Ol Man We Oli Talem Se Oli Kristin, ?Olgeta Evriwan Oli Tru Kristin?

?I GAT hamas Kristin evriwan? Buk ya Atlas of Global Christianity i talem se long yia 2010, i gat klosap 2.3 bilian Kristin long fulwol. Be buk ya i talem se ol Kristin ya oli seraot long bitim 41,000 defren jos. Mo ol jos ya wanwan, oli gat prapa tijing blong olgeta mo oli gat ol loa long saed blong ol fasin we oli mas folem. Tru ya, ol jos we oli talem se oli Kristin, oli plante tumas, mekem se tingting blong plante man i fasfas, mo tingting blong samfala i foldaon. Ating plante man oli stap tingbaot kwestin ya se, ‘?I tru se ol man we oli talem se oli Kristin, olgeta evriwan oli tru Kristin?’

Bambae yumi traem tingbaot samting ya long wan narafala fasin. Yu traem tingbaot wan man we i go long wan narafala kantri. Taem hem i kamaot long plen, hem i mas soem sam pepa long olgeta long epot. Hem i mas talem se hem i blong wanem kantri, mo hem i mas soem paspot blong hem blong pruvum samting ya. Long sem fasin, wan Kristin i mas pruvum se hem i wan tru Kristin, be i no blong talem nomo se hem i bilif long Kraes. Hem i mas soemaot sam samting. ?Hem i mas soemaot wanem? 

Samwe ten yia afta long ded blong Jisas, ol man oli stat blong yusum tok ya Kristin. Man ya blong raetem histri long Baebol, hemia Luk, i talem se: “Long taon ya [Antiok], ol narafala man oli givim wan nem long ol man blong Jisas, se ol Kristin man, mo hemia fastaem we nem ya i kamaot.” (Ol Wok 11:26) Yumi luk se ol man oli givim nem ya Kristin man long ol man blong Jisas. ?Ol man oli mas mekem wanem blong oli kam man blong Jisas? Wan diksonari (The New International Dictionary of New Testament Theology) i talem se: “Man we i lego olgeta samting we hem nomo i wantem blong i biaen long Jisas . . . long ful laef blong hem, hem i man blong Jisas.” Jisas nao i stanemap Kristin skul. Taswe, wan tru Kristin i wan man we i folem ol tijing blong Jisas, mo i mekem ol samting we Jisas i talem, long ful laef blong hem nomata wanem samting i hapen.

Long bigfala hip blong ol man we oli talem se oli Kristin, ?yumi save faenem samfala we oli mekem olsem? ?Jisas i talem se ol man blong hem oli mas gat wanem fasin? Plis yu gohed blong ridim ol haf biaen blong faenemaot ansa we Baebol i givim long ol kwestin ya. Bambae yumi tokbaot faef samting we Jisas i talem, taem hem i tokbaot ol man blong hem. Bambae ol tok blong Jisas oli givhan long yumi blong save fasin blong ol tru Kristin, mo blong save hu olgeta we oli ol tru Kristin. Bambae yumi tokbaot wanem samting we ol fas Kristin oli mekem blong folem ol tok blong Jisas. Mo bambae yumi luk se hu olgeta tede we oli stap soemaot fasin blong ol tru Kristin man.