Kiristtaane Giyo Ubbay Kiristtaanee?

HA WODIYAN deˈiya Kiristtaaneti aappunee? Atlas of Gilobal Kiristtiyaniti giyo maxaafay, 2010n alame yuushuwan 2.3 biiloone gidiya Kiristtaaneti deˈiyoogaa qonccissiis. SHin he maxaafay he Kiristtaaneti, tamaarissiyoobaaninne kaalliyo kandduwaa maaran dumma dumma gidida 41,000ppe dariya haymaanootiyaa kaalliyaageeta gidiyoogaakka qonccissiis. Kiristtaane giyo keehi daro haymaanooteti deˈiyo gishshau, issi issi asau kirqqi giyoy woy ubba eti hidootaa qanxxiyoy aybissakko akeekanau metenna. Eti, ‘Banttana “Kiristtaane” giya ubbay tumuppe Kiristtaanee?’ giidi qoppana danddayoosona.

Ane ha hanotaa dumma ginan xeelloos. Issi biittaappe hara biitti biya uri he biitti geliyo wode, i awu biitta asakko yootana koshshees. I ba mattooqiyaa woy paspporttiyaa bessiyoogankka hegaa qonccissana koshshees. Hegaara issi mala ogiyan, tumu Kiristtaanee Kiristtoosan ammanays giyoogaa xalla gidennan harabaakka oottana koshshees. A dummayidi erissiya harabay deˈana koshshees. Hegee aybee?

Asay “Kiristtaane” geetettidi koyro xeegettidoy 44 M.Lppe simmiina. Geeshsha Maxaafaa xaafidaageetuppe issoy, Luqaasi, “Kaalliyaageeti Anxxookiyan Kiristtaane geetettidi, koiro xeesettidosona” yaagiis. (Oos. 11:26) Hagan Kiristtaane geetettidaageeti Kiristtoosa kaalliyaageeta gidiyoogaa akeeka. Issi uri Yesuus Kiristtoosa kaallees gaanaadan oottiyaabi aybee? Zi Niwu Internaashinal Dikshineeri of Niwu Testtament Tiˈolooji giyo maxaafay, “Yesuusa kaalliyoogaa giyoogee [issi uri] ba deˈo laytta ubban . . . bana muleera yeggi bayiyoogaa” yaagiis. Yaatiyo gishshau, issi asi tumu Kiristtaane geetettiyoy, Yesuusi tamaarissidonne azazido ubbabaa kaalliyo wode xallaana.

Ha wodiyan banttana Kiristtaane giya darotu giddon hegaa mala asata demmana danddayiyoo? Yesuusi bana tumuppe kaalliyaageeta shaakki erissiyay ayba giidee? Ha oyshatuyyo Geeshsha Maxaafay immiyo zaaruwaa pilggana mala nena minttettoos. Hagaappe kaalliya huuphe yohotun, Yesuusa tumuppe kaalliyaageeta shaakki eranau maaddiya, i yootido oyddubata pilggana. Koyro xeetu layttan deˈida Kiristtaaneti Yesuusi tamaarissidoogaadan deˈido ogiyaakka beˈana. Qassi ha wodiyan banttana Kiristtaane giya darotu giddon Yesuusi tamaarissidoogaadan deˈiyaageeti oonakko beˈana.