Okuti Aveho veliti “Ovakristau” Ovakristau Umwe?

OVAKRISTAU veñgapi vekahi mouye auho? Ngetyi tyipopia o Atlas of Global Christianity, menima 2010 ankho mouye auho muna Ovakristau valamba po 2,3 yonombiliau. Mahi tupu omukanda oo wapopia okuti Ovakristau ovo, vekahi monongeleya mbulamba po 41.000, iya kese imwe ina omalongeso ayo novitumino. Mokonda yonongeleya ononyingi veliti “Ovakristau,” tunoñgonoka oityi ovanyingi vangwangwanena ine vasoya. Hamwe velipula, ‘Okuti aveho veliti Ovakristau, Ovakristau umwe?’

Tutalei epulo olio monkhalelo yelikalela. Omunthu ulinga oungendi, tyina avasa omapulisa okuyunga onondimbu mbotyilongo, kapopi vala oku atunda, mahi tupu wesukisa okulekesa omukanda umuimbukisa okuti owotyilongo otyo, ombiyete ine o passaporte. Tupu, Omukristau wotyotyili kapopi vala okuti una ekolelo mu Kristu, mahi tupu wesukisa okutyilekesa. Oñgeni metyilekesa?

Ondaka “Omukristau” yahimbika okuundapeswa konyima yo 44 P.K. Luka omuhoneki Wombimbiliya wati: “Omo Antiokia ovalongwa vaihanwa tete okuti Ovakristau.” (Atos 11:26) Tala okuti vokuaihanwa okuti Ovakristau, ankho ovalongwa va Kristu. Oityi tyikalesisa omunthu omulongwa wa Kristu? O Dicionário Internacional de Teologia do Novo Testamento ihangununa okuti: “Okukala omulongwa wa Jesus tyilekesa okuava omuenyo wove auho ngotyilikutila . . . okuava umwe omuenyo auho.” Omukristau wotyotyili oyouna ulandula nawa-nawa omalongeso nonondonga mba Jesus, Waetako ewaneno lio Vakristau.

Okuti pokati kavana veliti Ovakristau mupondola okuvasiwa Ovakristau votyotyili hono? Oityi Jesus apopile okuti otyo matyiimbukisa ovalanduli vae votyotyili? Tukukonga utale oñgeni Ombimbiliya ikumbulula omapulo oo. Mononthele mambulandulako, matutale ovituwa vitano Jesus apopia vitukuatesako okuimbuka ovalanduli vae votyotyili. Matutale oñgeni Ovakristau votete vevilekesa. Tupu matulingi ononkhono mbokutala ovalie pokati kovanyingi veliti Ovakristau hono valekesa ovituwa ovio.