Ang Tanan Bang “Kristohanon” Kristohanon Gayod?

UNSA ka daghan ang mga Kristohanon? Sumala sa Atlas of Global Christianity, niadtong 2010 dihay duolan sa 2.3 ka bilyon sa tibuok kalibotan. Apan ang mao gihapong reperensiya nagpakita nga ang maong mga Kristohanon maoy sakop sa kapig 41,000 ka denominasyon—ang matag usa may kaugalingong mga doktrina ug lagda sa panggawi. Tungod niining nagkadaiyang “Kristohanon” nga relihiyon, dili ikatingalang ang pipila nalibog o nahigawad pa gani. Sila tingali mangutana, ‘Ang tanan bang nag-angkong Kristohanon tinuod nga Kristohanon?’

Ato ning susihon sa laing anggulo. Ang usa nga moadtog laing nasod kinahanglang mosulti sa iyang nasyonalidad ngadto sa immigration officer. Kinahanglan sab niyag pamatuod, tingali ang pagpakitag pasaporte. Sa susama, ang usa ka tinuod nga Kristohanon kinahanglang mohimog labaw pa kay sa pag-ingon lamang nga siya nagtuo kang Kristo. Nagkinahanglan siyag dugang pamatuod. Unsa man kana?

Ang pulong nga “Kristohanon” unang gigamit wala madugay human sa 44 C.E. Ang historyano sa Bibliya nga si Lucas nagtaho: “Didto sa Antioquia nga ang mga tinun-an pinaagi sa pagtultol sa Diyos unang gitawag nga mga Kristohanon.” (Buhat 11:26) Matikdi nga kadtong gitawag ug Kristohanon maoy mga tinun-an ni Kristo. Unsay makapahimo sa usa nga tinun-an ni Jesu-Kristo? Ang The New International Dictionary of New Testament Theology nagpatin-aw: “Ang pagsunod kang Jesus ingong tinun-an nagpasabot ug bug-os nga pagsakripisyo sa kinabuhi [sa usa] . . . sa tibuok niyang kinabuhi.” Busa, ang usa ka tinuod nga Kristohanon maoy usa nga nagsunod gayod sa mga pagtulon-an ug sugo ni Jesus, ang Magtutukod sa Kristiyanidad.

Posible bang makakaplag ug ingon niana nga katawhan taliwala sa daghang nag-angkong Kristohanon karon? Sumala kang Jesus, unsay ilhanan sa tinuod niyang mga sumusunod? Gidapit ka namo nga tagdon ang tubag sa Bibliya niini. Sa mosunod nga mga artikulo, atong susihon ang lima ka pahayag ni Jesus nga magpaila sa iyang tinuod nga mga sumusunod. Atong tagdon kon giunsa kini pagpakita sa unang-siglong mga Kristohanon. Ug atong tan-awon kon kinsa sa daghang nag-angkong Kristohanon karon ang nagsunod sa ilang sumbanan.