¿Nitre kristiano ye jökrä kristiano metre?
¿Nitre kristiano ye jökrä kristiano metre?
¿Nitre kristiano tä nibe kä jökräbiti tibien ye gare mäi? Tärä kädekata Atlas of Global Christianity, tä niere kä 2010 yete nämäne 2,300 millones akwa ñäkäninbiti kukwe mikata täte 41,000 jene jene. Kukwe jene jene mikata täte aune kukwe jene jene ükaninte. Bäkänä, kukwe keta kabre mikata täte känti ja bianta kristiano yebätä ni ruäre ie ja ñan raba nuaindre aune raba di nekä. Aune raba ngwentari jai: “¿Nitre tä ja bien kristiano ye jökrä kristiano?”.
Ani töbike kukwe nebätä. Mä tö rikai juta madate ngwane, ¿ti nünanka juta kä krörö ne känti mäkwe niedre se ño mä raba mike gare kukwe ye metre? Mä blitadre ye ñan aibe mä ribedre jai ye bämikakäre, ¿ñan ererea? Mä rabadre pasaporte o täräkwata mada mike tuare mäta kukwe niere ye metre mikakäre gare. Ye erere arato, ni abokän kristiano metre nikwe niedre jerekäbe kukwere ye ñan mike gare ni abokän kristiano metre. Ñakare aune kukwe nieta mäkwe ye metre ye mä rabadre bämike. Ño ye ani mike gare jai.
Kukwe kristiano ye nie jatani kä 44 Kristo bitikäre. Ni kukwe kira Bibliabätä täinkä kä Lucas tä niere abokän “Antioquía yete nitre ja tötikaka Jesukwe ye kädekani kena köre Ngöbö köböire” (Hechos 11:26). Aisete nitre kristiano ye nitre ja tötikaka Jesukwe. ¿Akwa ni rabadre ja tötikaka Jesukwe yekäre dre ribeta? Ni ja tötikaka [Kristokwe] abokän jondron jökrä aune ja nire ye bianta täte kärekäre ie meden gärätä nieta tärä Diccionario Teológico del Nuevo Testamento. Kukwe ye nie raba kore, ni kristiano metre ye abokän Jesukwe kukwe niebare ye tä mike täte töi kwatibebiti meden gärätä.
¿Nitre ja bianka kristiano ye tä kukwe ye erere nuainne? ¿Ni kristiano era metre ye rabai gare dre köböire niebare Jesukwe? Dre nieta Bibliakwe kukwe yebätä ye mikakäre gare jai mä nübaita ñäke kukwe ja tötikara ja känenkäre yebätä. Kukwe keteitire keteitire ye käkwe blitai ni kristiano metre ye abokän ño niebare Jesukwe ye ererebätä. Arato nitre kristiano siklo kena käkwe kukwe bämikani ño aune nitre kristiano ne ngwane meden tätre kukwe ye erere nuainne ye rabai gare nie.