?Be nga be se be wun kɛ be ti Klistfuɛ’n be ngba yɛ be ti Klistfuɛ sakpa ɔ?

ANDƐ be nga be se be wun kɛ be ti Klistfuɛ’n be sɔnnin. Fluwa kun se kɛ afuɛ 2010 nun’n, asiɛ’n wunmuan’n su’n be yoli sran akpingbinngbin 2 tra su. (Atlas of Global Christianity) Fluwa kunngba’n se kɛ Klistfuɛ sɔ’m be o asɔnun wafawafa 41.000 tra su be nun. Kpɛkun ɔ le kun nin i like klelɛ ɔ nin i mmla liɛ. Sɛ asɔnun’m be trulɛ mɔ b’a tru sɔ’n ti’n, sran wie’m be akunndan’n sanngan’n, ɔ boman e nuan. I sɔ’n ti be kwla usa be wun kɛ: ‘?Be nga be se be wun kɛ be ti Klistfuɛ’n, be ngba be ti Klistfuɛ sakpa?’

Kɛ ɔ ko yo naan y’a wun kosan sɔ’n i su tɛlɛ’n, maan e fa e ɲin e sie i sa nga su. Sran kwlaa ng’ɔ́ tú ajalɛ’n, sɛ ɔ to polisie mun naan ɔ fata kɛ ɔ kle nvle ng’ɔ fin nun’n, kannzɛ ɔ kɛn i nuan nun’n, sanngɛ ɔ fata kɛ ɔ fɛ i fluwa kɛ kladante sa fa kle be naan b’a wun kɛ ndɛ ng’ɔ kannin ti su. I kunngba’n, nán kɛ sran kun se kɛ ɔ ti Klistfuɛ’n, i ti yɛ ɔ ti nanwlɛ ɔ. Sanngɛ ɔ fata kɛ ɔ yo like wie fa yi i nglo. ?Like sɔ’n yɛle benin?

Kɛ be kunnin Zezi m’ɔ dili afuɛ 10 tra su’n, yɛ be kpɛli ndɛ mma “Klistfuɛ” i ba ɔ. Biblu’n i klɛfuɛ’m be nun kun, mɔ be flɛ i Liki’n, ɔ seli kɛ: “Antiɔs lɔ yɛ be boli Jésus sɔnnzɔnfuɛ’m be flɛlɛ kɛ Kristfuɛ’n i bo ɔ.” (Sa Nga Be Yoli’n 11:26) Maan e sie i nzɔliɛ kɛ Zezi i sɔnnzɔnfuɛ mun yɛ be flɛli be sɔ ɔ. ?Kɛ be se kɛ sran kun ti Zezi i sɔnnzɔnfuɛ’n, i bo’n yɛle benin? Fluwa kun yiyi nun kɛ ‘sran ng’ɔ ti Zezi i sɔnnzɔnfuɛ’n, i mɛn dilɛ wunmuan’n taka Zezi i nuan ndɛ’n i su nantilɛ’n su, kpɛkun sran sɔ’n yo sɔ tititi.’ (The New International Dictionary of New Testament Theology) Ɔ maan sran ng’ɔ ti Klistfuɛ sakpa’n, blɛ kwlaa nun ɔ nanti ninnge nga Zezi kleli be’n su.

?Be nga mɔ be se be wun kɛ be ti Klistfuɛ andɛ’n, e kwla wun be nun wie mɔ be yo kɛ ngalɛ’n sa ɔ? ?Ngue yɛ Zezi seli kɛ bé fá síe i sɔnnzɔnfuɛ kpa’m be nzɔliɛ ɔ? Wafa nga Biblu’n tɛ kosan sɔ’m be su’n, é srɛ́ amun kɛ amun fa amun ɲin sie su. Ndɛ nga bé bá lɛ nun’n, é wá wún Zezi i nuan ndɛ nnun, mɔ be uka e naan y’a wun i sɔnnzɔnfuɛ kpa’m be wlɛ’n. Kpɛkun, wafa nga Klistfuɛ klikli’m be nantili ndɛ sɔ’m be su’n, é fá e ɲin é síe su. Asa ekun’n, be nga andɛ be nanti Zezi i ndɛ sɔ’m be su sakpasakpa’n, é wá kán be ndɛ wie.