“Mì Gbọṣi Ohó Ṣie Mẹ”

“Eyin mì gbọṣi ohó ṣie mẹ, be devi ṣie wẹ mì yin nugbonugbo, mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.”—JOHANU 8:31, 32.

Nuhe E Zẹẹmẹdo: “Ohó” Jesu tọn zẹẹmẹdo nuplọnmẹ etọn lẹ he wá sọn asisa he yiaga taun de mẹ. Jesu dọmọ: “Otọ́ lọ lọsu he do mi hlan wẹ ko degbena mi gando nuhe yẹn dona dọ taun lọ go.” (Johanu 12:49) To odẹ̀ de he Jesu hò hlan Jehovah Jiwheyẹwhe, Otọ́ olọn mẹ tọn etọn mẹ, e dọmọ: “Ohó towe wẹ nugbo.” E nọ saba yihodọ sọn Ohó Jiwheyẹwhe tọn mẹ nado nọgodona nuplọnmẹ etọn lẹ. (Johanu 17:17; Matiu 4:4, 7, 10) Enẹwutu, Klistiani nugbo lẹ nọ ‘gbọṣi ohó etọn mẹ,’ gbọn alọkikẹyi Biblu he yin Ohó Jiwheyẹwhe tọn taidi “nugbo” podọ taidi asisa daho hugan he ji nuyise po walọyizan yetọn lẹ po dona sinai do dali.

Lehe Klistiani Dowhenu Tọn lẹ Jẹ Nubiọtomẹsi Enẹ Kọ̀n Do: Apọsteli Paulu he yin Klistiani he kàn suhugan owe Biblu tọn lẹ tọn tindo sisi na Ohó Jiwheyẹwhe tọn dile Jesu wà do. E wlan dọmọ: “Owe-wiwe lẹpo wẹ yin gbigbọdo sọn Jiwheyẹwhe dè.” (2 Timoti 3:16) Sunnu he yin dide nado plọn Klistiani hatọ lẹ dona “tẹdo Ohó Jiwheyẹwhe tọn he yin nugbo bo jẹna jide lọ go gligli.” (Titu 1:7, 9, The Amplified Bible) Abajọ, Klistiani dowhenu tọn lẹ yin tudohomẹna nado họ̀nna “tamẹnuplọnmẹ po oklọ ovọ́ po . . . sọgbe hẹ aṣa gbẹtọ lẹ tọn, sọgbe hẹ onú dodonu aihọn ehe tọn lẹ bọ e ma yin dehe sọgbe hẹ Klisti.”—Kọlọsinu lẹ 2:8.

Mẹnu lẹ Wẹ Jẹ Nubiọtomẹsi Enẹ Kọ̀n to Egbehe?: Owe Vatican tọn he nọ yin Dogmatic Constitution on Divine Revelation he yin alọkẹyi to 1965 bọ owe lọ Catéchisme de l’Église catholique yihodọ sọn e mẹ basi zẹẹmẹ dọmọ: “E ma yin Owe Wiwe kẹdẹ ji wẹ nujikudo Ṣọṣi [Katoliki tọn] gando nuhe yin didehia lẹ go sinai do gba. Enẹwutu, nuwiwa gọna aṣa sinsẹ̀n tọn lẹ lọsu dona yin alọkẹyi bo yin sisi na kẹdẹdile e nọ yindo na Owe Wiwe.” Hosọ de to linlinwe Maclean tọn mẹ yihodọ sọn nuhe agbagogán Toronto tọn de to Canada kanse mẹ dọmọ: “Naegbọn mí na dike nuhe ko yin didọ sọn owhe fọtọ́n awe die gbọ́n ni deanana mí? Mí tindo linlẹn jiawu mítọn titi lẹ he nọ saba yin zizedo apá dopo na mí nọ jlo na hodo nuhe Jesu po Owe Wiwe lẹ po dọ wutu.”

Otànwe lọ New Catholic Encyclopedia dọ gando Kunnudetọ Jehovah tọn lẹ go dọmọ: “Yé nọ pọ́n Biblu hlan taidi asisa dopo gee he ji nuyise po walọyizan yetọn po dona sinai do.” To agọe to Canada, dawe de gbòhódonù na nawe Kunnudetọ Jehovah tọn de to whenue nawe lọ jlo na dọhona ẹn. Dawe lọ dlẹnalọdo Biblu nawe lọ tọn bo dọmọ: “Po owe he to alọmẹ na mì enẹ po, n’ko yọ́n mẹhe mì yin.”