Itä Meinisin “Chon Kraist” Iir Wesewesan?

FITEMÖN Chon Kraist woon fönüfan? Me ren eü puk, lon 2010 a fen wor lap seni 2 billion. A pwal apasa pwe chokkana ra choni lap seni 41,000 lamalam mi erä pwe iir Chon Kraist me a wor en me an afalafal me allük usun minne mi pwüng me mwääl. Ina popun, aramas ra rukoruk, lichippüng me a apwangapwangolo ar lükü ren chommongun lamalam mi erä pwe iir Chon Kraist. Eli repwe eis: ‘Itä meinisin Chon Kraist, iir wesewesen Chon Kraist?’

Sipwe nengeni pwal eü mettoch. A lamot ngeni emön chon säi an epwe änneta ngeni pekin Immigration ika i chon ia ren an awora eü pisekin ännet, äwewe chök ren nöün we passport. Pwal ina usun emön Chon Kraist mi enlet. A lamot pwe esap chök apasa pwe a lükü Kraist, nge epwe pwal änneta ren an awora och pisekin ännet. Ikkefa ekkena pisekin ännet?

Ewe kapas “Chon Kraist” a poputä nöünöün orun 10 ier mwirin än Jises mälo. Iei alon Luk, ewe sou uruwoon Paipel: “Lon Antiok ekkewe chon kaeo ra poputa le iteni ewe it, Chon Kraist.” (Fofor 11:26, TF) Ekkena ra iteni Chon Kraist, iir chon tapwelo mwirin Kraist. Met weween än emön epwe tapwelo mwirin Kraist? Eü dictionary a erä: “Än emön tapwelo mwirin Kraist a wewe ngeni an pennüküolo unusen manauan fansoun meinisin.” Ina popun, emön Chon Kraist mi enlet a unusen älleasochisi äitien Jises me an kewe emmwen.

Lon ei fansoun, kich mi tongeni küna ekkena sokkun aramas lein chokkewe mi erä pwe iir Chon Kraist? Ikkefa pwisin alon Jises kewe mi esissillatä ekkewe chon tapwelo mwirin? Sia etiwok le ekieki ifa usun ewe Paipel a pölüweni ekkena kapas eis. Lon ekkewe lesen mwirin ei, sipwe pworausfengen woon nimu alon Jises kewe mi anapanapa ngenikich napanapen ekkewe Chon Kraist mi enlet me älisikich le esiller. Sipwe ppii ifa usun ekkewe popun Chon Kraist ra napanapeni napanapen Chon Kraist mi enlet. Sipwe achocho le esilla ika iö kewe iir wesewesen Chon Kraist lein ekkewe chommong mi erä pwe iir Chon Kraist.