“Mūminine mu Mwanda Wami”

“Wivwane mūminine mu mwanda wami, nankyo binebine mwi bāna-bami-babwanga, ne kuyūka kwine mukayūkidijanga bya bu-binebine, nabyo bikemukūlanga ke mudi bāna-pabo.”—YOANO 8:31, 32.

Mobishintulwila: “Mwanda” wa Yesu ushintulula bufundiji bwandi, bwine bwātambile ku nsulo ya peulu. Yesu wānene amba: “Tata wauntumine ye wandaīle mwanda’mba: E mōkasapwila nankyo, e mōkēsambila nenki’mu.” (Yoano 12:49) Mu milombelo yālombele Yesu kudi Yehova Leza, Shandi wa mūlu, wānene’mo amba: “Mwanda obe kyo kyabinebine.” Wātelele misunsa mivule Mwanda wa Leza pa kukwatakanya bufundiji bwandi. (Yoano 17:17; Mateo 4:4, 7, 10) Bene Kidishitu ba bine nabo, ‘bōminine mu mwanda wandi’—o mwanda mwine, betabije Bible Kinenwa kya Leza bu “kyabinebine” ne amba kidi na lupusa lukatampe pa nkulupilo ne bilongwa byabo.

Muswelo Wāfikīle’po Bene Kidishitu Babajinji: Mutumibwa Polo, Mwine Kidishitu umo ubadilwa mu balembi bālembele mikanda mivule ya mu Bible, wādi ulēmekele Kinenwa kya Leza enka na mwādi mwikilēmekēle Yesu. Wāsonekele amba: “Bisonekwa byonsololo bisonekeja Leza shi bika, shi bika, byo bimwenwamo.” (2 Temote 3:16) Bana-balume batongelwe mwanda wa kufundija banababo Bene Kidishitu, bafwaninwe “kūminina monka mu mwanda wa binebine” wa Leza. (Tetusa 1:7, 9) Bene Kidishitu babajinji bāsoñanibwe kupela “byamanwa . . . ne kyongo kyampikwa kwendelamo, monka mwikadile bisela bya bantu, ne bya bunkasampe bya panopantanda, [shi] kemwikadilepo bya Kidishitu nabya, mhm.”—Kolose 2:8.

I Bāni Bafikīle’po Dyalelo?: Kukwatañana na dibuku dimo dya Vatika (Dogmatic Constitution on Divine Revelation), dyāitabijibwe mu 1965, dipituluka mu Katekeshimu ka kipwilo kya Katolika (Angele) kanena amba: “Kipwilo kya [Katolika] kekiselelepo bubinebine bwakyo butala pa bintu byonso byāsokwelwe enka mu Bisonekwa Bikola kete. Nanshi lufundijo lutōkele ne Bisonekwa Bitōkele binenwe kwitabijibwa, kulēmekibwa ne kulondwa mu butōtyi.” Kishinte kimo kya mu Julunale (Maclean) kyatelele mwingidi umo wa kipwilo mwana-mukaji wa mu Toronto (Kanada), waipangwile amba: “Mwanda waka tusakilwa ‘Umbikalo wa kushinta ntanda’ wituludike tamba myaka tununu tubidi? Batwe bene tudi na milangwe miyampe mpata yotutyepejanga mvubu nyeke na kukimba kwiikwantañanya na bya Yesu ne na Bisonekwa.”

Dibuku dimo (New Catholic Encyclopedia) dinena pa mwanda utala Batumoni ba Yehova amba: “Bamwene Bible bu ye nsulo yabo imo kete ya lukulupilo ne bu ye wa kuludika mwiendelejo wabo.” Panopano ponka, muntu umo wa mu Kanada watyibile pa kishima Kamoni wa Yehova umo mwana-mukaji wadi ukimba kwitela. Uno muntu wamunena koku ufunka Bible ukwete kaka amba, “nkuyukile kala, namone’nka kiyukeno kyenu’kyo.”