¿Nikʼwach inkik’uhtaaj taqeh kʼachareel chi manlik ajnimaneel taqeh?

¿AWEHTʼAL na i hat jarubʼ taqeh ajnimaneel wilkeebʼ chi jun suut i akʼal? Reʼ huuj Atlas of Global Christianity, iruqʼor chi pan 2010 wilkeebʼ naq kʼisiin maʼ 2.300 millón, xa reʼ laʼ chʼaqamaj taqeh ikʼinaq chi 41 mil ruum i kibʼihnaal, chi kijuʼjunaal reh reh wach inkinimaj eh inkibʼan. Wilik k’ih taqeh nimanik eh chu’nchel inkiq’or chi manlik ajnimaneel taqeh, ruum wilik i maʼ inkireq ta chik chi riij chajariik i nakibaʼnam eh intiʼbʼik kikʼux ruum i wilih. Mareh inkikapaaj: ¿Korik na inkiqʼor chuʼnchel chi manlik ajnimaneel taqeh?

Qilow jenaj ehtalil. Qaqʼor chi reʼ hat inawaaj okik pan tokoom tinamit, ¿nikʼwach ne inakʼuhtaaj ahaʼ tichalik? ¿Mi manlik xa ruukʼ chi ne inaqʼor chi hat ajtokoom tinamit? Maʼ manlik ta xa ruukʼ inaqʼor, ko ruman laʼ chi ne inakʼuhtaaj jenoʼ huuj reʼ irukʼuhtaaj ahaʼ tichalik. Jeʼ reʼ noq, reh chi jenoʼ ne irukʼuhtaaj chi manlik ajnimaneel, maʼ manlik ta xa ruukʼ ruqʼorariik chi irukoj wach i Cristo. Ko ruman laʼ chi ne irukʼuhtaaj chi manlik rajtahqaneel i Jesús. Naqilom nikʼwach.

Reʼ qʼorik ajnimaneel (cristiano) xtohqʼik rukojariik noq ikʼinaq chik i haabʼ 44 reh i qaqʼijil. Reʼ Lucas, jenaj ajtzʼihbʼaneel reh i Santo Laj Huuj, xuqʼor chi, «ar Antioquía xtohqʼik reje ruqʼorariik keh i aj nimaneel chi manlik raj nimaneel i Cristo chik i kibʼihnaal» (Hechos 11:26). Jeʼ reʼ noq, reʼ taqeh ajnimaneel reʼreʼ rajtahqaneel i Cristo naq taqeh. Xa reʼ laʼ, ¿chajariik iraaj ruqʼorom chi jenoʼ kʼachareel rajtahqaneel i Jesucristo? Reʼ huuj teológico reh i akʼ kʼuhbʼaal, iruqʼor: «Reʼ iraaj rutahqeem i Cristo, ko ruman chi ne iruqʼahsaj riibʼ pan ruqʼabʼ [...] naruq’ahsam chunʼchel i rukʼachariik». Reʼ wilih iraaj ruqʼorom chi jenaj manlik ajnimaneel irukʼam naah i xukʼuhtaaj i Jesús, reʼ i xutzʼuhkrisaj i manlik nimanik.

¿Wilik na kʼachareel jeʼ re’ i kina’ojb’al chi kixilak inkiqʼor chi ajnimaneel taqeh? ¿Nik’wach xuqʼor i Jesús chi na naq kinab’eem ajwach taqeh i manlik rajtahqaneel? Reh runabʼjiik iruqʼor i Santo Laj Huuj chi riij i wilih, ne irubʼan chi ne inawil i hoʼoobʼ chi naʼojbʼal chalik reh. Reʼ i juʼjun keh i wilih narutzʼirim riij nikʼwach naq narunabʼjiik kiwach taqeh i rajtahqaneel i Jesús. Eh na woʼ qilom i ehtalil xkikanaaʼ taqeh ajnimaneel reh i peet siglo, eh chi riij i reʼ naqilom ajwach taqeh i ajnimaneel reh i qaqʼijil kʼahchiʼ kikʼuhtaam taqeh i na’ojb’al wilih.