‘Playpt in mayn wort’

“Wën teyer in mayn wort playpt, sayt teyer wërklich mayn tisipele. Teyer tuut ti woerheet khëne; un ti woerheet tuut aych fray mache.” (YOOHAN 8:31, 32)

Was wil tas saan? Tas “wort” fon Yeesus sin tëm sayn inlërnunge, woo fon een heechste kwel khom is. Yeesus hot kesaat: “Te Fater, woo mich kexikt hot, tee selepst hot mich een kepoot kep iwich was ich saan orer reete solt.” (Yoohan 12:49) Wii Yeesus fer sayn himlix Fater, Yeehoowa Kot, kepeet hot, hot eyer kesaat: “Tayn wort is woerheet.” Yeesus hot ofts Kot sayn Wort foer keprung fer sayn inlërnunge xtitse. (Yoohan 17:17; Matheus 4:4, 7, 10) Soo, wii tuun ti woere kriste in ‘Yeesus sayn wort’ plaype? Wën se Kot sayn Wort, ti Piipel, aan nëme wii “woerheet” un wii heechste autoriteet fer sayn klaape un aanxtelunge.

Wii hon ti eyerste kriste tas aan kewënt? Te aphostel Phaul — te krist woo ti meyerste piiplixe priife kexrip hot — hot te selwich respëkt wii Yeesus iwer Kot sayn Wort ketsaycht. Tee hot kesaat: “Ti kans Xrift is kep woer torich Kot sayn kayst un tii is kuut.” (2 Timoteus 3:16) Ti mëner woo in kesets kep sin fer anere kriste in lërne muste “sich fest aan tëm troy wort hale tëm noo sayn kexik fer in se lërne”. (Titus 1:7, 9) Ti eyerste kriste sin aan kereet kep fer ap xtose ti “filosofii un leyere inlërnunge, woo sich aan mënxliche kewoonheete hale, aan te haupste printsiipye fon te welt, un net in Kristus”. (Koloser 2:8)

Weer keet hayt Yeesus sayn payxpiil noo? Im puuch fom Katesismus fon te Katoolix Khërich * xteet soo: “Ti [katoolix] khërich tuut net ploos sayn inlërnunge uf te Hayliche Xrifte xtaype awer aach in te haylich tratitsyoon. Tes weeche, [ti haylich tratitsyoon un ti Hayliche Xrifte] sole in te selwich aat respektiirt wëre.” Een artikel fon een piichelche fon Kanata * hot ti wërter fon een relichyeese tiinerin fon Toronto foer keprung. Tii hot kefroot: “Warom teete mer uns lënke lose fon te “xlaue wërter” fon yemant woo tswaay tausent yoore tsurik keleept hot? Meyer hon unser aychne itee, woo aarich kuut sin, awer tii sin ofts xwach kep wayl mer ketswung sin unser itee uf Yeesus un ti Xrifte xtaype.”

Ti Nay Katoolix Ensiklopëtya * saat soo iwer Yeehoowa sayn Tsayer: “[Tii] siin ti Piipel wii sayn eensiche kwel fon klaape un fon reekele iwer wii sich aan xtele.” Khërtslich, wii een Yeehoowa sayn Tsayer im Kanata fer eene man preetiche wolt, hot te man tii kexteert, am saan: “Ich wees weer tuu pist.” Te man hot tan fer tëne sayn Piipel hin ketsaycht un hot noch kesaat: “Tas is ayer itentiteet.”

[Noote]