Khrihfa Ka Si Aa Timi Paohin Khrihfa Taktak An Si Maw?

VAWLEICUNG ah Khrihfa pa zeizat dah a um? Cauk pakhat (Atlas of Global Christianity) ningin, 2010 ah nuai thonghnih le zathum hrawng a um. Asinain mah Khrihfa hna cu bu 41,000 leng an i ṭhen i an zumhnak le an tuahsernak zong an i khat lo tiah mah cauk nih a ti chap. Khrihfa biaknak ah cu bantukin bu tampi aa ṭhen ruangah mi cheukhat an lung aa tuaimi le an lung a donghmi cu hngalhthiam khawh a si ko. Cucaah ‘Khrihfa aa timi paohin a hmaanmi Khrihfa an si maw?’ tiah biahalnak an tuah.

Mah kong kha lamdang in zohhmanh hna u sih. Khual a tlawngmi pakhat nih ramri tan a hauh tikah nawlngeitu sinah zei rammi dah ka si ti kha a chimh a hau. Cun ahodah a si ti hngalh awkah rammi sinak card asiloah passport ti bantuk kha hmuhsak a hau. Cu bantukin a hmaanmi Khrihfa pakhat zong nih Jesuh Khrih a zumhnak kha langhter awkah kaa chimnak lawngin a za lo. A dang lam zongin a langhter a hau. Mah cu zeidah a si lai?

“Khrihfa” timi biafang kha AD 44 hnu i caan khatkhat in hman hram an rak thawk. Baibal ṭialtu Luka nih hitin a ti: “Antiok khua ah hin pei Jesuh zultu hna kha Khrihfa tiah an rak ti hmasa bik hna cu.” (Lamkaltu 11:26) Khrihfa tiah auh a simi hna cu Jesuh zultu an si ti kha i cinken. Zeinihdah mi pakhat cu Jesuh Khrih zultu a siter? Baibal Dictionary pakhat (The New International Dictionary of New Testament Theology) nih hitin a ti: “Zultu pakhat in Jesuh hnu zulh timi cu [amah] a nunchung vialte . . . a thih tiang aa pumpekmi kha a si.” Cucaah a hmaanmi Khrihfa pakhat nih cun Khrihfa Biaknak a Dirhtu Jesuh cawnpiaknak le lamhruainak vialte kha a zulh dih a hau.

Cu bantuk mi kha tuchan i Khrihfa ka si tiah aa timi hna lakah hmuh khawh an si maw? Jesuh theng nih a zultu pawl thleidan khawh an si ning kha zeitindah a rak langhter? Mah biahalnak hna i Baibal a phi kha hlathlai awkah kan in sawm. A hnu capar ah Jesuh nih a langhtermi a zultu taktak thleidan khawh an sinak a kong panga kha kan i ruah hna lai. Mah nih Jesuh zultu taktak kha thleidan khawh awkah a kan bawmh lai. Mah lengah kumzabu pakhatnak i Khrihfa hna cu mah a kong panga he zeitindah an i tlak ti zong kan hngalh lai. Cun tuchan ah Khrihfa ka si tiah aa timi hna lakah ahote dah mah ningin an nung ti zong kan hngalh lai.