¿Smelelilbal jchʼuunjeletik yuʼun Cristo spisil te jchʼuunjeletike?

¿YABAL ANAʼ jaytul jchʼuunjeletik ay ta swolol Balumilal? Jich bitʼil la yal te Atlas of Global Christianity ta 2010 ay jteb ma staix 2,300 millón ta tul-a te jchʼuunjeletike. Pero te yichʼoj xatel ta 41mil ta chajp religionetik te yanyantik-a te bin schʼuunejik sok te bin ya yakʼik ta nopel. Ta swenta te kʼax bayal religionetik te ya yalik te «schʼuunejik te Cristo» ay cheʼoxeb ants winiketik te ma snaʼik te bin ya snopik sok te chebajem yoʼtanik. Ayniwan jich ya sjojkʼoybey sbaik ini: «¿Smelelilbal jchʼuunjeletik yuʼun Cristo spisil te machʼatik jich ya yalike?».

Kakʼtik jun ejemplo. Teme jaʼat ay ya akʼan ya x-ochat bael ta yan nación ¿bin-utʼil ya awakʼ ta ilel te jaʼ tey lijkemat-a te banti ya awale? Mabal jichuk te ma tikʼuk-a te ya awale, ya skʼan ya awakʼ ta ilel te apasaporte o yanxan jun te ya yakʼ ta ilel te yuʼun-nix tey lijkemat-ae. Jaʼnix jich swenta yuʼun ya xkʼootik ta smelelil jchʼuunjel yuʼun Cristo ma tikʼuk-a te ya kaltik te jchʼuunejtik te Cristoe, ya skʼan te chikanuk ta ilel. Kiltik bin-utʼil.

Te kʼopil cristiano jajch ta tuuntesel ta jaʼbil 44 te kʼalal talemix-a te Cristo, te Lucas la yal: «Tey ta Antioquía nahil aʼbot sbihilinic cristianohetic te jnopojeletique» (Hechos 11:26). Jaʼ yuʼun te jchʼuunjeletik ya skʼan ya xkʼootik ta jnopojel yuʼun Cristo. Pero ¿bin ya skʼan ya yal te ya xkʼootik ta jnopojel yuʼun te Jesucristo? Te Diccionario Teológico del Nuevo Testamento, jich ya yal: «Te ya jtʼuntik te Cristo jich bitʼil jnopojelotik, ya skʼan ya yal te ya kakʼ jbatik ta jnopojel yuʼun te jayeb kʼajkʼal kuxulotike». Te jtul smelelil jnopojel yuʼun Cristo, jaʼ te machʼa ya schʼuun spasel ta lek te nojptesel sok tojobtesel la yakʼ jilel te Jesús te machʼa la sjach jilele.

¿Aybal jich ya spasik ta kʼajkʼal ini te machʼa schʼuunejik Cristo ya yalike? ¿Bin-utʼil la yal te Jesús te ya yichʼ naʼbeyel sba te jnopojeletik yuʼune? Swenta yuʼun ya anaʼxan-a te bin ya yal te Biblia ta swenta ini, kʼopona te joʼebxan articuloe. Ta jujun artículo jaʼ ya scholbey skʼoplal ta jujun chajp te bin la yal jilel te Jesús te ya skʼan ya spasik te smelelil jnopojeletik yuʼune. Jaʼnix jich ya kiltik te ejemplo la yakʼik jilel te sbabial jchʼuunjeletik yuʼun Cristo sok ta patil ya kiltik teme ay jich yakik ta spasel te machʼa schʼuunejik te Cristo ta kʼajkʼal ini.