“Inenikristi” Eje Yen Inenikristi?

BRO Inenikristi yehẹ akpọneje? Ọbe na Atlas of Global Christianity, tare nẹ, vwẹ ukpe ri 2010, Inenikristi ri joma te oduima 2.3 yehẹ akpọneje. Ọbe vuọvo na je tanẹ Inenikristi yena eje na hẹ evunrẹ ẹga sansan re vrẹ 41,000—dohwo vẹ obo rẹ ayen segbuyota vẹ ẹkuruemu rayen. Ọ vwọ dianẹ ayen eje se oma rayen “Inenikristi” na, ọnana ko tighi ẹwẹn rẹ ihwo kpahen ẹga na. Ayen sa nọ, ‘Enana eje re tare nẹ ayen Inenikristi ghini Inenikristi?’

Roro kpahen udje nana. Ọyen obo ri fori rẹ ohwo ro kpo ẹkuotọ ọfa vwọ vuẹ ọlọkpa ro mudia vwẹ ughwru rẹ ẹkuotọ rọ ra na asan ro nurhe. Vwọba, o ji fo nẹ o dje ọnana phia womarẹ o vwo dje ID kadi yẹrẹ ipaspọtu rọyen kẹ ọlọkpa na nẹ etiyin o ghini nurhe. Vwẹ idjerhe vuọvo na, ofori nẹ Onenikristi rẹ uyota ru vrẹ ọ de vwọ tanẹ o se Kristi gbuyota. O ji fo nẹ o djephia. Vwẹ idjerhe vọ?

Ukpe ri 44 C.E. wanre tavwen a ke vwẹ ubiota na “Inenikristi” vwo ruiruo vwẹ obo rẹsosuọ. Luk rọ dia ọvo vwẹ usun rẹ ihwo ri si Baibol na tare nẹ, “Antiọk kọye hẹ asan rẹsosuọ re de mu odẹ kẹ idibo na nẹ otu ri Kristi.” (Iruo Rẹ Iyinkọn Na 11:26) Noso nẹ e se idibo ri Kristi na Otu ri Kristi. Die yen sa nẹrhẹ ohwo dia odibo ri Jesu Kristi? The New International Dictionary of New Testament Theology da ta: “Re vwo nene Jesu kerẹ odibo rọyen mudiaphiyọ nẹ ohwo cha vwẹrokere Jesu vwẹ kẹdia kẹdia . . . vwẹ akpeyeren rọyen eje.” Ọtiọyena, Onenikristi ọyen ohwo ro nene iyono vẹ odjekẹ ri Jesu ọkieje.

A sa mrẹ eka rẹ ihwo tiọyena vwẹ uvwre rẹ ihwo buebun re tanẹ ayen Inenikristi nonẹna? Die yen Jesu komobọ tare nẹ e che vwo vughe Inenikristi rẹ uyota? Avwanre jiriro kẹ wẹ nẹ wọ fuẹrẹn oborẹ Baibol na kpahenphiyọ enọ yena wan. Vwẹ iyovwinreta re vwọ kpahen ọnana, a cha fuẹrẹn eta iyorin ri Jesu tare re sa chọn avwanre uko vwọ riẹn eka re vwo vughe Inenikristi rẹ uyota. Avwanre cha ta ota kpahen oborẹ Inenikristi rẹ ẹgbukpe ujorin rẹsosuọ vwo djephia nẹ ayen vwo eka nana. A je cha mrẹ Inenikristi ri vwo eka nana vwẹ usun rẹ Inenikristi buebun re tanẹ ayen Inenikristi nonẹna.