¿Imasnara yachana ushanchi piguna sirtu Jesusta catijcuna anun?

¿CAN ricsinguichu intiru mundui Jesusta catijcuna masna tiashcara? Atlas of Global Christianity nishca cuinta 2010 huatai ñacas 2.300 millones tianuca, paiguna 41.000 religiongunara charinuca, caran shuj paihua quiquin quirinara pactachinara charinuca. Caran religionda charijcuna “Jesusta catijcuna anchi” rimashcai, maicanguna imaras rurangaj mana yachasha llaquiunai urmanun. Tapurina ushanun: “¿Tucuigunachu Jesusta sirtu catijcuna anunga?”.

Chi ejemploi intindingaj iyarishunchi. Can shu llactama icungaj munasha, can ¿imasnara ricuchingui maimanda ashcara? Can ricuchina angui shu pasaporte, cédula can pi ashcara ricsichingaj. Shinallara can sirtu Jesusta catij ashcara ricuchingaj can rurashcaunahua ricuchina angui. Mana rimanalla angui Jesucristoi quirishcara. Ricushun imasna.

Cristiano nishca shimi huata 44 huashalla utilizangaj callarinuca. Quillcaj Lucas nica “Antioquía llactai, quirijcunara ‘Cristiano’ nisha ñaupa punda shutichinauca” (Hechos 11:26). Cristianos shutichishca ajcuna Jesusta catijcunaj ana anuca. Shu runa ¿imara ruran Jesusta catijcuna tucungaj? Diccionario Teológico del Nuevo Testamento intindichin “Jesucristora catina an intiru shunguhua paita sirvina tucui causaibi”. Shinashas shu Jesusta sirtu catij paihua causaibi tucui Jesús yachachishcaunara mandashcaunaras pactachingaj ursarin. Jesús cristianismo nishcara callarichij an.

¿Cuna punzhaunai cai tunu runaunara tiangachu Jesusta catij anchi nijcunapura? Jesusta sirtu catijcuna ¿imara rurana ashcara Jesús nica? Biblia caimanda ima nishcara yachangaj cai catij pichca temagunara leanuchu cumbiranchi. Caran tema shu iyaihua ricuchinga Jesús ima nishcara paita sirtu catijcunara ricsichingaj. Shinallara ricushun punda sigloi tiaj Jesusta catijcuna imasna shu ali gustu ejemplo cushcara, chi huasha cuna punzhaunai maican Jesusta catijcuna chillara ruraushcara ricungaraunchi.