Nanchi Bonse Betela’mba “Bena Kilishitu” Kine Bena Kilishitu Nyi?

NANCHI kuji bena Kilishitu banga? Kwesakana na buku wa Atlas of Global Christianity waambile’mba mu mwaka wa 2010 kwajinga betela’mba bena Kilishitu 2.3 bilyonyi ntanda yonse. Uno yenka buku waambile ne kuba’mba abano bena Kilishitu baya mu machechi apusana pusana kukila pa 41,000. Ano onse machechi afunjisha bintu byapusana pusana kabiji alondela mizhilo yapusana pusana. Bantu bavula bebatwala bingi mungi ku bupopweshi na mambo a bintu byuba bantu betela’mba bena Kilishitu. Bepuzha ne kuba’mba: ‘Nanchi bonse betela’mba bena Kilishitu, kine bena Kilishitu nyi?’

Twayai tufwanyikizhe bino: Javula kañenda ukebewa kwilumbulula kuba’mba ngikazhi inge ubena kwisamba na bakapokola bengijila pa kashitomo. Kabiji wafwainwa kusolola kitupa kibena kumwesha’mba kine ngikazhi wa mu kyokyo kyalo. Kyo kimotu, mwina Kilishitu wa kine naye kechi upelelatu kwamba pa kanwa amba ne mwina Kilishitu ne. Wafwainwa kumwesha bintu bimo. Ñanyi bintu byonkabyo?

Bantu batendekele kwingijisha kyambo kya kuba’mba “mwina Kilishitu” ku mpelo ya mwaka wa 44 C.E. Munembeshi wa mpito wa Baibolo aye Luka wanembele’mba: “Monka mu Antioka na lutangijilo lwa Lesa kyo kimye kitanshi baana ba bwanga kyo batelelwe’mba bena Kilishitu.” (Byubilo 11:26) Akino kinembelo kyaamba’mba aba bo batongwele’mba bena Kilishitu, bajinga baana ba bwanga ba kwa Kilishitu. Ñanyi kintu kilengela muntu kwikala mwana wa bwanga wa kwa Yesu Kilishitu? Buku wa The New International Dictionary of New Testament Theology waamba’mba: “Kwikala mwana wa bwanga wa kwa Yesu kulumbulula’mba muntu wafwainwa kwipana na muchima yense . . . mu bwikalo bwanji bonsetu.” Onkao mambo, mwina Kilishitu wa kine, ke muntu ulondela na muchima yense mikambizho ne bintu byonsetu byafunjishanga Yesu, mwine watendekeshe bwina Kilishitu.

Nanchi mwakonsha kutaana bantu baji bino mu boba betela’mba bena Kilishitu mu ano moba nyi? Ñanyi byubilo byaambilepo Yesu bya kuyukilako baana banji ba bwanga ba kine? Tubena kwimutundaika anweba bene kwimwena Baibolo byo akumbula ano mepuzho. Mu mitwe yalondelapo, tusakwisamba bintu bitanu byaambilepo Yesu kuba’mba byo byafwainwa kwimukwasha kuyuka baana banji ba bwanga ba kine. Tusakwisamba pa bena Kilishitu batanshi byo bamwesheshe bino byubilo. Kabiji tusakumona ne byubilo bya kuyukilako bena Kilishitu ba kine lelo jino.