Kumbi “Akhristu” Wosi Mbakhristu Nadi?

KUMBI pacharu pe Akhristu alinga? Mwakukoliyana ndi buku linyaki, mu 2010 pacharu chosi penga Akhristu pafufupi 2.3 biliyoni. (Atlas of Global Christianity) Kweni buku lenili likamba so kuti Akhristu ŵenaŵa ŵe mu visopa vakujumpha 41,000, ndipu visopa vosi venivi ve ndi visambizu kweniso marangu ngakupambana. Chifukwa chakuwona kuti pe ŵanthu anandi wo atijikamba kuti “mbakhristu” kweni ŵe mu visopa vakupambana, ŵanthu anyaki atimbanyizika. Yiwu atijifumba kuti, ‘Kumbi wosi wo atijikamba kuti mbakhristu, mbakhristu nadi?’

Tiyeni tiwoni chakuyeruzgiyapu chinyaki cho chingatiwovya kumuka fumbu lenili. Munthu yo we pa ulendu wakuluta kucharu chinyaki, asani wafika paboda atimufumba kuti aziŵi charu cho watuliya. Iyu wakhumbika so kulongo vinthu nge pasipoti kuti asimikiziyi vo iyu wakamba. Mwakuyanana waka, Mkhristu wakhumbika kuchita vinandi mumalu mwakukambanga waka kuti we ndi chivwanu mwaku Khristu. Kumbi wakhumbika so kuchitanji?

Zina lakuti “Akhristu” lingwamba chaka cha 44 C.E chati chajumphapu. Luka yo wakulembaku Bayibolu wanguti: “Kwenuku [ku Antiyoke] ndiku akusambira angwambiya kudanika kuti Akhristu mwakulongozgeka ndi Chiuta.” (Machitidu 11:26) Mungawona kuti lemba ili lakamba kuti wo angwamba kudanika kuti Akhristu ŵenga akusambira aku Yesu. Kumbi ntchitu wuli cho munthu wakhumbika kuchita kuti waje wakusambira waku Yesu Khristu? Buku linyaki likamba kuti: “Kuja wakusambira waku Yesu kung’anamuwa kupereka umoyu waku wosi kutuliya pasi pa mtima . . . kwa umoyu waku wosi.” (The New International Dictionary of New Testament Theology) Mwaviyo, Mkhristu wauneneska walondo ndi mtima waki wosi vosi vo Yesu wasambizanga ndi kuchita, ndipu wachita venivi kwali vinthu visuzgi wuli.

Kumbi pakati pa ŵanthu wo atijikamba kuti Mbakhristu mazuŵa nganu, angasanirikapu wo achita venivi? Kumbi Yesu wangukamba kuti ndi vinthu wuli vo vazakutiwovya kuziŵa akusambira ŵaki chayiwu? Titikupemphani kuti muwoni mo Bayibolu limukiya mafumbu ngenanga. Mu nkhani zakulondopu tiwonengi vinthu vinkhondi vo Yesu wangukamba vo vititiwovya kuziŵa Akhristu auneneska. Tiwonengi mo Akhristu a mu nyengu ya akutumika angulongore vinthu venivi. Tiwonengi so kuti mbakhristu naŵa mazuŵa nganu wo ayesesa kufiska vo Yesu wangukamba.