kabatyan, sikato a sinaliw to tan iniwi to: et binmaleg a pati sikato, tan pati saray anak to; angan ed dili a tinapay to, tan inminum ed dili ya ongot to, tan dinmukol ed akwalan to, tan wala ed sikato a singa anak a bii. Et linma so sakey a [sangkaili] ed  mayaman a laki, et kinawanan to so mangala ed saray dili a karnero to tan saray dili a baka to, pian itarya to a nipaakar ed [sangkaili] a laki a linma ed sikato, no ag ingen inala to so karnero na duka a laki tan sikato so intarya to nipaakar ed laki a linma ed sikato.”​—2 Sam. 12:1-4.

Datin pastol si David, tan nayarin inisip ton aktual ya agawa iman. Oniay opinyon na sakey a komentarista: “Nayarin dati lan gagawaen nen Natan so onapela parad saray biktima na ag-inkahustisya, kanian say amta nen David et saman so gagala to.” No bilang ta tua itan, siansian kaukolan nen Natan so pakpel tan katooran ed Dios pian nibaga itan ed ari. Lapud nadngel nen David, sikatoy sinmanok a maong: “Unong a si Jehova mabilay, say laki a nanggawa na saya sikato so manepeg ya ompatey.” Kayari to et oniay makapabiglan imbaga nen Natan: ‘Sika iman a laki!’​—2 Sam. 12:5-7.

Akin ya ontan so paraan na impangipasabi nen Natan ed problema? Amta tayon aliwan mainomay so pangibaga ed lingo na kaaro. Sakey ni, walay tendensia tayon ikatunongay aliwan ginawa tayo. Balet lapud ilustrasyon nen Natan, ag-aliklikas nen David ya inukom toy sarili to. Amoria na ari ya samay toon tinukoy nen Natan et talagan aliway ginawa to. Kayarin imbalikas nen David so opinyon to, insan labat impaamta nen Natan a say tutukoyen na ilustrasyon et si David. Diad satan, amoria nen David so kabelat na kasalanan to. Satan so tinmulong ed sikaton mabulos ya awaten so disiplina. Lapud impikalugoran tod si Bat-sheba, inamin ton talagan “minudmora” toy Jehova, tan inawat toy makanepegan a disiplina.​—2 Sam. 12:9-14; Sal. 51, superskripsyon.

Antoy naaralan tayod saya? Say gagala na sakey a managbangat na Biblia et tulongan so estudyante ton nawalaay dugan konklusyon. Lapud rerespetoen nen Natan si David, mataktikay paraan na impitongtong to. Amta nen Natan ya papablien nen David so inkatunong tan hustisya. Kanian sikatoy angusar na ilustrasyon ya amta ton mangapekto ed sakey ya walaay ontan iran kualidad. Nayarian tayo met a tulongan iray masimoon ya totoon talosay panmoria nen Jehova. Panon? Tulongan tayo ran usarey pakatebek dan mangibiig ed no antoy duga, agtayo ra didiktaan. Say basiyan tayo ed no antoy duga tan aliwa et say Biblia, aliwan say sarilin opinyon tayo.

Say manunan tinmulong ed si Natan pian simbawaen so makapanyarin ari et say katooran tod Dios. (2 Sam. 12:1) Ontulong met ed sikatayo so katooran pian makpel tayon nidepensay matunong iran prinsipyo nen Jehova.

MANANGIDEPENSA NA TUAN PANAGDAYEW

Mapatnag ya maapit a sankaaroy Natan tan David ta nginaranan nen David so sakey ed saray anak to a Natan. (1 Awa. 3:1, 5) Say unonan impanalambit na Biblia ed si Natan et sanen sikatoy kaiba nen David. Parehon inaro day Jehova. Mapatnag ya panmamatalkan na ari so opinyon nen Natan, ta sikatoy angipaamtaan nen David ya talagan labay toy mangipaalagey na templo parad si Jehova. Inkuan to: “Nengnengen mo natan, siak manaayam ak dia ed sakey ya abung a cedro, balet say kaban na Dios manaayam ed loob na saray kubongkubong.” Oniay inyebat nen Natan: “Onla ka, gawaen mo so amin ya wala ed pusom; ta si Jehova wala ed sika.”​—2 Sam. 7:2, 3.

Bilang matoor a managdayew nen Jehova, sinuportaan nen Natan so plano nen David ya mangipaalagey na sankaunaan ya templo parad tuan panagdayew. Balet diad sayan pankanawnawa, say imbaga nen Natan et sarili ton opinyon aliwan say imbaga nen Jehova ed sikato. Diad saman lanlamang a labi, ingganggan na Dios so propeta to ya ipasabi so duman mensahe ed ari: Aliwan si David so mangipaalagey na templo nen Jehova. Say manggawad satan et sakey ed saray anak to. Anggaman ontan, impaamta nen Natan ya misipanan so Dios ed si David pian say panarian to et “niletneg lawas.”​—2 Sam. 7:4-16.

Say opinyon nen Natan nipaakar ed no siopay mangipaalagey ed templo et agmitunosan ed linawa na Dios. Anggaman ontan, agnanreklamo iyan mapaabeban propeta. Sikatoy tinmulok tan sinmuporta ed gagala nen Jehova. Agta maabig itan ya aligen no bilang ta sikatayoy kaukolan ya simbawaen na Dios? Nanengneng ed saray sinmublay  a ginawa nen Natan ya agnaandi so panangabobon na Dios ed sikato. Diad tua, nayarin tinuro nen Jehova si propetan Natan tan Gad ya mangiwanwan ed si David diad pangorganisa ed 4,000 a managtogtog ed templo.​—1 Awa. 23:1-5; 2 Awa. 29:25.

INDEPENSA TOY MAKANEPEGAN YA ARI

Amta nen Natan a si Solomon so manepeg ya onsublay ed si Arin David a manuley. Kanian sanen sasalien a samsamen nen Adonias so pananguley ed masiken lan David, tampol ya kinmiwas si Natan. Impatnag to lamet so inkamataktika tan katooran. Say inmunan ginawa to et binilin toy Bat-sheba ya ipanonot ed si David imay sipan ton say onsublay ya ari et si Solomon. Insan sikatoy linman mismo ed si David pian kompirmaen no kasin inabuloyan ton manari si Adonias. Amoria nen David ya seryoso lay nagagawa, kanian ingganggan toy Natan tan arum ni ran matoor ya lingkor ton lanaan tan ideklaran ari si Solomon. Kanian ag-atuloy so plano nen Adonias.​—1 Ara. 1:5-53.

MAPAABEBAN HISTORYADOR

Amta na dakel ya insulat nen Natan tan Gad so 1 Samuel kapitulo 25 anggad 31, ontan met ed interon libro na 2 Samuel. No nipaakar ed saray pinuyanan a salaysay a nirekord ed saratan a libro, oniay nabasa: “Saray gawa nen David ya ari, unona tan kaunoran, nia nisulat ira dia ed impanbilay nen Samuel a managnengneng, tan dia ed impanbilay nen Natan a propeta, tan dia ed impanbilay nen Gad a managnengneng.” (1 Awa. 29:29) Unong ed Biblia, si Natan met so angisulat ed “saray gawa nen Solomon.” (2 Awa. 9:29) Kabaliksan na saya a nayarin aktibo nin nanlingkor si Natan diad palasyo anggan sanen inatey lay David.

Maslak ed saray impormasyon ya amta tayod si Natan et nayarin sikaton mismo so angisulat. Balet, walay naaralan tayod agto impangisulat na arum iran detalye nipaakar ed sikato. Mapatnag a sikatoy sakey ya mapaabeban historyador tan agto pinilalek so magmaliw a bantog. Unong ed sakey a diksionaryo na Biblia, no sikatoy sasalambiten ed Kasulatan, “anggapoy introduksion nisay impormasyon nipaakar ed pamilya to.” Anggapoy amta tayo nipaakar ed personal a bilay nen Natan.

KINMIWAS LAPUD KATOORAN ED SI JEHOVA

Anggaman daiset so impormasyon a nabasa tayod Kasulatan nipaakar ed si Natan, anengneng tayon sikatoy mapaabeba balet ta makpel a manangidepensa ed saray uksoyan na Dios. Sikatoy inikdan na Dios a Jehova na saray importantin responsabilidad. Nodnonoten iray kualidad nen Natan, singa say katooran tod Dios tan panamabli tod saray estandarte To. Tan panggunaetan tayon aligen iratan a kualidad.

Nayarin agmo kaukolay manimbawa na sakey ya arin akikalugoran odino mangamper ed toon manasamsam ed pakauley. Balet, tulongan ka na Dios ya makapanmatoor tan mangidepensa ed matunong iran estandarte to. Magmaliw ka met ya makpel, marunong a managbangat na katuaan, tan mananuporta na tuan panagdayew.

[Litrato ed pahina 25]

Pian idepensay makanepegan ya ari, mataktikan kinatongtong nen Natan si Bat-sheba