Tena “Kristiana” vao ze Mirehake tie Kristiana?

MIREHAKE ty Boke Sare Tane Miomba ty Fivavahagne Kristiana Magneran-tane (angilé), fa eo amy ty 32 000 tapetrisa ty Kristiana magneran-tane tamy 2010. Faie mirehake ka o boke iohoe, fa eo amy ty 41 000 mahery ty fivavahagne misy o ndaty rehoe sady sambe managne ty fampianara’e naho ty fitsipike orihe’e o fivavahagne rehoe. Maro areke ty fivavahagne mirehake tie kristiana, hafara’e mikorotan-tsaigne naho diso fanantenagne o ndatio. Ty ila’e mieretseretse tie: ‘Tena Kristiana vata’e vao ze mirehake tie Kristiana?’

Mba hamaleagne izay, le andao tikagne hangalake ohatse heike. Andao hatao tihoe misy ndaty raike nisakane ty polisy, le nagnontenea’e ty mombamomba aze. Tsy hino areke i polisỳ naho magnazava avao reke fa tsy magnomey porofo. Mila manoro ty karam-panondro’e ohatse reke. Hoe izay ka, fa tsy ampe naho mirehake avao ty ndaty raike tie mino i Jesosy, ie amy izao tsy porofoe’e tie tena Kristiana vata’e reke.

Tafara kede ty taogne 44 A.K. ro nanomboke nampiasaegne ty agnaragne tihoe “Kristiana.” Hoe ty Lioka Mpanoratse Baiboly: “Ta Antiokia agne ty nitokavagne voaloha’e i mpianatse rey tie Kristiana.” (Asan’ny Apostoly 11:26) Trea eo fa mpiana i Kristy o aze natao tihoe Kristiana reo. Faie ia iareo? Hoe ty Diksionera Iraisam-pirenena Miomba ty Testamenta Vaovao (angilé): ‘Ty atao tihoe mpiana i Jesosy, le ze mahafoe ty fiai’e iaby ho aze amparake ty hifateza’e sady tsy mitamà hahazo tombo’e naho fa manao izay.’ Ty tena Kristiana areke, le ze magnorike soa ty toromareke naho ze raha nampianare i Jesosy sady tsy mitamà hahazo tombo’e naho fa manao izay.

Manao izay iaby vao o ndaty tsiefa mirehake tie Kristianao? Misy raha dime amantaragne ze tena mpanonjohy ty lia’e, le hohenteantikagne ato naho tena nanao izay vata’e i Kristiana voaloha’e rey. Hohenteantikagne ato ka tie, ia amy ze mirehake tie Kristiana amy izao ro magnorike i raha dime rey.