¿Pel patal an belomchik i chubax aykol kʼal a Cristo?

¿A exlál tatáʼ jay i belom waʼats tin puwél an tsabál? ­An Atlas of Global Christianity, in ulal abal ti 2010 waʼatsak utat 2.300 millones, pero axéʼ kʼwajat bukʼudh al 41.000 i kʼakʼnaxtaláb, axéʼchik xi kʼakʼnaxtaláb yab juniniʼ jantʼiniʼ in kʼakʼnál a Dios. Ani kom waʼats yantolom i kʼakʼnaxtaláb an atiklábchik yabáts in belál jawaʼ kin belaʼ, walám in tsalpayal: «¿Pel patal an belom i chubax aykol kʼal a Cristo?».

Abal ki exbay ki punuw jun i tʼiplab. Max tatáʼ a leʼ ki kʼalej al kʼeʼat i bichow, ¿jantʼiniʼ a éjtowal ka tejwamédhaʼ abal chubax it waʼtsin juʼtáj ta ulal? Chubax abal neʼets kit konchin jun i pasaporte abal ka ejtow kit otsits al nixéʼ xi bichow. Antsanáʼ jayej u watʼel kʼal jun i atikláb axi in ulal abal pel i aykol kʼal a Cristo. Kwaʼal kin tejwamédhaʼ abal pel i chubax aykol kʼal a Cristo. Ki tsuʼuw jantʼoj in leʼ kin uluw ki tʼajaʼ tu aykol kʼal a Cristo.

An bijláb aykol kʼal a Cristo tujey ti eyendháb talbél kʼal an támub 44. An aykol Lucas in dhuchaʼ abal «ti bichow Antioquía jats juʼtáj ti bijiyatchik an belom ti aykol kʼal a Cristo» (Hechos 11:26). Jaxtám, jitaʼ kin uluw abal pel i aykol kʼal a Cristo kwaʼal kin tejwamédhaʼ. Pero, ¿jantʼoj in leʼ kin uluw ki tʼajaʼ tu aykol kʼal a Cristo? An Diccionario Teológico del Nuevo Testamento in ulal «abal jitaʼ in leʼ kin tʼajaʼ ti aykol kʼal a Cristo kwaʼal kin tʼajaʼ in kulbetal a Dios tin naktal in ejatal». Tam, jun i aykol kʼal a Cristo pel jitaʼ in punuwal ti tʼajbiláb patal an exobchixtaláb axi in jilaʼ a Jesucristo, kom jajáʼ jats axi in okʼnál.

¿Al axéʼ xi kʼij waʼats i atiklábchik axi in tsapnanchal kin belkaʼ? ¿Jantʼiniʼ in uluw a Jesús abal neʼets ki exlaʼ in chubax aykolilchik? Abal ka exlaʼ jantʼoj in ulal an Biblia tu kaniyal abal ka tsuʼuw in aytal an boʼ i exobintaláb. Ti junchik an exobintaláb neʼets tu ku tejwamédhanchij jantʼiniʼ ki exlaʼ in chubax aykolil a Jesús. Jayej neʼets ki tsuʼuw in tʼiplabil an aykolchik axi ti kʼaʼál siglo ani talbél neʼets ki tsuʼuw jitaʼchik kʼwajat in tʼajál axéʼ xowéʼ ta kʼicháj.