¿Kykyaqilpe qeju in tzaj kyqʼamaʼn qa okslal qe in che ok te axix tok okslal?

¿OJTZQIʼNPE tuʼna jteʼ okslal at twitz tkyaqil Txʼotxʼ? In tzaj tqʼamaʼn Atlas of Global Christianity, qa toj abʼqʼi 2010 attoq junlo 2,300 millón xjal okslal, aʼyeju ateʼtoq toj mas te 41,000 okslabʼil. Junxitl nimen tuʼn teyele junjun kye, tuʼntzunju, kwest tuʼn tjaw kyjyoʼn xjal jun okslabʼil ex in tzaj bʼaj kykʼuʼj tuʼn. Bʼalo in kubʼ kyxjelin jlu: «¿Kykyaqilpe qeju in tzaj kyqʼamaʼn qa okslal qe in che ok te axix tok okslal?».

Qo ximen tiʼj jun techel. Qa taja tuʼn tokxa toj juntl tnam, ¿tzeʼn in xi tyekʼina alkye ttnama? Il tiʼj tuʼn t-xi tyekʼina jun pasaporte moqa juntl uʼj ex nya oʼkx in xi tqʼamaʼna tuʼn tyola. Tuʼn toka te axix tok okslal, nya oʼkx tuʼn ttzaj tqʼamaʼna qa in nok qeʼ tkʼuʼja tiʼj Jesús, sino il tiʼj tuʼn tkubʼ tyekʼina tukʼil tbʼinchbʼena. ¿Tzeʼn? Qo xnaqʼtzan tiʼj.

Tzaj tzyet tuʼn tajbʼen yol okslal tej tzmatoq in bʼaj abʼqʼi 44 tiʼj ambʼil qʼiʼn quʼn jaʼlo. In tzaj tqʼamaʼn Lucas qa «tnejelxix tuj Antioquía ok kyqʼoʼn xjal kybʼi okslal, okslal tiʼj Crist» (Hechos 11:26). Tuʼntzunju, iltoq tiʼj tuʼn kyok okslal te tdiscípulo Jesús. Pero ¿tiʼ t-xilen tuʼn kyok te tdiscípulo Jesús? In tzaj tqʼamaʼn Diccionario Teológico del Nuevo Testamento qa «a t-xilen jlu qa il tiʼj tuʼn kyok lepeʼ tiʼj Cristo toj tkyaqil ambʼil ex tuʼn tkyaqil kyanmi». Toj juntl yol, in nel kykanoʼn okslal aju techel kyaj tqʼoʼn Jesús ex in xi kybʼiʼn qe t-xnaqʼtzbʼil.

¿Ateʼpe xjal in xi kybʼiʼn qe t-xnaqʼtzbʼil Jesús toj ambʼil jaʼlo? ¿Tzeʼn jaku tzʼel qnikʼ kyiʼj axix tok t-xnaqʼtzbʼen Jesús? Tuʼn tel tnikʼa tiʼjju in tzaj tqʼamaʼn Tyol Dios tiʼj jlu, uʼjinktza juntl jweʼ xnaqʼtzbʼil. Kʼelel qnikʼ tiʼj tiʼ tuʼn tbʼant kyuʼn axix tok okslal ik tzeʼn kyaj tqʼamaʼn Jesús. Ax ikx, kʼelel qnikʼ tiʼj techel kyaj kyqʼoʼn tnejel okslal toj tnejel syent abʼqʼi ex tzeʼn jaku tzʼel qnikʼ kyiʼj axix tok okslal toj ambʼil jaʼlo.