Hihi “Akristiano” Othe Nĩ Akristiano?

AKRISTIANO othe nĩ aigana? Kũringana na Atlas of Global Christianity, maarĩ hakuhĩ bilioni 2.3 mwaka-inĩ wa 2010 thĩinĩ wa thĩ. Ĩndĩ, ibuku o rĩu rĩonanĩtie atĩ Akristiano acio me thĩinĩ wa ndini makĩria ma 41,000—na o ĩmwe ya cio ĩkoragwo na ũrutani na ithimi ciayo cia mĩtugo. Nĩ ũndũ wa ũguo ndini cia “Gĩkristiano” cingĩhĩte nginya ikarigithia, no tũmenye kĩrĩa gĩtũmĩte andũ amwe matukanĩrũo o na kana magakua ngoro. Mahota kũrigwo, ‘Hihi arĩa othe meĩtaga Akristiano nĩ Akristiano kũna?’

Rekei twĩcirie ũndũ ũcio na njĩra ĩngĩ. Mũndũ ũrathiĩ rũgendo nĩ abataraga kuuga kũrĩa oimĩte akinya mũhaka-inĩ wa bũrũri ũngĩ. Ningĩ nĩ abataraga kuonania ũira wa atĩ ũguo aroiga nĩguo, hihi kũgerera indo ironania nĩwe ũ, ta pasipoti kana kĩbandĩ. O nake Mũkristiano wa ma, nĩ arabatara gwĩka maũndũ mangĩ thengia kuuga nĩ etĩkĩtie Kristo. Nĩ arabatara gũkorũo na maũndũ mangĩtũma akũũrĩkane. Namo nĩ marĩkũ?

Kiugo “Mũkristiano” kĩambĩrĩirie kũhũthĩrũo kahinda kanini thutha wa mwaka wa 44 Mahinda-inĩ Maitũ (M.M.). Luka mwandĩki wa historĩ ya Bibilia oigire ũũ: “Antiokia nĩkuo arutwo maambire gũtuwo Akristiano.” (Atũmwo 11:26) Rora wone atĩ arĩa meetirũo Akristiano maarĩ arutwo a Kristo. Nĩ ũndũ ũrĩkũ ũtũmaga mũndũ atuĩke mũrutwo wa Jesu Kristo? Ibuku rĩĩtagwo The New International Dictionary of New Testament Theology rĩtaaragĩria ũũ: “[Mũndũ] kũrũmĩrĩra Jesu arĩ mũrutwo wake nĩ kuuga arute muoyo [wake] wothe ũtuĩke igongona hatarĩ mĩhaka . . . ũtũũro-inĩ wake wothe.” Kwoguo, Mũkristiano wa ma, nĩ ũrĩa ũrũmagĩrĩra biũ hatarĩ mĩhaka ũrutani na uuge wa Jesu, o we Mwambĩrĩria wa Ũkristiano.

Hihi no kuoneke andũ ta acio thĩinĩ wa andũ aingĩ arĩa meĩtaga Akristiano ũmũthĩ? Jesu we oigire nĩ ũndũ ũrĩkũ ũngĩkaamenyithania arũmĩrĩri ake a ma? Tũgũkũũria wĩthuthurĩrie ũrĩa Bibilia ĩcoketie ciũria icio. Icunjĩ-inĩ iria irũmĩrĩire, nĩ tũgũthuthuria maũndũ matano moigirũo nĩ Jesu monanagia arũmĩrĩri ake a ma na magateithia kũmakũũrana. Nĩ tũkuona ũrĩa Akristiano a karine ya mbere maarũmagĩrĩra ciugo icio ciake. Ningĩ nĩ tũkũgeria gũkũũrana nĩ a mareka ũguo gatagatĩ-inĩ ka andũ aingĩ arĩa meĩtaga Akristiano ũmũthĩ.