Uzye “Aina Klistu Yonsi”Aacumi?

UZYE aina Klistu yaya yanga? Ulupapulo lumwi ulukalanda pa ina Klistu umu nsi yonsi (Atlas of Global Christianity), lwalanzile ukuti umu 2010 umu nsi yonsi mwali aina Klistu umupiipi na 2.3 bilyoni. Lelo ulupapulo kwene lulo lwalanzile nu kuti aina Klistu yayo yaya umu mipepele 41,000 ipusanepusane, nupya imipepele iyo yakwata ivizumilo na masunde ivipusanepusane. Pa mulandu wakuti umu nsi mwaya imipepele iingi ikalanda ukuti iya ina Klistu, cikalenga ituvwikisya umulandu antu aingi yakafililwa ukumanya ningo imipepele ya “ina Klistu” iyampomvu. Limwi cingalenga yauzya nu kuti ‘uzye “aina Klistu yonsi”, aacumi?’

Lekini tulandeko panono api lyasi lii. Umuntu akulonda ukuya uku mpanga yuze akalondekwa ukukwata icitupa icikulangilila impanga kuno wafuma pakuti yamuzumilizye ukwingila umu mpanga iyo. Nupya alinzile nu kulangilila ukuti vino akulanda ivya cumi, ukupitila umu kuyalanga ivitupa vimwi wakwe, icitupa cino yakaomvya pa kufuma umu mpanga imwi na pa kwingila umu mpanga yuze (pasipoti). Umu nzila ili imwi kwene, kwaya na vyuze vino umwina Klistu uwa cumi alinzile ukucita ukulunda pa kulanda sile ukuti wazumila muli Klistu. I vyani vivyo kwene vino alinzile ukucita?

Izwi lyakuti “aina Klistu” lyatandike ukuomviwa apa cisila cakwe 44 C.E. Luka walanzile ukuti: “Umu Antioki ali muno Leza watandikilepo ukupeela asambi izina lya kuti aina Klistu.” (Milimo 11:26) Lolini ukuti antu yaya yano yatandike ukwama ukuti aina Klistu yaali asambi yakwe Klistu. Uzye umuntu alinzile ukucita uli pakuti aye umusambi wakwe Yesu Klistu? Dikisyonali imwi (The New International Dictionary of New Testament Theology) yalondolwile ukuti: “Pakuti umwi aye umusambi wakwe Yesu alinzile ukuipeela nu umi wakwe onsi . . . umu umi wakwe onsi.” Fwandi umwina Klistu wa cumi, u muntu akalondela vyonsi vino Yesu wasambilizyanga na masunde yakwe, wino ali mwina Klistu wa kutandikilapo.

Uzye umu yantu kwene yaa aingi akalanda ukuti aina Klistu tungazanamo aina Klistu ya cumi? Uzye Yesu walanzile ukuti i vyani vino alondezi yakwe aacumi yalamanyikililwako? Tukumukomelezya ukuti mulole vino Baibo ikaasuka mauzyo yaa. Umu vipande ivilondelilepo tumalola amazwi yamwi yano Yesu walanzile angatwazwa ukumanya alondezi yakwe acumi. Tumalola na vino aina Klistu ya kutandikilapo yalangilile ukuti alondezi yakwe Yesu acumi. Nupya tumalola na yamwi pa yantu kwene yayo akalanda ukuti aina Klistu akacita ivikalangilila ukuti yene aina Klistu ya cumi.