Mbela aveshe ovo have liti Ovakriste ove li ngoo Ovakriste vashili?

OKU na Ovakriste vangapi? O-Atlas of Global Christianity, oya popile mo 2010 ya ti kutya oku na hanga omabiliyona 2,3 mounyuni aushe. Oshifo osho tuu osho osha ulika yo kutya Ovakriste ovo ove li momalongelokalunga e dulife po 41 000, nakeshe limwe oli na omahongo alo neemhango dalo. Okwa monika kutya oilyo imwe ohai kala ya ngwangwana noya teka omukumo omolwonghedi omo omalongelokalunga oo haku tiwa oopaKriste a unganekwa. Otashi dulika ovanhu ve lipule kutya, ‘Aveshe ovo have liti Ovakriste, Ovakriste ngoo vashili?’

Onghalo ei natu i talele mefano limwe li lili. Omweendanandjila oha pumbwa alushe okuulika oufemba waye kovanambelewa ovo ve li peengaba. Okwa pumbwa yo oku shi ulika mokuyandja okamutwe kaye, ile opasporta yaye. Sha faafana, Omukriste washili okwa pumbwa okuninga shihapu shi dulife ashike okutya okwa itavela muKristus. Okwa pumbwa okukala e na osho tashi mu didilikifa mo. Mbela oshike a pumbwa?

Oshitya “Omukriste” osha hovelwa okulongifwa konima yo 44 O.P. Omunandjokonona umwe wOmbiibeli Lukas okwa popya a ti: ‘MuAntiokia omo ovahongwa va ifanwa tete edina Ovakriste pawiliko laKalunga.’ (Oilonga 11:26) Didilika kutya ovo va li va ifanwa Ovakriste ova li ovahongwa vaKristus. Oshike hashi ningi omunhu omuhongwa waKristus? O-New International Dictionary of New Testament Theology oya yelifa ya ti: “Okushikula Jesus u li omuhongwa otashi ti okuninga omaliyambo monghalamwenyo yoye aishe . . . nomokukalamwenyo kwoye akushe.” Onghee hano, Omukriste washili oyoo ha shikula omahongo nomalombwelo aJesus, oo e li Omutoti wOukriste.

Mbela otashi shiiva ngoo okudidilika mo ovanhu va tya ngaho mokati kovanhu vahapu ovo have liti kutya Ovakriste kunena? Jesus okwa popya shike osho tashi dulu okudidilikifa mo ovashikuli vaye vashili? Ohatu ku shivi u tale nghee Ombiibeli tai nyamukula omapulo oo. Moshitukulwa tashi shikula ko, ohatu ka konakona oitwa itano oyo Jesus a popya, oyo tai ke tu kwafela tu didilike mo ovashikuli vaye vashili. Ohatu ka mona yo nghee Ovakriste vomefelemudo lotete va ulika omaukwatya oo. Ohatu ka tala yo kutya mokati kaavo have liti kutya Ovakriste kunena oolyelye ve li metwokumwe noitwa oyo.