Na Bohle ba Ipitšago Bakriste Ruri ke Bakriste?

GO NA le Bakriste ba bakae? Go ya ka Atlas of Global Christianity, ka 2010 go be go ena le Bakriste ba e nyakilego go ba ba dimilione tše dikete tše 2,3 lefaseng ka bophara. Eupša kgatišo yona yeo e bontšha gore Bakriste bao ke ba mekgatlo ya dikereke ya ka godimo ga e 41 000—o mongwe le o mongwe o na le dithuto le melao ya wona ya boitshwaro. Ka ge ba lebeletšane le bontši bja madumedi a raraganego ao a ipolelago gore ke a Bokriste, go a kwagala gore babogedi ba bangwe ba gakanege goba gaešita le go nolega mooko. Ba ka ipotšiša gore, ‘Na bohle bao ba ipolelago gore ke Bakriste ruri ke Bakriste?’

Anke re lebeleleng ditaba ka tsela e nngwe. Gantši go lebeletšwe gore mosepedi a botše mohlankedi wa mollwaneng gore ke modudi wa naga efe. Gape o swanetše go hlatsela boipolelo bja gagwe ka go ntšha lengwalo la molao, mohlomongwe paseporoto. Ka mo go swanago, Mokriste o swanetše go dira se se fetago go dumela go Kriste. O swanetše go ba le bohlatse bjo bo oketšegilego. Bohlatse bjoo e tla ba bofe?

Lentšu “Mokriste” le dirišitšwe la mathomo nakong e itšego ka morago ga 44 C.E. Radihistori wa Beibele Luka o begile gore: “E bile Antiokia moo barutiwa ba ilego ba bitšwa Bakriste ka lekga la pele.” (Ditiro 11:26) Ela hloko gore bao ba bego ba bitšwa Bakriste e be e le barutiwa ba Kriste. Ke’ng seo se dirago gore motho e be morutiwa wa Jesu Kriste? The New International Dictionary of New Testament Theology e hlalosa gore: “Go latela Jesu bjalo ka morutiwa go bolela gore [motho] a gafe bophelo bja gagwe ka moka go sa šetšwe maemo . . . nakong ya bophelo bja gagwe ka moka.” Ka gona, Mokriste wa therešo ke yoo a latelago dithuto le ditaelo tša Jesu, Mothomi wa Bokriste, ka mo go feletšego go sa šetšwe maemo.

Na go a kgonega go hwetša batho ba bjalo gare ga ba bantši bao ba ipolelago gore ke Bakriste lehono? Jesu o ile a re ke’ng seo se bego se tla hlaola balatedi ba gagwe ba therešo? Re go laletša gore o ele hloko kamoo Beibele e arabago dipotšišo tše ka gona. Dihlogong tše di latelago, re tla hlahloba dintlha tše hlano tše di boletšwego ke Jesu tšeo di hlaolago le go re thuša go lemoga balatedi ba gagwe ba therešo. Re tla ahlaahla kamoo Bakriste ba lekgolong la pele la nywaga ba ilego ba bontšha maswao a ka gona. Le gona re tla katanela go bona gore ke bomang gare ga ba bantši bao ba ipolelago gore ke Bakriste lehono bao ba bontšhago maswao a.