“Cristianon kayku” niqkuna, ¿cheqaq cristianokunachu kanku?

¿YACHANKICHU hayk’a cristianokuna pachantinpi kasqanta? Huk libron willan 2010 watapaq 2.300 millón cristianokuna kasqanta. Chay librollataqmi willan 41.000 t’aqakunapi t’aqanasqa kasqankuta, sapankataq hukniray-hukniray yachachikuyniyoq kanku (Atlas of Global Christianity). Chayraykun wakinqa mana ima yuyaykuyta atispa karunchakapunku. Tapukunkupaschá: “¿Llapankuchu cheqaq cristianokuna kankuman?” nispa.

Kaypi yuyaykusun: huk nacionman haykuyta munaspayki, ¿imaynatan rikuchiwaq huk nacionmanta kasqaykita? ¿Simillawanchu chayta niwaq? Manan riki. Creenasuykikupaqqa documentoykikunata otaq pasaporteykitachá rikuchiwaq. Chhaynallataqmi cristianon kani ninapaqpas, manan Cristopi creeyllachu aswanpas cheqaqpuni kasqaykitan rikuchinayki. ¿Imaynata?

44 wata qhepatan cristiano nisqa simi rikhurirqan. Jesuspa qatikuqnin Lucasmi nirqan: “Antioquía llaqtapitaq Jesucristopi iñiqkunata chaymantapacha Cristiano nispa suticharqanku”, nispa (Hechos 11:26). Cristianokunaqa Cristoq qatikuqninkunan karqanku. Ichaqa, ¿imataq Jesuspa qatikuqnin kayri? Huk libron nin: “[Cristota] qatikuyqa tukuy tiempo payllapaqña kawsaymi”, nispa (Diccionario Teológico del Nuevo Testamento). Chaypi nisqan hina, cristiano kayta Jesús qallarichisqanraykun cheqaq cristianoqa tukuy yuyaywan Jesuspa yachachikuyninkunaman hina kawsan.

“Cristianon kayku” niqkuna ukhupi, ¿kanmanchu chhayna runakuna? ¿Imanirqanmi Jesús cheqaq cristianokunamanta? Chaykunamanta Bibliaq nisqanta yachanaykipaqmi kallpachaykiku qatimuq phisqa temakunata leenaykipaq. Sapankataq rikuchisunki Jesuspa willasqanman hina imaynas cheqaq cristianokuna kanku chayta. Qhawarillasuntaqmi imaynatas ñawpa cristianokuna kawsarqanku chayta, hinaspapas kunan tiempopi llapa cristianokunamanta pikunas ñawpa cristianokuna hina kanku chaytapas.