¿Llapankuchu cheqap cristiano kanku?

¿YACHANKICHU enteron pachapi hayka cristianokuna kasqanta? Huk qellqapa nisqanman hinam 2010 kaq watapi karqa yaqa 2.300 millon cristianokuna ichaqa rakinasqam kachkan 41 waranqapi manataqmi chaynallachu imapi creesqankupas nitaq imayna kawsasqankupas. (Atlas of Global Christianity.) ‘Cristianowan’ sutichasqa achkallaña religionkuna kasqanraykum wakinqa iskayrayaspa hukmanyasqa tarikunku. Ichapas tapukunku: “¿Llapankuchu cheqap cristiano kanku?”, nispa.

Astawan entiendenapaq kaypi piensarisun. Huklaw nacionman yaykuyta munaspaykiqa, ¿imaynatam qawachiwaq maylaw nacionmanta kasqaykita? ¿Maymanta kasqaykita nisqallaykiwanchu chaytaqa qawachiwaq? Chaypaqqa pasaporte nisqa documentoykita otaq mayqen documentoykitapas qawachinaykim maymanta kasqaykita yachanankupaq. Chaynallataqmi cheqap cristiano kaywanpas, manam Cristopim iñini niyllachu. Cheqap cristianoqa imayna kawsasqanwanmi reqsichikunan. ¿Imaynata?

Cristiano nisqa palabrataqa 44 wata pasaytam rimayta qallarirqaku. Bibliapa nisqanman hinam Dios munaptin Jesucristoman iñiqkunata “cristianowan” sutichayta qallaykurqaku Antioquia llaqtapi (Hechos 11:26). Chaymi cristianokunaqa Cristopa discipulonkunaña karqaku. Ichaqa, ¿ima ninantaq Cristopa discipulon kayqa? Huk diccionariom nin: “Cristopa qatiqninqa kanchik kawsananchikkama tukuy sonqowan payta qatikuspam”, nispa. (Diccionario Teológico del Nuevo Testamento.) Cheqap cristianoqa tukuy sonqonwanmi Cristopa nisqankunata kasukun. Paymi cristiano kawsakuytaqa qallarichirqa.

¿Kanmanchu kay tiempopipas cheqap cristianokuna? Jesuspa nisqanman hina, ¿imaynatataq discipulonkunata reqsichwan? Chaymanta ima nisqanta yachanaykipaqmi kallpanchaykiku qatiqnin 5 yachachikuykunata leenaykipaq. Jesusmi qawachirqa cheqap discipulonkunata imayna reqsinamanta. Yachasuntaqmi punta cristianokuna imayna kawsasqankumanta chaynataq pikunam kunan tiempopi chayna kawsasqankumantapas.