KUANTU kristian tin na mundu? Segun e buki na ingles Atlas di Kristianismo Global, na aña 2010 tabatin kasi 2.300 mion kristian, pero dividí den mas ku 41.000 grupo religioso, kada un ku su propio doktrina- i normanan. Pues ta di komprondé ku algun opservadó ta sinti nan konfundí, asta desepshoná, ora nan haña nan konfrontá ku tantu religion “kristian” asina. Kisas nan ta puntra nan mes: ‘Ta tur ku ta afirmá di ta kristian realmente ta kristian?’

Awor, laga nos wak e asuntu for di un otro ángulo. Por ehèmpel, si un hende ke drenta un pais, e mester bisa e funshonario di imigrashon ta ken e ta i ki nashonalidat e tin. Pero esei so no ta basta. Tambe e tin ku presentá su pasport òf kualke otro dokumento pa proba esei. Asina tambe, un kristian berdadero tin ku hasi mas ku djis bisa ku e ta kere den Kristu. E mester por identifiká su mes komo tal. Laga nos wak kon e por hasi esei.

Un 10 aña despues di e morto di Kristu, nan a kuminsá usa e nòmber “kristian.” E historiadó bíbliko Lukas a skirbi ku “tabata na Antiokia ku bou di guia di Dios nan a yama e disipelnan ‘kristian’ pa promé biaha.” (Echonan 11:26) Tuma nota ku ta e disipelnan di Kristu hende a yama kristian. Kiko ser un disipel di Hesukristu ta enserá? Segun un dikshonario: “Sigui Hesus komo un disipel ta nifiká ku [un hende] ta sakrifiká henter su bida inkondishonalmente . . . pa restu di su bida.” (The New International Dictionary of New Testament Theology) Ku otro palabra, un berdadero kristian ta un persona ku ta sigui e siñansanan i instrukshonnan di Hesus—e Fundador di kristianismo—na un manera total i inkondishonal.

Nos por haña hende asina awe entre e tantísimo religionnan ku ta bisa ku nan ta kristian? Kiko Hesus mes a bisa ku lo identifiká su berdadero siguidónan? Nos ta animá bo pa lesa e siguiente sinku artíkulonan pa bo por sa kon Beibel ta kontestá e preguntanan ei. Kada artíkulo lo analisá un karakterístika ku, segun Hesus, ta identifiká su siguidónan. Nos lo wak tambe kon e kristiannan di promé siglo tabata un ehèmpel den esaki. I despues nos lo trata di mira ken, entre e tantísimo religionnan ku ta bisa ku nan ta kristian, ta hasi meskos ku nan.