‘Gúnfulitiña lau nererun’

“Anhaün agunfulira lau nererun, hiábinba lun nani humá disipulugu le tímatimaati. Ábame hasubudiruni inarüni, ábame lesefurunün inarüni.” (HUAN 8:31, 32)

Ka mini lubéi: Dan le lariñagunbei Hesusu “nererun”, ladimurehaña meha luagu le larufudahabei. Gama lumoun, afuranguagüdati lúmagiñe lan aban gürigia íñugutimati liabin le larufudahabei: “Núguchi le óunahabalina, ligía ariñagubalin le lunbei nariñaguni nun luma le lunbei narufudahani” (Huan 12:49). Lidan aban furíei le ladügübei lun Heowá Lúguchi le siélubei, ariñagati: “Bererun le inarünibei”. Ligíati, dan meha larufudahan, libe-agei dan yusu lumuti meha le lariñagubei Bungiu (Huan 17:17; Matéu 4:4, 7, 10). Ligíati, ‘gúnfulitiña’ kristiánugu inarünitiña ‘lau lererun’ Hesusu dan le harihinu Bíbülia to Lererun Bungiu kei “inarüni”, luma kei lébuna arufudahani luma lúrudu le arufudubalin ida luba lan hóuserun.

Hénpulu le híchugubei furumiñetiña kristiánugu: Sandí lumuti giñe meha apostolu Pábulu —le abürühabei saragu gárada to tídanboun Bíbülia— inebesei le lasandirubei Hesusu tuagu Lererun Bungiu. Ligía meha ariñagubei: “Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu” (2 Timotéu 3:16). Ariñawagúati giñe houn wügüriña ha arufudahabaña lidan damuriguaü moun lumuti lan “harufudahan amu uganu luéi uganu inarüniti le heresibirubei lúmagiñe Bungiu” (Titu 1:7, 9, Biblia en Lenguaje Sencillo [Nuevo Testamento]). Weridiwatiña giñe kristiánugu luéi ‘heyeduniwa lau burí arufudahani málati. Le mama lúmagiñeti Kristu, lídangiñeti binadu échuni luma burí ligaburi haritagun gürigia lánina ubóu le’ (Kolosana 2:8).

Kátaña adügübalin ligiaméme uguñe?: Tidan liliburun Vaticano to gíriboun Constitución dogmática sobre la divina revelación, to agumeseruboun ayusurúa lidan irumu 1965 ani to uáguboun layanuhóua tidan Catecismo de la Iglesia Católica, ariñawagúati luagu “mámarügüñein lan tídangiñe Bíbülia tasagarei Ligilisi Katoliku ariñahani le uágubei tariñaga lúmagiñeti lan Bungiu. Ligíati dandu [Sagrada Tradición tuma Sandu Bürütu] mosu lanharúniwa tun biángubei ani inebewa tuguyame lidan ligiaméme manera”. Tidan garüdia to gíriboun Maclean’s, ariñagatu aban minisi lánina relihión to erederuboun lidan uburugu Toronto (Canadá): “Kaba uagu wemegeira adundehani le sügühali bián-milu irumu lúmagiñe labürüdǘniwa? Anihein giñe saminaü buíduburiti wamá, gama lumoun dan le wálugun wíchugunu Bíbülia luma larufudahan Hesusu lébuname, adügati lun mere lan”.

Ariñagatu New Catholic Encyclopedia hawagu gefentiña luagu Heowá: “Bíbüliarügüñoun lébuna hafiñen luma hóuserun”. Ma meme binarü, dürügua lumuti aban wügüri Canadána tayanuhan aban gefentu luagu Heowá dan le tarufudaguña lan yebe tungua lun, aba lariñagun: “Subudi naali kátañadün lan”. Aba línchaha tuagun Bíbülia to túmaboun, lariñagati: “Subudiwatün tuagu líburu to húhaburuguboun”.