Miʼ chʌn ajñelob tic tʼan

«Mi mucʼʌch laʼ chʌn ajñel tij cʌntesa tac, xcʌntʼañetla c chaʼan tiʼ sujm, mi caj laʼ cʌn jiñi i sujmlel, i jiñi i sujmlel mi caj i yʌqʼuetla ti cojlel» (JUAN 8:31, 32).

¿Chuqui yom i yʌl Jesús? Jesús tsiʼ yʌlʌ chaʼan jiñi i cʌntesa tac mach baqui jach loqʼuem. Tiʼ tsictesa baqui tilem: «Jiñʌch jiñi c Tat, jiñi tsaʼ bʌ i chocoyon tilel, tsaʼ bʌ i subeyon chuqui yom mi cʌl yicʼot yom bʌ mic pʌs» (Juan 12:49). Ti jumpʼejl oración Jesús tiʼ sube Jehová, jiñi i Tat am bʌ ti panchan: «Jiñi a tʼan jiñʌch i sujmlel». Jin chaʼan, cheʼ miʼ chaʼlen cʌntesa miʼ taj tiʼ tʼan tsaʼ bʌ i sube Dios jiñi i wiñicob ti wajali (Juan 17:17; Mateo 4:4, 7, 10). Cheʼ jiñi, ¿bajcheʼ miʼ yajñelob tiʼ cʌntesa Jesús jiñi i sujm bʌ xñoptʼañob? Jiñʌch cheʼ miʼ ñopob chaʼan jiñi i Tʼan Dios, jiñi Biblia, cojach muʼ bʌ i yʌl jiñi «i sujmlel» yicʼot bajcheʼ yilal yomonla.

Jiñi ñaxam bʌ xñoptʼañob tsiʼ qʼueleyob ti ñuc i Tʼan Dios. Jiñi apóstol Pablo tsiʼ wen qʼuele ti ñuc jiñi i Tʼan Dios cheʼ bajcheʼ Jesús. Tsiʼ yʌlʌ: «Pejtelel jiñi Tsʼijbujel tilem ti Dios» yicʼot «i cʼʌjñibal» (2 Timoteo 3:16). Cheʼ jaʼel, jiñi wiñicob muʼ i chaʼleñob cʌntesa ti congregación tsaʼ subentiyob chaʼan «yom xucʼul miʼ yajñel[ob] ti jini toj bʌ tʼan» (Tito 1:7, 9, I tʼan Dios). Cheʼ jaʼel, jiñi xñoptʼañob tsaʼ subentiyob chaʼan yom tsajalob «tiʼ ñaʼtʌbal ili pañimil yicʼot ti ñaʼtʌbalʌl tac mach bʌ i sujmic i maʼañic bʌ i cʼʌjñibal chucul bʌ tiʼ costumbre tac wiñicob, ti chuqui tac ñuc bʌ i cʼʌjñibal i chaʼan jiñi pañimil i mach yaʼic ti Cristo» (Colosenses 2:8).

¿Majqui miʼ qʼuelob ti ñuc jiñi Biblia ili ora? Jiñi Constitución dogmática sobre la divina revelación, tsaʼ bʌ waʼchoconti yaʼ ti Vaticano ti 1965 i tsaʼ bʌ ajli yaʼ ti Catecismo de la Iglesia Católica, miʼ yʌl chaʼan «jiñi i cʌntesa tac jiñi Iglesia mach yaʼic jach miʼ locʼsan yaʼ ti Tsʼijbujel. I tiʼ chaʼpʼejlel [jiñi Chʼujul bʌ i Cʌntesajob yicʼot jiñi Chʼujul bʌ Tsʼijbujel] mucʼʌch i qʼuejlel ti ñuc». Ti jumpʼejl revista ti Canadá tsaʼ loqʼui tsaʼ bʌ i yʌlʌ juntiquil xʼixic am bʌ i yeʼtel ti jumpʼejl ñopbalʌl, tsiʼ yʌlʌ chaʼan maʼañic miʼ ñop chaʼan yomixto mi lac chʼʌm ti ñuc muʼ bʌ i yʌl jiñi Biblia yicʼot jiñi añix bʌ 2 mil jab tsiʼ yʌlʌ Jesús.

Jumpʼejl enciclopedia miʼ yʌl tiʼ tojlel jiñi i testigojob Jehová: «Miʼ ñopob chaʼan yaʼ jach ti Biblia baqui yom chucul pejtelel chuqui miʼ ñopob yicʼot bajcheʼ yilal yomob» (New Catholic Encyclopedia). Juntiquil wiñic ti Canadá tiʼ sube juntiquil Testigo: «Cujilix majquiyetla». I woliʼ tuchʼ jiñi Biblia chucul bʌ i chaʼan jiñi Testigo tsiʼ yʌlʌ: «Jiñi libro am bʌ ti a cʼʌb miʼ pʌs majquiyetla».