“Mwamabya Mukakwama Ebinywe Byaghe”

“Mwamabya mukakwama ebinywe byaghe, imuli bigha baghe kwenene. Kandi mwasyaminya ekwenene, n’omwatsi w’ekwenene asyabaha obwiranda.”​—Yoane 8:31, 32.

Ekya Kikamanyisaya: “Ebinywe” bya Yesu bikamanyisaya esyongangirirya siwe, esikalhua endatha kutsibu. Yesu mwabugha athi: “Thatha oyo wanyithuma abirinyihana ebyo nangabugha n’ebyo nangathulha.” (Yoane 12:49) Akasaba Thatha wiwe w’elhubulha, Yehova Nyamuhanga, Yesu mwabugha athi: “Ekinywe kyawu ni mwatsi w’ekwenene.” Mirundi mingyi iniakakolesaya Ekinywe kya Nyamuhanga erisighika eby’akakangiriraya. (Yoane 17:17; Matayo 4:4, 7, 10) Kwesi, Abakristayo ab’okwenene, ‘bakakwama ebinywe biwe’​—ni bugha ambu eriligha ekinywe kya Nyamuhanga, e Biblia, ‘ng’ekwenene’ kandi esyonyikirirya n’emibere yabu biseghemere kuyo.

Ngoku Abakristayo b’Erimbere Bakolha Eki: Omukwenda Paulo, Omukristayo oyuwahandika ebitabu bingyi omwa Biblia, iniasikirye Ekinywe kya Nyamuhanga nga Yesu. Mwahandika athi: “Amasako wosi Nyamuhanga yuwatheghekanayagho. Kandi ali n’endundi.” (2 Timoteo 3:16) Abalhume ababirihebwa olhukwamirwa lhw’erikangirirya Abakristayo balikyabo batholere “ibahamba ndeke Ekinywe kya Nyamuhanga ekihikire kandi ekikayiketherawa.” (Tito 1:7, 9, The Amplified Bible) Abakristayo b’Erimbere mubahirwa mw’omuhwa w’erighana “amenge w’abandu n’eritheba buyira erikalhua oko mitse y’abandu, n’oko myatsi y’ebirimu ebikathabalha oko bihugho, eyithelhua oku Kristo.”​—Abanya Kolosai 2:8.

Ni Bahi Abakakolha Eki Munabwire?: Erikwamana ne Catechism of the Catholic Church: “Ekanisa [y’EKikatuliki] yikabya yikanza erikakasya ebyabiribisulhwa, siyirisekuliraya omwa Masako Abuyirire masa. Busana n’ekyo emirwa yabu n’Amasako Abuyirire bitholere ibyaliwa n’erisikibwa buthaleghulha okwa lhulengo lhughumerera.” Omwatsi owali omwa gazeti eye Maclean mwakania okwa bya minista owe Toronto, Canada abugha, oyuwabulhaya athi: “Busana naki ithwaghendera okwa mulenge ‘w’erikolha esyombinduka’ owa bughawa myaka ngumi biri enyuma? Thunawithe ebirengekanio byethu ebyuwene ebyangakolha, ebikabera erihwa amani kundi Amasako n’ebya Yesu abugha bitholere ibyasighikabyo.”

Ekitabu New Catholic Encyclopedia kikabugha bino okwa Bema ba Yehova: “Bakalhangira e Biblia ng’ekitabu kisa ekikalhuamu esyonyikirirya syabu n’ebilhaghiro by’erighenderako.” Lino-lino omulhume e Canada mwathwa Omwema wa Yehova y’akalimi akanza eriyisoborera iyo nga nindi. Omulhume oyo iniane mukangania e Biblia mwabugha athi: “Ngabiriminya nga wulindi, kundi wune n’ekikakuminyikalhaya.”