Hkristan Shagu Gaw Hkristan Ajet Rai Kun?

MUNGKAN hta Hkristan hti hkum kade nga ai kun? Laika buk langai hku nga yang (Atlas of Global Christianity) 2010 hpring shaning hta, wan hkying lahkawng masum tsa daram nga ai. Raitim, dai Hkristan ni gaw hpung 41,000 jan kaw na re ai sha n-ga, shanhte a makam masham hte arawn alai ni mung n bung ai ngu na dai laika buk hta matut tsun da ai. Hkristan nawku htung hta dai zawn hpung amyu myu nga ai majaw, masha nkau gaw myit shuk nna myit ru wa na re. Dai majaw, ‘Hkristan shagu gaw Hkristan ajet rai kun?’ ngu nna shanhte san wa ma ai.

Ndai lam hpe kaga ningmu hku nna dinglik yu ga. Bu hkawm ai wa gaw ga jarit hpe lai hkyen yang, ahkaw ahkang nga ai ni hpe shi gaw gara mung masha re ai lam tsun dan ra ai. Dai sha n-ga, shi gaw kadai re ai hpe madi madun ai lakmat (sh) maigan pru hkawm lakmat madun dan ra ai. Dai zawn sha, Hkristan ajet langai mung Yesu Hkristu hpe kamsham ai lam madun na matu, n-gup ga hte sha n mai ai. Kahtap nna sakse madun na matu ra ai. Hpa rai na kun?

“Hkristan” ngu ai ga si hpe, A.D. 44 hpang shaning langai ngai hta, nnan hpang nna akyu jashawn wa ai re. Chyum Laika ka ai Luka ndai hku tsun ai: “Sape ni mung Hkristan ni ngu ai mying hpe Antioki mare hta shawng lu la ma ai.” (Kasa 11:26, JCLB) Hkristan ngu shaga ai ni gaw Hkristu a sape ni re ai hpe sadi u. Gara lam gaw masha langai hpe Hkristu Yesu a sape byin shangun ai kun? Ga htai chyum langai (The New International Dictionary of New Testament Theology) hta ndai hku tsun da ai: “Sape langai hku na Yesu a hpang hkan ai ngu ai gaw, [shi a] prat ting hpe jahtum du hkra sak jaw dat ai re.” Dai majaw, Hkristan ajet langai gaw Hkristan nawku hpung hpe hpawng de wa ai Yesu a sharin achyin ai lam hpe tup hkrak hkan sa ai wa re.

Dai ni aten na Hkristan ngu tsun ai masha ni hta, dai zawn masha hpe mu lu ai kun? Yesu hkum nan shi a sape ni hpe gara hku garan ginhka dan wa ai kun? Dai ga san ni hpe Chyum Laika hta gara hku mahtai jaw da ai lam dinglik yu na matu, nang hpe saw shaga mayu ga ai. Yesu garan ginhka dan wa ai lam manga hpe hpang na sumhpa ni hta bawngban da ai. Dai lam ni hpe yu na nga yang, Yesu a sape ajet ni hpe garan ginhka lu wa na re. Dai sha n-ga, tsaban langai na Hkristan ni gaw dai lam manga hte gara hku htap htuk ai ngu ai hpe mung dinglik da ai. Dai ni aten hta Hkristan ngu tsun ai ni hta, kadai ni gaw dai lam ni hte hkrak tup re ai kun? ngu ai hpe mung chye wa na re.