Natan apoia adorasaun neʼebé loos ho laran-metin

La fasil duni atu halo mane ida neʼebé iha kbiit atu rekoñese katak nia halo sala ruma no nia presiza hadiʼa ninia hahalok. Se Ita hatene katak mane neʼe oho ema ida atu proteje ninia naran, Ita sei brani atu koʼalia ho nia ka lae?

Liurai David husi nasaun Israel antigu halo sala-foʼer ho Batseba no nia sai isin-rua. Atu subar sira-nia sala, David halo planu hodi Batseba nia laʼen mate iha funu no tuirmai nia foti Batseba atu sai nia feen. Ba fulan balu, David kontinua halaʼo nia knaar nuʼudar liurai no la fó-hatene ba ema ida kona-ba ninia sala. Maibé Maromak Jeová la taka matan ba David nia sala. Nia haruka ninia profeta Natan atu ajuda David komprende tansá mak sala neʼebé nia halo boot tebes.

Knaar neʼe laʼós buat neʼebé fasil. Hanoin toʼok katak Ita mak Natan. Tanba Natan laran-metin ba Jeová no hakarak atu apoia Maromak nia ukun-fuan, ida-neʼe book nia atu fó-hanoin David kona-ba ninia sala. Oinsá mak profeta Natan bele halo ida-neʼe, no oinsá mak nia bele ajuda Liurai David atu komprende katak nia presiza arrepende ninia sala?

HANORIN HO MATENEK

Diʼak atu uza minutu balu atu lee 2 Samuel 12:1-25. Hanoin toʼok katak Ita iha Natan nia fatin no konta istória tuirmai neʼe ba David: “Iha mane naʼin-rua neʼebé hela iha sidade ida, mane ida riku, no ida seluk kiak. Mane neʼebé riku iha bibi no karau barak; maibé mane neʼebé kiak iha deʼit bibi-oan inan ida, neʼebé nia sosa. No nia tau matan didiʼak ba bibi neʼe, no bibi neʼe sai boot hamutuk ho nia no ninia oan sira. Bibi neʼe han husi mane neʼe nia hahán, no hemu husi ninia kopu, no toba iha  ninia hirus-matan, no bibi neʼe sai hanesan oan-feto ba nia. Depois tempu balu, bainaka ida mai vizita mane riku. Maibé, duké foti ninia bibi ka karau rasik atu prepara ba ninia bainaka, nia foti mak mane kiak nia bibi-oan no prepara ida-neʼe ba ninia bainaka neʼebé mai vizita nia.”—2 Sam 12:1-4.

Liurai David hanoin katak istória neʼe loos. Uluk David rasik mós halo serbisu nuʼudar bibi-atan. Tan neʼe, Natan nia istória halo David hirus tebes, no nia hatete: “Hanesan Jeová neʼebé moris, mane neʼebé halo ida-neʼe merese mate!” Depois neʼe, Natan hatete ho aten-brani ba David: “Ita rasik mak mane neʼe!” (2 Sam 12:5-7) Ema ida neʼebé fó komentáriu kona-ba Bíblia hatete katak karik Natan iha toman atu bá hasoru David hodi husu ajuda kona-ba ema sira neʼebé hetan susar no la iha ema seluk atu ajuda sira. Maski Natan halo ida-neʼe ka la halo, maibé nia presiza nafatin hatudu laran-metin no aten-brani atu koʼalia ba liurai iha dalan hanesan neʼe.

Hanoin toʼok tansá Natan koʼalia kona-ba David nia problema iha dalan hanesan neʼe. Baibain, se ema ida nia laran monu ba ema seluk, susar ba nia atu iha hanoin neʼebé loos kona-ba ninia situasaun. Ita hotu dala ruma fó razaun oioin hodi hatudu katak ita-nia hahalok la sala. Maibé, Natan nia istória halo David atu komprende ho klaru katak ema riku nia hahalok mak sala duni, maski David seidauk hatene katak ida-neʼe kona-ba nia an rasik. Kuandu Natan fó sai katak mane riku nia hahalok neʼe kona-ba liurai David rasik, mak David foin komprende katak ninia hahalok sala boot tebes, no ida-neʼe ajuda nia atu iha hanoin neʼebé loos hodi bele simu dixiplina. David rekoñese katak buat neʼebé nia halo ho Batseba la hatudu respeitu ba Jeová, no nia prontu atu simu dixiplina.—2 Sam 12:9-14; liafuan antes atu loke Salmo 51.

Ita aprende saida husi istória neʼe? Kuandu ita hanorin Bíblia ba ema, ita-nia hakarak mak atu ajuda sira atu bele hanoin rasik kona-ba problema no komprende saida mak loos no sala. Natan iha respeitu David, no koʼalia ba nia ho matenek. Natan hatene katak David hadomi justisa no buat neʼebé loos. Nuneʼe, Natan konta istória neʼe atu book David neʼebé iha hahalok hanesan neʼe. Ita mós bele ajuda ema seluk atu komprende dalan neʼebé Jeová hanoin. Oinsá mak ita bele halo ida-neʼe? Tanba ema barak hatene kona-ba saida mak loos no sala, ita bele ajuda sira atu hanoin saida mak sira presiza halo. Maibé, kuandu ita halo ida-neʼe, ita lakohi halo sira sente katak ita matenek liu fali sira, ka ita iha direitu atu hatete ba sira saida mak sira presiza halo. Tuir loloos, Bíblia mak fó-hatene ita saida mak loos no saida mak sala, laʼós ita-nia opiniaun rasik.

Tanba Natan laran-metin ba Maromak, ida-neʼe ajuda nia atu fó dixiplina ba liurai boot. (2 Sam 12:1) Kuandu ita laran-metin ba Jeová, ida-neʼe mós sei ajuda ita atu kaer metin ba ninia matadalan sira ho aten-brani.

DEFENDE ADORASAUN NEʼEBÉ LOOS

Buat neʼebé hatudu katak David no Natan mak belun neʼebé diʼak, neʼe mak David tau naran “Natan” ba ninia oan ida. (1 Crôn 3:1, 5) Dala primeiru neʼebé Bíblia temi kona-ba Natan, nia hamutuk ho David. Sira naʼin-rua hadomi Jeová. Ita hatene katak David hafolin Natan nia hanoin tanba nia fó-hatene ba profeta neʼe kona-ba ninia hakarak atu harii templu ba Jeová. David hatete: “‘Haree, haʼu hela iha uma neʼebé halo husi ai-sedru, maibé Maromak loos nia arka hela iha tenda neʼebé halo husi hena.’ Ho nuneʼe Natan hatete ba liurai: ‘Buat hotu neʼebé iha Ita-nia laran, halo bá, tanba Jeová hamutuk ho Ita.’”—2 Sam 7:2, 3.

Profeta Natan serbí Jeová ho fiar-metin, tan neʼe nia prontu atu apoia David nia planu atu harii templu primeiru iha rai atu uza ba adorasaun neʼebé loos. Maibé iha situasaun neʼe, Natan fó sai ninia hanoin rasik, laʼós buat neʼebé Jeová hatete ba nia. Tan neʼe, iha kalan neʼe kedas, Maromak haruka Natan atu hatete buat seluk ba liurai. Nia hatete katak David sei la harii templu ba Jeová, maibé ninia oan-mane mak sei harii ida-neʼe. Maski nuneʼe, Natan hatete katak Maromak halo aliansa ho David hodi halo ninia kadunan sai “metin toʼo tempu neʼebé la bele sura”.—2 Sam 7:4-16.

Profeta Natan nia hanoin kona-ba sé mak sei harii templu la tuir Maromak nia hakarak. Maibé, tanba Natan haraik-an, nia la laran-tun, nia simu Maromak nia hakarak no apoia ida-neʼe. Se Maromak korrije ita kona-ba buat ruma, ita mós bele  halo tuir Natan nia ezemplu diʼak neʼe. Ita hatene katak Natan kontinua atu serbí Maromak tanba Jeová uza nafatin nia nuʼudar profeta. Tuir loloos, Bíblia hatudu katak Jeová leno Natan no Gad atu ajuda David, hodi nuneʼe David bele organiza ema naʼin-4.000 neʼebé toka múzika iha templu.—1 Crôn 23:1-5; 2 Crôn 29:25.

DEFENDE LIURAI NIA UKUN

Profeta Natan hatene katak Salomão sei sai liurai depois David. Tan neʼe, Natan foti desizaun atu halo buat balu kedas bainhira Adonias koko atu hadau David nia kadunan kuandu David katuas loloos. Dala ida tan, Natan hatudu laran-metin no matenek. Ulukliu Natan koʼalia ba Batseba hodi nia fó-hanoin ba David kona-ba halo sira-nia oan-mane Salomão sai liurai, hanesan nia promete ona. Tuirmai, Natan rasik bá koʼalia ba David atu husu se David hili Adonias sai liurai depois nia ka lae. David rekoñese katak problema neʼe sériu, tan neʼe nia haruka Natan no atan sira neʼebé laran-metin ba nia atu kose mina ba Salomão no fó sai katak Salomão sai liurai ona. Nuneʼe, Adonias nia planu atu sai liurai la sai loos.—1 Reis 1:5-53.

HAKEREK-NAʼIN NEʼEBÉ HARAIK-AN

Ema barak fiar katak Natan no Gad mak hakerek 1 Samuel kapítulu 25 toʼo 31, no mós 2 Samuel tomak. Livru sira-neʼe, neʼebé Maromak leno hatete: “Kona-ba hahalok hotu neʼebé liurai David halo, hahalok uluk no ikus, hakerek hotu iha profeta Samuel nia liafuan, no iha profeta Natan nia liafuan, no iha Gad nia liafuan, ida neʼebé simu vizaun.” (1 Crôn 29:29) Bíblia mós hatete katak Natan hakerek kona-ba “Salomão nia hahalok sira”. (2 Crôn 9:29) Ida-neʼe hatudu katak depois David mate, karik Natan kontinua serbí iha liurai nia uma.

Buat barak neʼebé ita hatene kona-ba Natan, karik nia rasik mak hakerek. Maibé, ita mós bele aprende buat barak tan kona-ba nia husi buat neʼebé nia la hakerek. Ida-neʼe hatudu katak Natan mak hakerek-naʼin neʼebé haraik-an, no la hanoin atu hetan naran-boot. Disionáriu ida neʼebé esplika kona-ba Bíblia hatete katak kuandu Bíblia temi kona-ba Natan, Bíblia la fó sai Natan mai husi neʼebé no la fó sai informasaun kona-ba ninia família. Tan neʼe, ita la hatene buat ida kona-ba Natan nia beiʼala sira ka kona-ba ninia moris.

LARAN-METIN BA JEOVÁ BOOK NIA

Husi buat balu neʼebé ita lee husi Bíblia kona-ba Natan, ita hatene katak nia ema neʼebé haraik-an no laran-manas atu apoia oinsá Maromak kumpre ninia hakarak. Maromak Jeová fó ba Natan responsabilidade sira neʼebé boot. Diʼak atu ita hanoin kleʼan kona-ba Natan nia hahalok sira, hanesan laran-metin ba Maromak no hafolin Maromak nia matadalan sira, no hakaʼas an atu halo tuir hahalok diʼak sira-neʼe.

Klaru katak ita sei nunka fó konsellu ba liurai neʼebé halo sala-foʼer ka hapara ema nia planu atu sai ukun-naʼin. Maibé ho Maromak nia ajuda, ita bele laran-metin ba Maromak no bele defende buat neʼebé Maromak hatete mak loos. Ita mós bele hanorin lia-loos ho aten-brani no matenek, no bele defende adorasaun neʼebé loos.

[Dezeñu iha pájina 25]

Nuʼudar ema neʼebé defende liurai nia ukun, Natan koʼalia ho matenek ba Batseba