¿Máax le jaajil «cristianoʼoboʼ»?

TIʼ TULÁAKAL yóokʼol kaabeʼ, ¿a wojel wa jaytúul máakoʼob ku yaʼalikubaʼob cristianoʼob? Junpʼéel libroeʼ tu yaʼaleʼ tu añoil 2010, tiʼ maas tiʼ 41,000 religiónoʼobeʼ yaan óoliʼ 2,300 millones máakoʼob ku yaʼalikubaʼob cristianoʼob (Atlas of Global Christianity). Chéen baʼaleʼ cada junpʼéel tiʼ le religiónoʼoboʼ yaanal baʼax ku creerkoʼob. Como jach yaʼab máakoʼob ku yaʼalikoʼob «cristianoʼobeʼ» maʼ xaaneʼ yaan máax jeʼel u tuklikeʼ: «¿Jach wa túun tuláakloʼob cristianoʼob?».

Utiaʼal a naʼatikeʼ koʼox ketik beyaʼ: koʼox aʼalikeʼ techeʼ táan a bin táanxel luʼum, ¿máasaʼ utiaʼal a wokol teʼ luʼumiloʼ kʼaʼabéettech junpʼéel juʼun eʼesik tuʼux a taal? Láayliʼ bey xan u yúuchul yéetel le máaxoʼob ku yaʼalikubaʼob cristianoʼoboʼ. Maʼ chéen unaj u yaʼalikoʼob cristianoʼobiʼ kʼaʼabéet yaan baʼax eʼesik. Koʼox ilik baʼaxiʼ.

Le tʼaan «cristianooʼ» káaj u yaʼalaʼal tu tsʼoʼokbal le año 44 tsʼoʼokok u taal Jesúsoʼ. Lucas, juntúul tiʼ le máakoʼob tsʼíibt le Bibliaoʼ tu yaʼalaj: «Tu kaajil Antioquía yáax aʼalaʼab cristianoʼob tiʼ le discípuloʼoboʼ. Le kʼaabaʼ jeʼelaʼ Dios tsʼáatiʼob» (Hechos 11:26). Jeʼex k-ilkoʼ le cristianoʼoboʼ u discípuloʼob Cristo. Chéen baʼaleʼ, ¿bix juntúul u discípulo Cristo? Le Diccionario Teológico del Nuevo Testamentooʼ ku yaʼalik: «Juntúul u discípulo Cristoeʼ jach u kʼubmaj u kuxtal utiaʼal u beetik baʼax u kʼáat Cristo». Leloʼ u kʼáat u yaʼaleʼ juntúul jaajil cristianoeʼ mantatsʼ ku yilik u beetik le baʼaxoʼob tu kaʼansaj Jesúsoʼ.

¿Yaan wa máaxoʼob beetik le baʼaxoʼob tu kaʼansaj Cristo teʼ kʼiinoʼobaʼ? ¿Bix tu yaʼalil Jesús kun kʼaj óoltbil u discípuloʼob? Le Bibliaoʼ ku yaʼalik bixi. Utiaʼal a wojéeltikeʼ k-invitarkech utiaʼal a xokik le cinco xookoʼob ku segueroʼ, cada junpʼéeleʼ yaan u yeʼesik junpʼéel tiʼ le baʼaxoʼob tu yaʼalaj Jesús kun eʼesik máax u discípuloʼoboʼ. Yaan xan k-ilik baʼax tu beetaj le discípuloʼob teʼ yáax siglooʼ, kéen tsʼoʼokkeʼ yaan k-ilik bix jeʼel k-kʼaj óoltik le jaajil cristianoʼob teʼ kʼiinoʼobaʼ.