Akinmej kijtouaj kichiuaj ken Cristo, ¿melauak ijkon kichiuaj?

¿TIKMATI keski katej akinmej kijtouaj kichiuaj ken Cristo? Itech xiuitl 2010, amochtli tlen itoka Atlas of Global Christianity, kijtoua okatka kanaj 2,300 millones akinmej kijtouaj kichiuaj ken Cristo, pero xexelitokej itech kanaj 41.000 religiones uan nochtin tlatlamantli kineltokaj, amo san se tlamantli kichiuaj. Ken sapanoua miakej kijtouaj “kichiuaj ken Cristo” sekimej ayakmo kimatij tlen kineltokaskej, ik non, san moyolkokouaj. Xamo motlajtlaniaj: “Akinmej kijtouaj kichiuaj ken Cristo, ¿melauak ijkon kichiuaj?”.

Para tikajsikamatiskej ma tikijtokan tika itech okse altepetl, ¿ken tikteititis kanin moaltepe? Amo san tikijtos, moneki tikteititis pasaporte noso okse amatl tlen kijtoua kanin moaltepe. Noijki amo san moneki tikijtoskej tikchiuaj ken Cristo, moneki tikteititiskej. Ma timomachtikan seki tlamantli.

Kanaj itech xiuitl 44 opejki kinmixmatij sekimej ken cristianos. Lucas akin okijkuilo Biblia okijto “ompa Antioquía opé kintokayotiah cristianos n tokniwah non kineltokah Cristo” (Hechos 11:26). Ik non, akinmej omotokayotiayaj “cristianos” omonekiaya kichiuaskej ken Cristo. ¿Tlen kijtosneki tikchiuaskej ken Cristo? Diccionario Teológico del Nuevo Testamento kijtoua: “Akin kichiuaj ken Cristo moneki mochijchikauas kichiuas ken ye itech nochi inemilis”. Nin kijtosneki akin kijtoua kichiua ken Cristo moneki kichiuas tlen otlamachti uan kitlakamatis tlen okijto Jesús.

¿Katej akinmej melauak kichiuaj ken Cristo? ¿Tlen okijto Jesús kichiuaskiaj? Para tikmatis tlen kijtoua Biblia, xikintlajtolti makuili tlamachtilmej tlen kiualika nin revista. Itech sejse tlamachtil, tikitaskej se tlamantli tlen Jesús okijto kiteititiskia akinmej melauak kichiuaj ken ye. Noijki tikitaskej tlen okichijkej akinmej opejkej kichiuaj ken Cristo itech achto siglo uan satepan tikitaskej axkan akinmej ijkon kichiuaj.