Aolep Ro Rej Ba Er “Kũrjin” Rej Ke Lukkuun M̦ool in Kũrjin?

EWÕR jete oran Kũrjin ro? Ilo iiõ eo 2010 ewõr enañin 2.3 bilien ipel̦aakin lal̦ in ekkar ñan bok in Atlas of Global Christianity. Bok in ej bar kalikkare bwe Kũrjin rein rej uwaan elõñl̦o̦k jãn 41,000 kabuñ ko. Kabuñ kein kajjojo ewõr aer make katak im tõmak. Kõn an lõñ kain kabuñ kein im rej ba rej “Kũrjin,” jemaroñ mel̦el̦e unin elõñ armej rej pok. Bõlen rej l̦õmn̦ak, ‘Aolep ro rej ba er Kũrjin rej ke lukkuun m̦ool in Kũrjin?’

Jen etale men in ilo juon wãween eo emaroñ alikkarl̦o̦k. Ñe juon armej ej etal ñan bar juon lal̦, ej aikuj kwal̦o̦k jet peba ñan kalikkar kõn e ñan ro im rej lale armej ro rej diwõj del̦o̦ñ ilo aelõñ eo. Ej bareinwõt kwal̦o̦k kein kam̦ool ko ãinwõt juon passport. Ejjel̦o̦k oktak, elõñl̦o̦k men ko juon Kũrjin ej aikuj kõm̦m̦ani jãn an baj ba wõt bwe ej tõmak ilo Kũraij. Ej aikuj wõr kein kam̦ool ko ippãn. Ta kein?

Joñoul jim̦a iiõ ãlikin an kar Jijej mej, kar jino kõjerbal naan in “Kũrjin.” Ri jeje Baibõl̦ eo Luk ear ba: “Jinointata in an armej ro n̦aetan rũkal̦oor ro ‘Ri Kũrjin’ ej ilo jikin kweilo̦k in Antiok.” (Jerbal 11:26, UBS) Ro im rar n̦aetaer Kũrjin kar rũkal̦oor ro an Kũraij. Ta eo ej kalikkar bwe juon ej rũkal̦ooran Jijej Kũraij? Ekkar ñan kõmel̦el̦e eo an juon bok in tikjinere (The New International Dictionary of New Testament Theology), ej ba: “Juon eo ej rũkal̦ooran Jijej ej ajel̦o̦k im kaarmejjete aolepen mour eo an.” Innem, juon Kũrjin eo em̦ool ej lukkuun l̦oor aolepen katak ko im naan in tõl ko an Jijej, eo ear kajutake Eklejia eo an Kũrjin, im ej kõm̦m̦ane men in kõn aolepen bũruon.

Jemaroñ ke lo kain armej rot in ibwiljin ro im rej ba bwe er Kũrjin rainin? Ta eo Jijej ear make ba me enaaj kalikkare rũkal̦oor ro an rem̦ool? Kõmij kõn̦aan bwe kwõn jouj im lale wãween an Baibõl̦ eo uwaake kajjitõk kein. Im ilo katak kein tok, jenaaj etale naan ko l̦alem an Jijej me rej kalikkar rũkal̦oor ro an rem̦ool im renaaj jipañ kõj kile er. Jenaaj etale ewi wãween Kũrjin ro m̦okta rar jerbale men kein ilo mour ko aer. Bareinwõt, jenaaj etale wõn ro rainin ibwiljin ro me rej ba er Kũrjin rej kwal̦o̦k ejja wãween kein wõt ilo mour ko aer.