Sent aule “Christen” woare Christen?

WOO väl Christen jeft daut? No een Buak no jeef daut aune 2010 meist 2 300 Million Christen oppe gaunze Welt (Atlas of Global Christianity). Oba dautselwje Buak säd uk, daut dee Christen to äwa 41 000 Jemeenten jehieeden un dee haben aula äare ieejne Lieren un Räajlen, woo see läwen. Un wäajen daut soo väl Gruppen jeft, waut sajen, daut see Christen sent, kaun eena goot vestonen, wuarom eenje Menschen gaunz derchenaunda un entwei sent äwa de Jemeenten. Dee denkjen veleicht: “Sent aul dee, waut sajen, daut see Christen sent, werkjlich Christen?”

Well wie daut mol vejlikjen: Wan een Mensch no een aundret Launt reist, dan es daut jeweenlich nich jenuach, daut dee bie de Jrens bloos sajcht, wäa hee es, oba dee mott daut uk oppwiesen, biejlikj met eenen Pauss. Soo es daut uk bie de Christen. Dee motten mea doonen, aus bloos sajen, daut see Christen sent: Dee motten daut uk bewiesen kjennen. Woo kjennen dee daut?

Daut Wuat “Christen” wort daut ieeschte Mol en daut Joa 44 n. Chr. jebrukt. De Bibelschriewa Lukas säd: “De Jinja worden daut ieeschte en Antiochia Christen jenant” (Aposteljeschicht 11:26, PB). De Menschen, waut Christen jenant worden, wieren Christus siene Nofolja. Wanea kaun een Mensch aus Jesus Christus sien Nofolja jetalt woaren? Een Wieedbuak sajcht toom Jesus sien Nofolja sennen, mott een Mensch reed sennen, Jesus en aule Stekjen notodoonen un daut fa sien gaunzet Läwen (The New International Dictionary of New Testament Theology). Doawäajen helt een woara Christ sikj gaunz aun daut, waut Jesus lieed un velangd.

Jeft daut vondoag dän Dach noch woare Christen? Waut säd Jesus, aun waut wudd daut to seenen sennen, woont woare Christen wieren? Well wie mol seenen, waut de Schreft doaräwa sajcht. En de näakjste Artikjels woa wie fief von Jesus siene Lieren derchnämen, waut ons halpen kjennen to seenen, woont siene woare Nofolja sent. Wie woaren uk seenen, woo de ieeschte Christen daut nokjeemen, waut Jesus lieed, un tolatst woa wie noch seenen, aus daut vondoag dän Dach uk noch soone jeft, waut Jesus siene Lieren nokomen.