¿Ñee guiráʼ ca ni ná xpinni Cristu laa, dxandíʼ xpinni Cristu laacaʼ la?

¿ÑEE nannuʼ panda xpinni Cristu nuu lu Guidxilayú riʼ la? Según Atlas of Global Christianity, lu iza 2010 nuu biaʼ 2,300 millón xpinni Cristu ne reechecabe lu jma de 41,000 religión ne gadxé gadxé ni rusiidicabe. Nga runi, cumu nuu stale religión la? stale tu rinabadiidxaʼ: «¿Ñee guirácabe dxandíʼ nácacabe xpinni Cristu la?».

Para ganda guiénenu ni la? quíxhenu ti ejemplu. Pa racaláʼdxiluʼ cheluʼ sti guidxi, ¿ximodo zanda gusihuínniluʼ de padé lii? Cadi caquiiñeʼ guinísinu padé laanu, sínuque naquiiñeʼ guluinu ti pasaporte o ti guiʼchiʼ ni guluíʼ dxandíʼ ni. Zacaca nga naquiiñeʼ gúninu para guluinu dxandíʼ nácanu xpinni Cristu, cadi caquiiñeʼ si guininu runi crenu laabe, sínuque naquiiñeʼ gusihuínninu dxandíʼ ni. Guidúʼyanu ximodo.

Bizulú biquiiñeʼ binni diidxaʼ xpinni Cristu despué de iza 44 de ca dxi stinu riʼ. Lucas, tobi de ca ni bicaa Biblia, guníʼ: «Ndaaniʼ guidxi Antioquía nga primé biaje gúdxicabe ca discípulo que cristianu» (Hechos 11:26). Nga runi ca xpinni Cristu que caquiiñeʼ gácacaʼ discípulo stiʼ Cristu. Peru ¿xi riníʼ gácacabe discípulo stiʼ Jesucristu yaʼ? Diccionario Teológico del Nuevo Testamento, guníʼ: «Gaca binni discípulo stiʼ Cristu nga guni ni nabe lu xquendanabani». Ni cusiene diccionariu riʼ nga ca ni dxandíʼ naca xpinni Cristu naquiiñeʼ chinándacaʼ ne gúnicaʼ guiráʼ ni bisiidiʼ Jesús.

¿Ñee nuu binni ni cayuni zacá tiempu riʼ la? ¿Xi zusihuinni dxandíʼ nácacabe xpinni Jesús yaʼ? Pa racaláʼdxiluʼ gánnaluʼ xi rusiidiʼ Biblia de ni caninu riʼ, canábadu lii gúʼndaluʼ xcaadxi artículo ni zeeda raríʼ. Lu cada tobi de ca artículo riʼ zadúʼyanu xi guníʼ Jesús zusihuinni dxandíʼ nácacabe discípulo stiʼ. Ne laaca zadúʼyanu ximodo bisihuinni ca xpinni Cristu de primé siglu dxandíʼ nácacaʼ discípulo stibe ne despué zudiʼnu cuenta tuu nga ca ni dxandíʼ naca xpínnibe ca dxi riʼ.