“Muzwelapili Mwa Linzwi Laka”

“Haiba muzwelapili mwa linzwi laka, mu balutiwa baka luli, mukaziba niti, mi niti ika milukulula.”—JOANI 8:31, 32.

Taluso ya Manzwi A: “Linzwi” la Jesu litalusa lituto zanaalutile, zenesimuluha ku Mulimu. Jesu naabulezi kuli: “Yena Ndate yanilumile unifile taelo ya seniswanela kubulela ni kuluta.” (Joani 12:49) Jesu hanaalapezi ku Ndatahe wa kwa lihalimu, yena Jehova Mulimu, naaize: “Linzwi lahao ki yona niti.” Naaamanga kwa Linzwi la Mulimu hañata-ñata kuli abonise buniti bwa litaba zanaaluta. (Joani 17:17; Mateu 4:4, 7, 10) Kacwalo, Bakreste ba niti babonisa kuli ‘bazwelapili mwa linzwi lahae’—ka kulumela kuli Bibele, lona Linzwi la Mulimu, ki yona “niti,” kutoma litumelo zabona fa litaba zeiluta, ni ka kusebelisa zeibulela mwa bupilo bwabona.

Bakreste Bapili Nebakuteka Linzwi la Mulimu: Sina Jesu, muapositola Paulusi naakuteka hahulu Linzwi la Mulimu. Naañozi kuli: “Liñolo kamukana liñozwi ka kususumezwa ki moya wa Mulimu mi [latusa].” (2 Timotea 3:16) Baana bane baketilwe kuluta Bakreste babañwi mwa puteho ya Sikreste, nebatokwa “kukumalela Linzwi la Mulimu la niti ni lelisepahala.” (Tite 1:7, 9, Bibele ya The Amplified Bible) Paulusi naataluselize Bakreste ba kwa makalelo kuli batokolomohe “butali bwa lifasi ni bupumi ka kuya ka lizo za batu, ka kuya ka lituto za lifasi za makalelo mi isiñi ka kuya ka Kreste.”—Makolose 2:8.

Ki bo Mañi Babakuteka Bibele Kacenu?: Buka ya litumelo za bulapeli bwa Keleke ya Katolika ibulela kuli: “Keleke ya Katolika haiingangi litaba zeiluta mwa Bibele feela. Kacwalo, Keleke iinga sizo kuba sa butokwa sina Bibele.” Ka kuya ka magazini yebizwa Maclean, musali yomuñwi yali yomuhulu wa bulapeli bobuñwi mwa Toronto, kwa Canada, naabulezi kuli: “Kana lwaswanela kulatelela zanaabulezi mutu yanaapilile lilimo ze 2,000 kwamulaho? Ni luna lwakona kueza lika zende kusina kulatelela zanaalutile Jesu ni ze mwa Bibele.”

Buka ya New Catholic Encyclopedia ibulela cwana ka za Lipaki za Jehova: “Lika kaufela zebalumela litomile feela fa Bibele mi basebelisa zeibulela mwa bupilo bwabona.” Nako yeñwi, muuna yomuñwi kwa Canada naabulelezi musali yali Paka ya Jehova yanaatilo kutaza ku yena kuli naamuziba. Naaize: “Namiziba kabakala Bibele yemusweli mwa lizoho.”