“Saka Mulama Byambo Byami”

“Umvwe saka mulama byambo byami, ko kuba’mba mwi baana bami ba bwanga, kabiji mukayuka bukine, ne bukine bukemukasulula.”—YOANO 8:31, 32.

Mwatala Bino Byambo: “Byambo” bya kwa Yesu bibena kulumbulula bintu byo afunjishenga kufuma kwi Yehoba. Yesu waambile’mba: “Batata bantumine bo bankambizhe byo nafwainwa kubulañana ne kwamba.” (Yoano 12:49) Pa kulomba kwi Shanji wa mwiulu aye Yehoba Lesa, Yesu waambile’mba: “Byambo byenu bo bukine.” Kimye kyonse Yesu waingijishanga Mambo a Lesa pa kufunjisha bantu. (Yoano 17:17; Mateo 4:4, 7, 10) Onkao mambo, bena Kilishitu ba kine ‘balama byambo byanji’ ko kuba’mba baswa Mambo a Lesa Baibolo kwikala “bukine” mambo po paimena byonse byo bafunjisha ne bintu byo boba.

Byaubile Bena Kilishitu Batanshi: Nembi umo wa Baibolo mwina Kilishitu aye mutumwa Paulo naye wanemekele bingi Mambo a Lesa byonkatu byajinga Yesu. Mutumwa Paulo wanembele’mba: “Binembelo byonse byanembelwe na lutangijilo lwa mupashi wa Lesa kabiji bikwasha bantu.” (2 Timoti 3:16) Banabalume bo batongola mu kipwilo bafunjisha bena Kilishitu bakwabo ‘kukwachisha mambo a kishinka.’ (Titusa 1:7, 9) Bena Kilishitu batanshi bebakambizhe kukana “buntemwa maana ne bujimbijimbi monka mwayila bisho bya bantu, kabiji mwayila bya bwanyike bya pano pa ntanda, bino kechi mwayila Kilishitu ne.”​—Kolose 2:8.

Bañanyi Boba Bino Ano Moba?: Kwesakana na buku wa Vatican’s Dogmatic Constitution on Divine Revelation wa mu 1965 kabiji baambilepo ne mu Catechism of the Catholic Church waambile’mba: “Kechi byafuma mu Binembelo Byazhila kuba’mba kipwilo kya bakatolika kyaambile pa bintu byonsetu byo kyaambilepo ne. Onkao mambo, kipwilo kya bakatolika kimona’mba bisho byanema bingi byonkatu byanema binembelo.” Kibaaba kiji mu pepala wa Maclean waambile pa kiloolo umo wa mu Toronto, Canada waambile’mba: “Mambo ka o twafwainwa kwikala na muntu wa kwitwambilako ne kwitubuulako bya kuba? Tuji na mashinda awama bingi mwa kubila bintu o tubula kwingijisha na mambo a kuba’mba atweba twafwainwa kulondelangatu kana byafunjishenga Yesu ne Binembelo.”

Kwamba pa Bakamonyi ba kwa Yehoba, buku wa New Catholic Encyclopedia waamba’mba: “Bakamonyi banemeka bingi Baibolo mambo mo mo bafumya bintu byonsetu byo baitabilamo ne kwibakwasha mu byubilo byabo.” Mwanamulume umo wa ku Canada wachibikizhe Kamonyi wa kwa Yehoba byo elumbulwilenga. Uno mwanamulume waambijile uno Kamonyi amba: “Naji kuyuka’mba Bakamonyi ba kwa Yehoba mwatemwa bingi kwingijisha Baibolo.”